Mu minsi ya Noheli indaya zari zagabanyije ibiciro

Yanditswe na IGIHE
Kuya 26 Ukuboza 2016 saa 03:20
Yasuwe : XX
0

Mu mpera z’icyumweru dusoje, abakora uburaya mu bice bitandukanye by’Umujyi wa Kigali bari bagabanyije ibiciro mu buryo budasanzwe.

Ubuhamya bw’abakora uburaya buvuga ko ubusanzwe mu bihe by’iminsi mikuru ya Noheli n’Ubunani igiciro gito cyari ku mafaranga y’u Rwanda 5000.

Muri uyu mwaka si ko byagenze kuko ahenshi byari byamanuwe nkurikije uko byari bimeze aho nabashije kugera.

Mu ijoro ryo kuwa 24 rishyira iryo kuwa 25 Ukuboza 2016, nazengurutse tumwe mu tubari n’utubyiniro bivugwa ko twiyubashye, mpasanga ibiciro bivugwa ko biri hasi ugereranyije n’ibimenyerewe n’abakunda kwitabaza abakora uburaya.

Gusa kugera kuri aya makuru byasaga nk’ibigoranye kuko abenshi mu bawukora bitwikira ijoro, ikaba ari yo mpamvu byabaye ngombwa ko nigira nk’umukiriya kugira ngo mbashe kumenya byinshi kuri bo.

Abanyarwanda barabivuze koko burya iminsi yose ntisa, ijoro ryo Kuwa Gatanu tariki ya 23 kugeza kuryo ku wa 25 Ukuboza 2016, ubwo hizihizwaga Noheli sinshobora kuzaryibagirwa na gato bitewe ahanini n’ibintu bitandukanye nagiye ndibonamo.

Muri iyo minsi navaga iwanjye mbere ya Saa mbiri z’ijoro kugira ngo mbone umwanya uhagije wo kuzenguruka mu duce dutandukanye cyane cyane udukunze kurangwamo indaya.

Nambaye naberewe nk’umusore usohotse, nafashe inzira nerekeza i Matimba,Sodoma Koridoro ndetse no mu Migina i Remera nko mu duce tuzwiho kubamo indaya.
Ubwo nafashe moto kugira ngo mbashe kugerayo vuba.

Nubwo hari abatabyemera, burya ibiba mu masaha y’ijoro ni amateka! Ibyo nabonaga mu nzira ni agahomamumwa.

Abantu bari mu byabo mu mayira

Nkiri kuri moto nagendaga mpura n’abagore basomana n’abagabo, abandi bagazanya yewe hari n’abari bahuje urugwiro mu nkengero z’imihanda.

Nkigera kuri Koridoro no mu Migina, ako kanya indaya zahise zinyegera, zitangira kunyagaza mu gituza ndetse zinashaka kunkora mu myanya y’ibanga yewe zimwe zinashaka guhita zinsoma cyane cyane ko zari zasinze.

Naribwiye nti “ Noneho umva ko nigenje izi zo sinzicika.”
Umwe yahise atangira kunyumvisha uburyo turyamanye nta wundi muntu nazongera kwifuza mu buzima bwanjye bitewe n’imiterere ye idasanzwe.

Nahise nkubitwa n’inkuba ariko ngira amatsiko yo kumenya igiciro akorera kuri serivisi yavugaga ko atanga.

Yahereye ku mafaranga 5000 by’amanyarwanda, abonye ko ntayamuhaye agenda amanura asoza ansaba ko namuha 1000.

Ibi byanyeretse ko abakorera uyu mwuga mu Migina no muri Koridoro bashobora kuba bahendutse.

Ubwo akimara kumbwira atyo “Aho nari mpagaze bagenzi be banzengurutse, umutima uransimbuka, kubera ko bamwe bari batangiye kumbwira umwihariko wa buri wese.

Nahise mbabwira ko nifuza uwo naha amafaranga 500 gusa kugira ngo mbananize ndebe ko bandeka bahita bagira bati “ Uyu ni uwo kutumarira umwuka gusa tujye kwishakira abandi, ni gute se umuhungu mwiza nk’uyu abura inoti y’igihumbi.”

Muri iryo joro nahise nitahira ndavuga nti ‘no Ku Cyumweri ni umunsi.’

Mu bitaramo na ho indaya ntizihatangwa

Bucyeye bwaho mu ijoro nerekeje mu gitaramo cy’Umuhanzi Riderman cyabereye kuri Petit Stade i Remera kugira ngo nze kureba uko naho byifashe.

Umukobwa umwe utarashatse ko izina rye ritangazwa utuye mu Kagari ka Katabaro mu Murenge wa Kimisagara akimbona yahise anganiriza anyumvisha ko yaje muri icyo gitaramo kugira ngo arebe ko yahakura uwamukoreshereza inzara.

Yagize ati “ Nawe unsohokanye tukigira nko muri Sun city, amafaranga atari munsi ya 3000 yaba ahagije. Twararana kugeza mu gitondo nkazajyawikoreshereza inzara.”

Umukobwa utuye ku Gisozi we yagize ati “ Erega iyo ari mu minsi mikuru ntabwo umuntu aba akeneye amafaranga menshi ahubwo aba akeneye gusabana no gusangira n’inshuti gusa. Urumva ko utaba wasangiye n’umuntu ngo agusabe ko muryamana ubimwime keretse uzi ko ari bubijyane burundu.”

Akimara kumbwira atyo yahise atangira kunsaba ko nyuma y’icyo gitaramo na musohokana, nkamugurira inzoga byibuze ebyiri gusa kugira ngo turyamane kuko nari namubwiye ko nta mafaranga menshi mfite.

Gusa icyo nabashije kubona ni uko buri gihe iyo habaye ibitaramo bya nijoro cyangwa se iminsi mikuru, hari abakobwa benshi bishora mu busambanyi kandi badasanzwe babikora, ahubwo ari ukugira ngo bakuremo amaronko.

Indaya zari ziteze ahitwa kwa Rasta kuri One Love

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza