Intama ishobora kumenya isura y’umuntu imurebye ku ifoto

Yanditswe na Mfitumukiza Moïse
Kuya 9 Ugushyingo 2017 saa 01:18
Yasuwe :
0 0

Abashakashatsi bo muri Kaminuza ya Cambridge yo mu Bwongereza bagaragaje ko intama zifitemo ubushobozi buhambaye bwo kumenya isura y’umuntu zisanzwe zizi mu gihe zimurebye ku ifoto gusa.

Ubu bushakashatsi bwakozwe binyuze mu gutoza intama kureba amasura y’abarimo abakinnyi ba filime barimo Jake Gyllenhaal na Emma Watson; Barack Obama wabaye Perezida wa 44 wa Leta Zunze Ubumwe za Amerika n’umunyamakuru wa BBC, Fiona Bruce.

Intama umunani z’ingore zo mu misozi yo muri Wales zatojwe kumenya amasura y’ibi byamamare nyuma y’igihe zongera kwerekwa amafoto abiri atandukanye kuri mudasobwa zigatoranyamo iy’uwo zizi, zikayikozaho izuru maze itsinze igahembwa ibyo kurya.

Prof Jenny Morton wari uhagarariye ubu bushakashatsi yavuze ko icyo bakoze ari ukureba niba intama yabasha kumenya umuntu imurebeye ku ifoto.

Yagize ati “Twibanze kukureba niba inyamaswa ifite ubushobozi bwo kumenya niba ibyo ibona ku ifoto yabasha gutahura ko ari umuntu.”

Ubushakashatsi bwari bwabanjirije ubu bwagaragazaga ko intama zifite ubushobozi bwo kumenya intama ngenzi zazo cyangwa abashumba zisanzwe zizi.

Nyuma yo gutsinda iki kizamini, abashakashatsi bashatse kuzigerageza mu bundi buryo maze bazereka amafoto y’ibi byamamare afotoreye mu byerekezo bitandukanye n’ibya mbere, aya matungo n’ubundi abyitwaramo neza.

Abashakashatsi bongeye kugerageza izi ntama ngo barebe ko zabasha gutahura amasura y’abashumba bazo ku mafoto, maze bayavanga n’ayandi menshi yeretswe izi ntama kuri screen yari yabugenewe, n’ubundi zibasha kubitahura nta kujijinganya.

Ibisubizo byavuye muri ubu bushakashatsi bwasohotse muri Open Science, byagaragaje ko intama nazo zifitemo ubushobozi nk’ubw’umuntu, ingagi cyangwa inkende, bwo gutahura isura y’umuntu hifashishijwe ifoto.

Aba bashakashatsi bavuga ko mu buzakurikira hazigwa ku kumenya niba intama yabasha kumenya iby’iyumviro by’umuntu imurebye ku isura, gusa bukazanibanda cyane ku nyingo yisumbuye y’indwara zishobora gufata ubwonko zirimo Huntington na Parkinson.

Ubushakashatsi bwagaragaje ko intama ifite ubushobozi bwo kumenya isura y’umuntu imurebye ku ifoto

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza