Kwamamaza

Kuki abantu baramukanya bahana umukono?

Yanditswe kuya 1-12-2016 saa 15:36' na Cyprien Niyomwungeri


Kuramukanya abantu bahana umukono byabaye umuco rusange mu mpande zose z’Isi, ariko ntabwo byapfuye kwizana ngo abantu babyumvikaneho bajye babikora imyaka n’imyaniko ahubwo bifite imvano itari iya none.

Inyandiko nyinshi zigaragaza ko kuramukanya abantu bahana umukono byakomotse mu Bugereki mu kinyejana cya gatanu mbere ya Yezu, benshi bemeza ko bifite umuzi w’ikimenyetso cy’amahoro no kwerekana ibiganza bidafite intwaro.

Guhana umukono bizwi cyane mu nama, gusuhuzanya, gusezeranaho, gushimira umuntu no kwemeza amasezerano mumaze kugirana. Muri siporo no mu bindi bikorwa by’amarushanwa, bikorwa nk’ikimenyetso cyo kwitwara neza yaba mu kinyabupfura no mu irushanwa.

Intego yabyo ni ukugaragaza icyizere, icyubahiro, guca bugufi no kutirata. Mu kugirana amasezerano iyo bitarakorwa ayo masezerano aba ataremezwa neza.

Guhana umukono nk’ikimenyetso cy’amahoro n’icyizere

Kuramukanya abantu bahana umukono bivugwa ko bifite imvano mu kinyejana cya gatanu mbere ya Yezu, aho icyo gihe guha umukono umuntu byagaragazaga icyizere gikomeye umufitiye.

Guhana umukono byagaragazaga kandi igihango ugiranye n’umuntu ko yaba wowe cyangwa we ntawe uzigera akoresha icyo kiganza afata intwaro akurwanya. Cyari ikimenyetso cy’amahoro kuruta icyo kuramukanya kuko niyo washakaga kwereka umuntu ko nta kibi umwifuriza wamuhaga umukono kugira ngo umwereke ko ikiganza cyawe cyera.

Mu kinyejana cya gatandatu, ubwo hadukaga uburyo bwo kurwanisha amafarasi n’ingabo, kuramukanya bahana umukono byagaragaza ko ari amahoro hagati y’ingabo, ko nta mugambi w’intambara uhari. Muri make byagaragaza ikimenyetso cy’umubano mwiza.

Ibi byarakomeje kugeza n’aho birenze ukuramukanya kw’ingabo bihinduka indamukanyo yemewe mu buryo bwa politiki, gusa abashakashatsi bemeza ko bishobora kuba birenze ibyo.

Hari abasanga bifite ikindi gisobanuro

Hagendewe ku bushakashatsi bwakozwe n’abahanga bo mu kigo cya Weizmann muri Israel, bwagaragaje ko hari abantu baramukanya bahana umukono bashaka guhana impumuro kuko ngo hari ubwo bamara gusuhuzanya buri umwe akihumuriza mu kiganza.

Muri rusange abashakashatsi banavuga ko iyo umuntu amaze guhana n’undi umukono ahita amwiyumvamo.

Mu bihugu bitandukanye byiganjemo ibivuga Icyongereza, usanga abagabo aribo bahana umukono cyane kurusha abagore, mu gihe ibyiganjemo idini ya Islam badashyigikira guhana umukono.

Abahana umukono bakoresha akaboko k’indyo?

Hari ababihuza n’imyemerere y’amadini bakavuga ko nk’Abakirisitu bemera ko ukuboko kw’iburyo ari uk’ubutwari naho ukw’ibumoso kukaba ukwa Sekibi. Urugero nko muri Bibiliya berekana ko Imana izahamagara abayiyobotse ikabashyira iburyo naho abayigomeye ibumoso.

Batanga urundi rugero rwo muri Zaburi 118: 15-16 hagira hati “Ukuboko kw’iburyo k’Uwiteke gukora iby’ubutwari. Ukuboko k’Uwiteka gushyizwe hejuru, Ukuboko k’Uwiteke gukora iby’ubutwari.”

Bagaruka ku idini ya Islam bakavuga ko mu myemerere yayo ukuboko kw’imoso ari ugukwiriye gukora ibibi.

Icyakora nk’Abasukuti bashinzwe na Baden Powell bemera ko bahana umukono bakoresheje ikiganza cy’ibumoso nk’ikimenyetso cy’icyizere bafitanye.

Abaciye agahigo mu guhana umukono

Igitabo kijyamo abanyaduhigo, Guinness World Records, mu 1977 cyanditse ko Meya wa Atlantic City muri New Jersey, Joseph Lazarow yigeze guca agahigo ko guhana umukono inshuro nyinshi ku munsi, zigera 11 000, agakuraho aka Perezida Theodore Roosevelt, wayoboye Leta Zunze Ubumwe za Amerika, wigeze guhana umukono inshuro 8510 ku munsi muri White House kuwa 1 Mutarama 1907.

Utu twose twaje gukurwaho mu 1963 na Lance Dowson wo muri Wrexham ho muri Wales y’Amajyaruguru, wahanye umukono n’abantu 12,500 mu masaha 10 n’iminota 30.

Kuwa 31 Kanama 1987, Stephen Potter wo muri St Albans mu Bwongereza yahanye umukono inshuro 19,550 ntabwo akiri uwa mbere ku Isi ariko mu Bwongereza n’i Burayi niwe wahanye umukono inshuro nyinshi.

Kuva mu Ugushyingo 2009, Matthew Rosen na Joe Ackerman bafite agahigo ko guhana umukono igihe kirekire kingana n’amasaha 15 iminota 30 n’amasegonda 45.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved