Ibyo abahanga mu bugeni bavuga ku miturirwa izamurwa hirya no hino ku Isi

Yanditswe na Jean Pierre Tuyisenge
Kuya 19 Ukuboza 2016 saa 10:48
Yasuwe : XX
0

Umunyabugeni w’Umudage wabaye ikirangirire mu kinyejana cya 20, witwa Ludwig Mies Van Der Rohe, yavuze ko ubugeni bwatangiye umuntu afata itafari akarigereka ku rindi bikozwe mu buryo bwiza;Ibi bishobora kumvikana nk’ibyoroshye, ariko ubugeni ni ukugira roho y’ubwubatsi bishingiye ku buvumbuzi.

Hazakomeza habeho impaka ku nkomoko nyakuri y’ubugeni, ariko igikorwa cy’ubugeni kizwi cyane cya kera, cyubatswe mu matafari ahiye mu gace k’Amajyepfo ya Iraq. Ni inyubako yitwa Ziggurat yubatswe mbere y’Ivuka rya Yezu, ikaba ifite metero 30 z’uburebure, iri mu mujyi wa Ur.

Abahanga batandukanye baravuze byinshi ku bugeni, baba abatekereza, abanyamateka n’abanyabugeni ubwabo.

Rogers avuga ko inyubako zose nziza bidasaba ko zitwara umubare munini w’amafaranga kugira ngo zubakwe.

Ati “ Kugira inyubako y’igitangaza ntibisaba ko umuntu aba afite amafaranga menshi, nubwo amafaranga afasha, icy’ingenzi ni ugutekereza.”

Avuga ko kugira ngo inyubako ibe ifite ireme kandi ishobora kuramba, yaba ihenze cyangwa ari iy’igiciro gito, igomba kuba igendeye ku bipimo by’imibare ifatika.

Undi munyabugeni witwa Philip Gumuchdjian, akimara kwitegereza inyubako ya Pompidou iri i Paris mu Bufaransa yagize ti “ Ni bwo bwa mbere mu buzima bwanjye mbonye ko umunyabugeni, igikorwa cy’ubugeni, inyubako, bishobora guhindura uburyo sosiyete ikora, uko yitwara ikarushaho gutera imbere.”

CNN ivuga ko uyu mwaka, Ikigo cy’Abongereza cy’abanyabugeni, Royal Institute of British Architects (RIBA), cyashatse guteza imbere iyi mitekerereze maze gishyiraho igihembo mpuzamahanga kizajya gihabwa abanyabugeni bakoze imbata z’inyubako zifatwa nk’iza mbere z’Umwaka.

Itsinda ry’abazajya batanga ibyo bihembo rihagarariwe na Richard Rogers wakoze igishushanyo cy’inzu iri mu Mujyi wa Paris mu Bufaransa, ya Pompidou n’iyo mu Bwongereza ya Lloyd. Akazafashwa n’abahanga mu bugeni, nka Kunlé Adeyemi, Philip Gumuchdjian, Marilyn Jordan Taylor na Billie Tsien.

Iryo tsinda rifite ibintu rigenderaho ritoranya uzahembwa, inyubako itoranywa igomba kuba igendanye n’icyerekezo cy’Isi, ifite udushya ndetse ifite umusanzu ufatika muri Sosiyete.

Kuva ikinyejana cya 21 cyatangira, habayeho iterambere rishingiye ku mikorere ya za mudasobwa, maze imbata z’amazu ziteye mu buryo butandukanye n’ubwahozeho kera zirakorwa, ari na ko zirushaho kwerekana ubwiza butangaje.

Gusa aba bahanga mu gukora imbata z’amazu bavuga ko inyubako nziza izaramba, iba igomba kuzasiga ikimenyetso gikomeye ku Isi.

Inyubako za kera zubakwaga mu matafari ahiye. Iyi ni Ziggurat yubatswe mbere y'ivuka rya Yezu muri Iraq y'ubu
Bradford-on-Avon Tithe Barn yubatswe mu Bwongereza mu kinyejana cya 14
Pompidou yubatse i Paris mu Bufaransa
Inyubako zo murim iki gihe zubakanwe ubuhanga buhambaye bitewe n'aho iterambere rigeze
Iyi ni inyubako yubatswe mu Mujyi wa Shanghai mu Bushinzwa
Iyi nyubako itangaje iherereye i New York Muri Leta Zunze Ubumwe za Amerika
Iyi ni Tula House iherereye muri Canada
Abanyabugezi bemeza ko inyubako z'ubu bigaragaza ubwiza butangaje

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza