Kunywa Shisha bigira ingaruka nk’iziterwa n’itabi risanzwe

Yanditswe na Evariste Nsengimana
Kuya 13 Ukuboza 2017 saa 01:30
Yasuwe :
0 0

Muri iki gihe abantu biganjemo urubyiruko bahugiye mu kunywa Shisha igereranywa n’ikiyobyabwenge cyo ku rwego rumwe n’itabi risanzwe nubwo giharawe cyane.

Wikipedia isobanura Shisha nk’uruvange rw’ibintu binyuranye birimo ifu, ibikamba bya pomme, chocolat, umuneke, ’watermelon’ n’ibindi, bitwikirwa mu gikoresho cyabugenewe, bigatanga umwotsi, ukururwa hifashishije umupira ucometseho bita ‘hookah’.

Nko mu Budage, usanga abanyeshuri bakinywa ku ishuri ntacyo bishisha. Ibarura riheruka gukorwa mu banyeshuri basaga 7000 ryagaragaje ko umunyeshuri umwe muri batanu aba yarakuruye ku mwotsi wa Shisha, 6% byabo bawufataho rimwe mu kwezi.

Ishami ry’Umuryango w’Abibumbye ryita ku Buzima (OMS) rivuga ko kunywa Shisha bigira ingaruka zishobora kuruta izo kunya itabi. Ngo kuyinywa mu gihe cy’isaha, bigana no kunywa isegereti ziri hagati ya 100 na 200.

Urubuga dernierecigarette rwanditse ko Shisha igira ingaruka mbi ku buzima bw’umuntu, aho ruvuga ko ubukana bwayo bwifitemo gaz yo mu bwoko bwa ‘monoxydes de carbone’, ingana n’inshuro zirindwi z’iba mu itabi, iyi gaz ngo ni mbi ku buzima bwa muntu n’ibindi binyabuzima.

Ingaruka ugomba kwitegura mu gihe unywa Shisha

Urwo rubuga ruvuga ko kunywa umwutsi wa Shisha bigira ingaruka zikomeye ku muntu ku buryo bishobora gutuma arwara indwara zirimo kanseri zitandukanye, indwara z’umutima, izikunze gufata ibihaha n’izindi zo mu myanya y’ubuhumekero nk’uko zibasira abanywi b’itabi.

Kunywa Shisha kandi ngo bica intege umubiri w’umuntu ku buryo usigara nta bwirinzi buhagije bwo guhanga na microbe zishaka kwinjiramo, kwandura indwara zirimo igituntu n’izindi biba byoroshye.

Dr Himanshu Garg, umuganga w’inzobere mu kuvura indwara zifata imyanya y’ubuhumekero mu Buhinde, avuga ko kunywa shisha bigira ingaruka zingana n’iziterwa no kunywa itabi bitewe n’umwotsi mwishi bakurura ndetse n’igihe abayinywa bamara, bitandukanye n’uko bamwe bibeshya ko nta ngaruka bigira kubera uburyo itunganywamo.

U Rwanda rwatangiye kwamagana Shisha

Ubwo Minisitiri w’Ubutegetsi bw’Iguhugu, Francis Kaboneka, yagaragarizaga Komisiyo y’Ububanyi n’Amahanga, Ubutwererane n’Umutekano ishusho y’uko kurwanya ibiyobyabwenge n’icuruzwa ry’abantu bimeze mu Rwanda, mu Ugushyingo uyu mwaka, yavuze ko Shisha ihangayikishije.

Yagize ati “Abanyarwanda ubundi bafataga inkono y’itabi bagatumura; aho icikiye hari ibindi basigaye batumura na byo ukagira ngo ni itabi ngo byitwa Shisha. Na byo bimaze kuba ikibazo aha, rimwe na rimwe wanakurikirana ntumenye icyo babikoramo ariko hari aho dukurikirana tugasanga hari ibindi bashyiramo nk’ibibabi by’itabi[..] Na byo dutangiye kubibona no kubifata nk’ibiyobyabwenge.”

Yakomeje avuga ko bimaze kugira ingaruka ku bana aho usanga hari abanyeshuri banywa ibiyobyabwenge kandi ko ingamba zo guhana ababikoresha n’ababicuruza zizakomeza gukazwa.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza