Ibyo wamenya ku bantu bashaje cyane ku Isi

Yanditswe na David Eugène Marshall
Kuya 7 Mutarama 2018 saa 12:36
Yasuwe :
0 0

Mu mateka y’Isi, Jeanne Louise Calment, ni we uzwi mu bamaze imyaka myinshi bahumeka umwuka w’abazima aho yavutse mu 1875, akaza kwitaba Imana mu 1997 aguye mu Mujyi wa Arles mu Bufaransa.

Uyu mufaransakazi yitabye Imana afite imyaka 122 n’iminsi 164, ni umwe muri bake babashije kubona imbonankubone intambara zombi z’isi ndetse yanabonye iyubakwa ry’umunara wa Eiffel uri mu Mujyi wa Paris. Bivugwa ko yanahuye n’umwe mu banyabugeni bakomeye, Umuholandi Vincent Willem van Gogh.

Jeanne Calment yitabye Imana akoza imitwe y’intoki ku binyejana bitatubirimo icya 18, 19, n’icya 20 cyaburagaho imyaka 3.

Ni umuhamya w’ibintu bitatu bikomeye byavumbuwe mu isi areba birimo ibyuma bitwara insinga z’amashanyarazi, umwaduko wa telefoni zigendanwa mu myaka ya 1940, ndetse na televiziyo yatangijwe n’Umunya-Écosse John Logie Baird mu 1926.

Ubusanzwe abantu bashaje cyane ku isi ‘‘supercentenaire’’ bahozeho kuva kera gusa iyi nyito yabo yatangiye gukoreshwa cyane mu 1970, izanywe na Norris McWhirter wari Umwanditsi mukuru w’Igitabo cyandikwamo abantu baciye agahigo ku isi, kizwi nka “Guiness Des Records.”

Kuva ubwo, iri jambo cyangwa iyi nyito yatangiye gukoreshwa ku bantu barengeje imyaka 100 y’ubukure.

Ikinyamakuru 7sur7 cyatangaje ko umubare munini mu bantu babayeho igihe kinini ku Isi ugizwe ahanini n’igitsina gore, muri batanu baza imbere, batatu ni Abayapani.

Ku rutonde rw’aba Supercentenaires muri iyi minsi ya none, uza imbere y’abandi ni Umuyapanikazi Nabi Tajima, ufite imyaka 117; uyu mwanya yawusimbuyeho Violet Brown wo muri Jamaica, witabye Imana kuwa 15 Nzeri 2017.

Nabi Tajima ufite imyaka 117 n'iminsi 145 ni we ukuze kurusha abandi mu 2018

Ku b’igitsinagabo mu baramye kurusha abandi, ugifite ikamba ni uwitwaga Jiroemon Kimura, wapfuye afite imyaka 116 n’iminsi 54. Kimura witabye Imana ku ya 12 Kamena 2013, yari afite abana barindwi, abuzukuru 15, abuzukuruza 25 n’ubuvivi 13.

Urutonde rw’aba-supercentenaires rukunze gukurura impaka nk’aho muri Indonesie bivugwa ko uwitwa Saparman Sodimejo "Mbah Gotho" aherutse kwitaba Imana kuwa 30 Mata 2017. Yari kuba afite imyaka 146, ariko nta rwego rwizewe mu gihugu cye rwemeje uburambe bw’uyu mukambwe.

Umufaransakazi Jeanne Louise Calment yitabye Imana afite imyaka 122 n’iminsi 164
Kimura ni we waramye cyane mu bagabo aho yitabye Imana afite imyaka 116 n’iminsi 54
Violet Brown wo muri Jamaica yitabye Imana ku wa 15 Nzeri 2017
Saparman Sodimejo "Mbah Gotho" bivugwa ko yitabye Imana afite imyaka 146

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza