Indege yavaga New York ijya i Paris yahagaze muri Ireland ngo abagenzi bajye mu bwiherero

Yanditswe na Philbert Girinema
Kuya 28 Ukuboza 2016 saa 08:58
Yasuwe :
0 0

Indege yavaga mu Mujyi wa New York muri Leta Zunze Ubumwe za Amerika igana i Paris mu Bufaransa, yagiye guhagarara muri Ireland kugira ngo abagenzi bakoreshe ubwiherero nyuma y’uko ubwo mu ndege bwari bwagize ikibazo.

Iyo ndege ya Boeing 767 y’ikigo OpenSkies gishamikiye kuri British Airways yagiye guhagarara igitaraganya ku kibuga cy’indege cya Shannon mu Burengerazuba bwa Ireland nyuma y’ubusabe bw’abagenzi.

Nk’uko ikinyamakuru Independent cyo mu Bwongereza cyabitangaje, iyo ndege yarimo abagenzi 172, ihagarara basigaje iminota 90 ngo bagere iyo bari bagiye, kuko batashoboraga kwihangana ngo ikomeze urugendo.

Nyuma yo gukemura ibibazo by’abagenzi, iyo ndege yaganaga i Paris yakomeje urugendo.

Mu gihe bari bahagaze muri Ireland, abatekinisiye b’iyo ndege bahise bajya gutunganya ubwiherero bwayo.

British Airways yabwiye The Independent ko basaba “imbabazi ku bw’ingaruka guhagarara byaba byateje, ariko umutekano mu ndege ni cyo kintu cya mbere duha agaciro.”

Kuwa 24 Ukuboza indi ndege yavaga i Toronto muri Canada igana mu Bwongereza ku kibuga cy’indege cya Heathrow, nayo byabaye ngombwa ko ihagarara ku kibuga cy’indege cya Shannon ubwo umwana muto w’imyaka 10 yagiraga ibibazo by’umutima, akaza no kwitaba Imana agejejwe mu bitaro bya Kaminuza bya Limerick.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244