Imyaka 247 irashize Beethoven, imbarutso y’umuziki w’ubu abonye izuba

Yanditswe na Zigiranyirazo Bajecteur
Kuya 16 Ukuboza 2017 saa 06:05
Yasuwe :
1 0

Ludwig van Beethoven, ni umwanditsi w’indirimbo, umuhanga mu gucuranga piano, ufatwa nk’umwe muri ba sekuruza b’umuziki tuzi uyu munsi ukora ku mutima ukazamura ikibatsi cy’urukundo.

Kuri uyu munsi isi irazirikana imyaka 247 ishize uyu mugabo wari ufite ubuhanga buhambaye mu kwandika indirimbo abayeho, akaba yaravutse kuwa 16 Ukuboza 1770, mu Budage bw’uyu munsi.

Itariki y’amavuko ya Beethoven yemejwe hagendewe ku mahame yavugaga ko umwana uvuka ku babyeyi basengera muri Kiliziya Gatolika abatizwa nyuma y’umunsi umwe avutse, inyandiko zikaba zaragaragaza ko yabatijwe ku wa 17 Ukuboza 1770.

Beethoven ukomoka kuri Johann van Beethoven na we wari umucuranzi na Maria Magdalena Keverich, yamenyekanye cyane kubera ubuhanga yari afite mu kwandika indirimbo ziganisha ku rukundo. Anafatwa kandi nk’umwe mu babaye inkingi ya mwamba mu kuvuka k’uyu muziki waje usimbura injyana gakondo (classic).

Uyu mugabo watangiye kwiga gucurunga akiri muto abifashijwemo na se, yabanje kujya acurangira mu tubari n’ahandi hahurira abantu benshi, ageze mu myaka 20 akaba aribwo yatangiye kuba umunyamuziki w’umwuga. Icyo gihe yari yarimukiye mu mujyi wa Vienne muri Autriche.

Beethoven yakomeje kuba mu mujyi wa Vienna kugeza atabarutse. Muri uwo mujyi yahahuriye na Joseph Haydn wamufashije kuzamura impano n’ubumenyi mu bijyanye n’imyandikire.

Mu myaka 20 isoza urugendo rw’ubuzima bwa Beethoven yahuye n’uburwayi bw’amatwi, bwaje no gutuma mu 1811 ahagarika gukoresha ibitaramo kuko yari atakibasha kugira ikintu na kimwe yumva.

Nubwo byari ibihe bitoroshye ariko wabaye umwanya gukuza inganzo ye, kuko ari bwo yanditse nyinshi mu ndirimbo zakunzwe cyane kugeza n’uyu munsi. Indirimbo ze za mbere yazanditse hagati ya 1798 -1800.

Yaje gupfa ku itariki ya 26 Werurwe 1827, ibizami byo kwa muganga bigaragaza ko umwijima we wari warangiritse cyane kubera inzoga, ndetse n’udutsi dufasha umuntu kumva ntitwari tugikora neza.

Bimwe mu bikorwa bye bizwi cyane harimo Symphony icyenda, piano concertos eshanu, piano sonatas 32 na string quartets 16, Missa solemnis n’ibindi.

Ludwig van Beethoven, ni umwanditsi w’indirimbo, umuhanga mu gucuranga piano, ufatwa nk’umwe muri ba sekuruza b’umuziki

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza