Inzu idasanzwe ikoze mu isura y’urukweto (Amafoto)

Yanditswe na Jean Pierre Tuyisenge
Kuya 9 Mutarama 2017 saa 10:55
42 29

Umunyabugeni akaba n’Umwubatsi w’Umunyamerika witwa Dan Phillips yubatse inzu ifite imiterere idasanzwe iteye nk’urukweto rw’abashumba baragiraga amatungo muri Leta Zunze Ubumwe za Amerika mu myaka yo hambere.

Iyi nzu ifite ibyumba bibiri byo kuraramo n’ubwogero yubatse mu Mujyi wa Houston muri Leta ya Texas.

Ikinyamakuru The Mirror cyo mu Bwongereza cyanditse ko iki gitekerezo Dan avuga ko yakivanye mu nkuru ishushanyije acyiga mu mashuri y’incuke aho yabonye umusaza wabaga mu nzu yari iteye nk’urukweto.

Yagize ati “ Nahoranye amatsiko kuva nkiri umwana, nshaka kuzubaka inzu iteye nk’urukweto nabonye mu gitabo cy’inkuru. Nakundaga kubikora by’abana ariko ngahorana izo nzozi zo kuzayubaka.”

Avuga ko “ubuzima butagira inzozi busa n’ubutariho”.

Iyi nzu itangaje biteganyijwe ko izajya ikodeshwa ama-pound 1000, asaga miliyoni imwe1 mu mafaranga y’u Rwanda ku kwezi, ifite amadarage azamuka akagera hafi y’igisenge na cyo giteye mu buryo butangaje.

Ikikijwe n’izindi zubatse mu buryo bwa gakondo hafi yayo, ifite ubwiherero, igikoni, ibyumba bibiri byo kuraramo ikagira n’imbuga ifite metero kare 711.

Ni inzu yubatswe hifashishijwe ibikoresho byakoreshejwe, birimo udupfundikizo tw’amacupa na CD zashaje.

Mu mushinga wo kubaka iyi nzu, Dan yakoresheje abakozi badafite uburambe muri ako kazi, agamije kubaha ubumenyi buzabafasha kwihangira umurirmo.

Mu gihe iyi nzu iri mu isura y’urukweto izaba yamaze kuzura mu kwezi gutaha, Phillips arateganya kubaka indi imeze nk’ingofero z’abashumba hafi yayo.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE