Ibyabaye ku muganga wise uruhinja ‘satani nto’

Yanditswe na Zigiranyirazo Bajecteur
Kuya 26 Nzeri 2017 saa 03:41
Yasuwe :
1 0

Mu bitaro bizwi ku izina rya Naval Hospital Jacksonville ho muri Leta ya Florida, abakozi babiri bakoraga muri serivisi zo gufasha abagore birukanwe ku mirimo yabo nyuma yo kwita umwana w’uruhinja satani nto.

Aba bakozi bashyize amashusho ku rubuga rwa Snapchat agaragaza umwe muri bo afashe ukuboko k’uruhinja agezageza kukuzunguza kugira ngo bigaragare ko urwo ruhinja rwari ruri kubyina indirimbo y’umuhanzi w’icyamamare 50 Cent yitwa “In Da Club” yumvikanaga icurangwa n’abo bakozi.

Ntibyarangiriye aho rero kuko abo bakozi bongeye gushyira ku rubuga ifoto igaragaza umwe yazamuye urutoki rwa musumbazose (ikintu gifatwa nk’igitutsi gikomeye) munsi y’iyo foto hagashyirwaho amagambo agira ati “Uku ni ko ndimo niyumva muri kano kanya ku byerekeye izi satani nto”.

Nyuma y’ibi umwe mu bakoresha urubuga nkoranyambaga rwa Facebook witwa Denisa Shellito yaje kwandika amagambo akomeye aherekejwe n’ayo mashusho ku rukuta rwe anavuga ko uwayashyize kuri Snapchat ari umwe mu bo bicaranye ku ntebe y’ishuri.

Mu magambo ye Denisa yagize ati “Umukobwa twize ku ishuri rimwe kuri ubu ni umuforomokazi ufasha ababyeyi ariko uku ni ko we n’inshuti ye bafata abana b’impinja baba bavutse.

Ibyo Denisa yari amaze gushyira ku rukuta rwe hadaciyemo akanya n’ako guhumbya inshuti ze zahise zitangira kubisangiza abazikurikira aho mu mugoroba umwe wonyine bari bamaze kubisangiza abandi inshuro zigera ku bihumbi 330.

Ibi bitaro ntibyatinze kugira icyo bibivugaho kuko nyuma y’igihe gito babinyujije ku rubuga rwabo rwa Facebook bagize bati “Aya mashusho ni indengakamere, ntibyemewe ndetse si n’ubunyamwuga, ntibishobora kubabarirwa.

Bakomeje bagira bati “ Twamaze kumenya ababigizemo uruhare, si abaganga nk’uko twabonye imbuga zimwe zabitangaje ariko ni abakozi b’ibitaro bari bashinzwe kwita ku barwayi ubu bakaba banamaze kwirukanwa ndetse bakazanakurikiranwa n’amategeko n’ubutabera bwa gisirikare, twamaze kubimenyesha ababyeyi b’umwana”.

Huffingtonpost ivuga ko aba bakozi batangiye gukurikiranwa n’inkiko z’ubutabera aho bakurikiranweho ibyaha birimo no gukoresha ibikoresho by’ikoranabuhanga birimo na telefoni mu buryo bunyuranije n’amategeko.

Ubuyobozi bw’ibi bitaro bukaba bwanasabwe gukurikirana ngo burebe ko nta yandi mafoto y’abarwayi yaba yarashyizwe ku mbuga nkoranyambaga cyangwa se yaba ari muri telefoni ahagenewe gukurikiranirwa abarwayi.

Hanasabwe kandi ko abayobozi muri ibi bitaro bagerageza kwegera ababyeyi bose bari muri ibi bitaro n’abenda kuhakirirwa bakabahumuriza babamenyesha ko bagikomeje ubunyamwuga ndetse n’ubunyangamugayo muri serivisi bari basanzwe babakeneraho.

Abantu batandukanye bikomye uyu muganga, ibitaro bihita bimwirukana
Uyu muganga yatangiye gukurikiranwa ku buryo bukomeye nyuma yo kwita uruhinja satani nto

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza