Kigali: Benshi baracyafitiye ubwoba Tapis roulant bagahitamo kugenda n’amaguru

Yanditswe na Thamimu Hakizimana
Kuya 30 Ukuboza 2016 saa 10:11
Yasuwe : XX
4

Mu gihe mu bihugu byinshi byateye imbere inzu z’amagorofa nyinshi usanga zishyirwamo ibikoresho by’ikoranabuhanga bifasha abadashoboye kuzamuka cyangwa kumanuka (tapis roulant), mu Mujyi wa Kigali na ho byatangiye kuhagera bitewe n’inyubako z’akataraboneka zigenda zihubakwa umunsi ku wundi.

Tapis roulant cyangwa se ingazi(escalier) zikoresha ikoranabuhanga, ni igikoresho gikoresha amashanyarazi, aho gishyirwa mu nyubako z’amagorofa maremare kigafasha kuzamura abantu cyangwa kubamanura vuba batarinze gutondagira izo ngazi ngo bananirwe.

Nubwo iri koranabuhanga rikoreshwa mu Rwanda kimwe nko mu bindi bihugu byateye imbere n’ibindi bikiri mu nzira y’amajyambere, ariko ntizikunze gukoreshwa n’abantu benshi, bitewe no kutameya uko zikora cyangwa zikoreshwa, abandi bakazizinukwa bitewe n’uko babonye abazigiyeho bakitura hasi ku bwo kutazimenyera.

Umunyamakuru wa IGIHE yatembereye muri zimwe mu nyubako nka M. Peace Plaza n’iyitwa Grand Pension Plaza ziherereye rwagati mu Mujyi wa Kigali zirimo iryo koranabuhanga, abona abanyarwanda batari bake bakigorwa no kuzikoresha, bagahitamo kwigendera n’amaguru.

Byukusenge Paul w’imyaka 46 yavuze ko mu buzima bwe yanga gukoresha Tapis roulant kubera ko aba atinya ko ishobora kumugusha.

Yagize ati “Sinyikunda gusa kuko mba mfite ubwoba ko nshobora kuyijyaho ikangusha nkahitamo gukoresha zindi nzira zisanzwe.”

Mutezemariya Agnes w’imyaka 24 we avuga ko impamvu atajya agendera kuri izo ngazi zikoresha ikoranabuhanga ari uko imutera iseriri.

Yagize ati “ Mbere nayigenderagaho ariko nyuma yo kubona uburyo yagushije umuntu agakorwa n’isoni imbere y’abantu, nahise nyizinukwa kubera ko n’iyo nayijyagaho nahitaga ngira isereri.”

Umwe mu bakozi bakorera mu nyubako ndende ya M. Peace Plaza we avuga ko abantu benshi batinya kugendera kuri Tapis roulant kuko baba batazi uko zikoreshwa bakaba banagira isoni zo kubibaza.

Yagize ati “Njye mbona nta kindi gituma abantu batinya kugendera kuri Tapis roulant ahubwo nyine ni bya bindi by’abanyamujyi baba banga kubaza uko bazikoresha bagahitamo kuzamuka cyangwa kumanuka n’amaguru byo kwihagararaho kugira ngo badafatwa nk’abanyacyaro.”

Avuga ko abantu bagiye bareka kwitinya bakababaza uko zikoreshwa, bajya babasobanurira ntibarinde guseba cyangwa kugenda n’amaguru kandi zihari.

Uyu musore avuga ko hari bantu bazigendaho batazi uko zikoreshwa batanasobanuje imikorere yazo maze bakagwa, cyangwa se ngo abandi bakabatabaza ngo baze babafate bagize ubwoba bwo kugwa.

Mu nyubako zigezweho ziri kubakwa muri Kigali bari gushyiramo ikoranabuhanga ryorohereza abantu kuzamuka no kuzimanukamo buzwi nka Tapis Roulant
Abantu benshi baracyatinya kugendera kuri Tapis Roulant kuko batazi kuzikoresha abandi bakazihunga bitewe n'abo zatuye hasi birebera

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza