Kigali: Yahisemo kubangikanya amasomo n’uburaya ngo abashe kubaho n’abavandimwe be

Yanditswe na Thamimu Hakizimana
Kuya 28 Ukuboza 2016 saa 07:30
45 30

Mukeshimana(izina ryahinduwe), umukobwa w’imyaka 22 uvuka mu Karere ka Rubavu, mu Ntara y’u Burengerazuba ariko utuye mu Kagari ka Katabaro, mu Murenge wa Kimisagara, avuga ko avanga amasomo ya kaminuza n’umwuga w’uburaya kugira ngo abashe kubaho.

Uyu mukobwa utagira ababyeyi avuga ko yarangije amashuri yisumbuye ajya mu Mujyi wa Kigali gushaka imibereho, ari nabwo mu gihe gito yaje kubona ubufasha bwo kwishyurirwa kaminuza n’umugiraneza w’umuzungu bahuriye ku mbuga nkoranyambaga.

Mukeshimana yiga muri Kaminuza iherereye mu Karere ka Kicukiro mu mwaka wa mbere, kandi ngo atsinda neza.

Mu kiganiro yagiranye na IGIHE, Mukeshimana yavuze ko amaze amezi umunani atangiye kwicuruza mu bwenge ku buryo ngo nta wapfa kubimenya bitewe n’uko ngo aba yanga ko bimwangiririza isura afite muri sosiyete.

Avuga ko yahisemo kujya yicuruza kugira ngo abashe kubona amafaranga yo kwishyura inzu akodesha n’ibindi bikoresho nkenerwa mu buzima busanzwe.

Ubwo yahuraga n’umunyamakuru mu gitaramo cya Riderman cyabaye mu ijoro ryo kuri Noheli, yamubwiye ko yacyitabiriye kugira ngo arebe ko yahabona umugabo wamuha amafaranga yo gukoresha inzara(igice cy’umubiri).

Ati “ Naje kwidagadura ariko ahanini nje no kureba ko nabona umugabo naha ibintu byose ashaka ariko nawe byibuze akampa amafaranga kugira ngo njye kwikoreshereza izi nzara.”

Avuga ko nyuma yo kubona ubufasha bwo kwishyurirwa amafaranga y’ishuri, na we yashatse uko yajya abona amafaranga yo kumutunga n’abavandimwe be babiri babana.

Ati “ Nijye mukuru(iwabo) kandi mbana n’abavandimwe banjye bandi babiri ku buryo buri kwezi mba ngomba kwishyura ibihumbi 30 by’inzu ntabariyemo ayo kurya.”

Yemeza ko nubwo yicuruza atabikora nk’umwuga ahubwo ngo abikora kugira ngo akemure utubazo tw’ibanze we n’abavandimwe be bakunze guhura natwo nko kugura amavuta yo kwisiga, gukoresha imisatsi, kugura imyambaro, gukoresha inzara n’ibindi.

Yagize ati “Biterwa n’uko mba nanga kwiteza abantu kuko simba nshaka ko buri wese amenya uko mbayeho, kandi na we nabikubwiye kuko nari namaze kukwiyumvamo kubera umwanya munini tumaranye.”

Mukeshimana yongeyeho ko akunze kwicuruza mu mpera z’icyumweru gusa (weekend) kugira ngo abone amafaranga azamufasha mu kindi cyumweru, ku buryo ngo iyo agize amahirwe akabona abagabo baryamana, weekend irangira afite ibihumbi 15 cyangwa 20.

Gusa ashimangira ko aramutse abonye akazi kamutunga we n’abavandimwe be babiri babana yahita asezera kuri ibi bikorwa bifatwa na benshi nk’ibigayitse.

Mukeshimana (ufite telefone) avuga ko akora uburaya kugira ngo abeho n'abavandimwe be babana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE