Ikosa rikomeye rituma abantu babyuka bananiwe

Yanditswe na Nshimiyimana Gonzalde
Kuya 15 Mutarama 2018 saa 12:39
Yasuwe :
0 0

Gusinzira neza ni imwe mu nkingi za mwamba z’ubuzima nyuma y’amafunguro n’imyitozo ngororamubiri; kimwe n’uko umubiri ukenera kurya, kunywa no guhumeka, gusinzira nabyo birakenererwa cyane ku buzima, kuko bituma umubiri ukomeza gukora no gutekereza neza.

Umwe mu nzobere mu bijyanye n’ibitotsi n’uburyo bwo gufasha umubiri kuruhuka binyuze mu gusinzira Dr Carnmel Harrington, avuga ko hari ikosa rimwe mu buzima rijya rikorwa rituma abantu babyukana umunaniro ukabije kandi baruhutse bihagije.

Yavuze ko biterwa no kutamenya amasaha ubyukira ngo bihoreho umubiri ubimenyere.

Aganira na Daily Mail yagize ati “Ni ngombwa kandi ni iby’igiciro kugena igihe cyo kubyuka ukagitoza umubiri wawe ku buryo ushobora kubyuka nta muntu ukubyukije cyangwa ngo ubyutswe n’urusaku urwo ari rwo rwose.”

Muri Australia, 70% by’abaturage batuye iki gihugu, umusaruro wabo mu kazi ugirwaho ingaruka no kubura ibitotsi.

Dr Amy Reynolds inzobere mu bijyanye n’ibitotsi, avuga ko ababyeyi bagomba kumenyereza abana babo kuryama nibura amasaha umunani mu ijoro. Ibi babibatoza babikora kuko iyo umubyeyi abyutse iruhande rw’umwana ngo mu mubiri na we arabyumva ntabashe kongera kwiyumvamo ibitotsi nk’uko byari bimeze mbere.

Dr Carmel Harrington avuga ko kubyukana umunaniro biterwa no kutagira igihe gihoraho cyo kubyuka; ugasanga amasaha yo kubyuka agenda ahindagurika bya hato na hato.

Abantu benshi ntibajya bamenya ko igihe ubyukira mu gitondo kigira ingaruka ku gihe uri buryamire nijoro.

Iyo turabutswe urumuri rwa mu gitondo, bituma imisemburo itanga ibitotsi icika intege bityo gusinzira bikaba bikomwe mu nkokora.

Kutamenyereza umubiri wawe amasaha yo kubyukiraho, ntibigira ingaruka ku bitotsi gusa ahubwo binagira ingaruka ku gihe umubiri wawe usonzera.

Dr Harrington akomeza avuga ko igihe cyo kubyuka gifite uruhare runini cyane kuko iyo umubiri wawe wamenyereye igihe cyo kubyuka byoroha kugena igihe cyo kuryama, bityo wa munaniro wa hato na hato ukagenda.

Ikindi gikomeye cyibasiye ab’iki gihe kandi gifite ingaruka mbi ku misinzirire, ni ubucakara bwo gukoresha cyane ibyuma by’ikoranabuhanga nka telefone na mudasobwa.

Inzobere zivuga ko ari byiza kuzimya ibyuma by’ikoranabuhanga byose bikwegereye igihe ugiye kuryama.

Urubuga Topsante rugaragaza ko umwana ukivuka kugeza ku minsi 28 aba agomba kuryama amasaha ari hagati ya 14 na 17 ku munsi, umwana ufite kuva ku kwezi kugeza ku myaka 2 aba agomba kuryama hagati y’amasaha 12 na 15, ku mwana ufite hagati y’imyaka 2 n’imyaka 4 agomba kuryama hagati y’amasaha 11 na 14, ufite imyaka 4 kugeza kuri 6 agomba kuryama amasaha hagati ya 10 na 13 naho kuva ku myaka 6 kugeza mu gihe cy’ubugimbi n’ubwangavu agomba kuryama byibura amasaha ari hagati ya 9 na 11.

Ku ingimbi n’abangavu, aba bo bagomba kuryama byibura amasaha umunani n’icumi mu gihe abantu bakuze bagomba kuryama byibura amasaha ari hagati y’arindwi n’icyenda.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza