Ni uwuhe mwuka uri mu bihugu byitegura amatora mu 2017?

Yanditswe na Kanamugire Emmanuel
Kuya 30 Ukuboza 2016 saa 03:20
45 30

Miliyoni z’abaturage bo ku migabane itandukanye y’Isi, zihanze amaso ibihishwe n’umwaka wa 2017 yaba mu matora y’Abakuru b’Ibihugu, n’ay’abagize Inteko Ishinga Amategeko ateganyijwe mu bihugu birimo u Bufaransa, u Budage, Iran, u Rwanda, Korea y’Epfo, Chili n’u Buholandi.

U Budage

Amatora yo mu Budage ni kimwe mu bihanzwe amaso na benshi ku mugabane w’u Burayi mu 2017, kuko hibazwa niba Angela Merkel w’imyaka 62 umaze kuyobora iki gihugu nka chancelière mu myaka 11, azatorerwa manda ya kane mu matora rusange ateganyijwe muri Nyakanga 2017.

Muri uku kwezi yongeye kwemezwa n’ishyaka ry’abakirisitu riharanira demokarasi, Christian Democratic Union (CDU) nk’umukandida waryo.

Angela Merkel aheruka gutakaza umubare munini w’abamushyigikiye ndetse hari impungenge ko ashobora gutorwa ku kigero cyo hasi, ahanini bishingiye ku kuba Abadage batanyuzwe na gahunda ze mu kibazo cy’abimukira.

Abatavuga rumwe na we bo mu ishyaka rya rubanda Alternative für Deutschland (AfD), baherutse kumunenga bikomeye ku bw’igitero cyagabwe mu isoko rya Noheli mu mujyi wa Berlin.

Gusa ashimirwa kuba yarashoboye gushyira ku murongo ubukungu bw’u Budage mu myaka amaze ayobora iki gihugu, ndetse kibasha no kurenga ibibazo bikomeye by’ubukungu biheruka kwibasira u Burayi n’Isi muri rusange.

Hibazwa niba Angela Merkel aziyamamariza manda ya kane

Mu Budage hanateganyijwe amatora y’abagize inteko ishinga amategeko, Bundestag, azaba muri Nzeri 2017.

U Buholandi

Haribazwa niba nyuma ya Brexit y’u Bwongereza, hakurikiraho Nexit y’Abaholandi. Iyi ngingo irafatwa nk’ipfundo risobetse mu matora y’abagize Inteko Ishinga Amategeko azaba muri Werurwe 2017, kuko Geert Wilders uyobora ishyaka riharanira ukwishyira ukizana kwa rubanda (PVV), avuga ko arajwe ishinga no gukura iki gihugu mu muryango w’Ubumwe bw’u Burayi mu gihe ishyaka rye ryaba ritowe.

Ibipimo bigaragaza ko ishyaka PVV rifite amahirwe menshi cyane kurusha ayandi nyuma y’uko Geert Wilders yumvikanye mu mbwirwaruhame ze nyinshi adashyigikiye abimukira n’abayisilamu.

Geert Wilders uyobora ishyaka riharanira ukwishyira ukizana kwa rubanda (PVV), avuga ko arajwe ishinga no gukura iki gihugu mu muryango w’Ubumwe bw’u Burayi mu gihe ishyaka rye ryaba ritowe

Iran

Nubwo ataratangaza byeruye ko aziyamamaza, Hassan Rohani uyobora Iran kuva mu 2013, ashobora kwiyamamariza manda ya kabiri y’imyaka ine ari na yo ye ya nyuma mu matora azaba muri Gicurasi 2017.

Mu mezi atandatu ya nyuma muri manda ya Rohani, ubukungu ntabwo bwifashe neza nubwo yabashije guhangana n’ibihano byafatiwe igihugu cye. Ibi byatewe ahanini no kuvugurura ibihano kwa Amerika no kunengwa na Perezida mushya Donald Trump ku masezerano y’iby’intwaro za kirimbuzi, bigira ingaruka cyane kuko mu Ukuboza ubukungu bwasubiye inyuma bikomeye ugereranyije n’idolari rya Amerika.

Abaharanira impinduka bakomeje kuvuga ko bazashyigikira Rohani. Abatsimbaraye ku mahame ya kiyisilamu bavuga ko bazatanga umukandida ariko kugeza ubu ntawe baratangaza.

Korea y’Epfo

Amatora yo muri Korea y’Epfo ateganyijwe kuba mu kwezi ku Ukuboza mu 2017. Aya matora ashobora kuzakorwa nyuma y’amezi abiri Inteko Ishinga Amategeko itoye itegeko ryo gukuraho Perezida uriho Park Geun-hye, umukobwa w’umunyagitugu Park Chung-Hee, nyuma yo kunengwa ibikorwa bya ruswa byatumye hanyerezwa amafaranga ya Leta.

Inteko nitora iryo tegeko, bizaba ari ubwa mbere muri icyo gihugu Perezida uriho akuwe ku ngoma manda ye itarangiye kuva Korea y’Epfo ibonye ubwigenge yakuye k’u Buyapani ku wa 15 Kanama 1945. Perezida Park Geun-hye yagiye ku butegetsi mu 2012.

Ban Ki moon ashobora kwiyamamariza kuyobora Korea y'Epfo

Nkuko aherutse kubitangaza, Ban Ki-Moon uzasoza manda ye ku wa 31 Ukuboza 2016 nk’Umunyamabanga w’Umuryango w’Abibumbye, ashobora kuziyamamariza kuyobora iki gihugu.

Gusa umukandida Moon Jae-in, wo mu ishyaka Minjoo, niwe uhabwa amahirwe.

Rwanda

U Rwanda ni kimwe mu bihugu byitegura amatora mu mwaka utaha, Perezida Kagame umaze imyaka 16 ayobora, arahabwa amahirwe menshi kubera ibikorwa by’intangarugero ku rwego rw’igihugu no ku rwego mpuzamahanga, nubwo ishyaka akomokamo rya FPR ritaratangaza uzarihagararira mu matora y’Umukuru w’Igihugu.

Frank Habineza, uyobora ishyaka rirengera ibidukikije niwe wamaze gutangaza ko azahatana mu matora yo kuwa 3 no kuwa 4 Kanama 2017. Ishyaka Riharanira Demokarasi n’Imibereho myiza y’abaturage(PSD), naryo ryatangaje ko rizatanga umukandida.

Padiri Thomas Nahimana washinze ishyaka ‘Ishema’ ubu akaba abarizwa ku mugabane w’u Burayi, na we aherutse gutangaza ko mu ntangiriro z’umwaka utaha azasesekara i Kigali agatangira gahunda ze zo kwiyamamariza umwanya w’Umukuru w’Igihugu mu matora.

Chili

Muri Chili haribazwa ikibazo kimwe cy’uzasimbura Michelle Bachelet mu Ugushyingo 2017, wagiye ku butegetsi mu 2006. Bachelet wo mu basosiyalisiti ntakunzwe na gato n’abaturage.

Abakandida benshi bamaze gutangaza ko baziyamamaza barimo; umukobwa wa Salvador Allende, wayoboye Chili agahirikwa ku butegetsi mu 1973 na General Augusto Pinochet. Ricardo Lagos wigeze kuyobora iki gihugu hagati ya 2000 na 2006 na we arashaka indi manda.

Hari kandi José Miguel Insulza, wahoze ayobora imiryango ya Leta Zunze Ubumwe za Amerika muri kiriya gihugu n’umunyemari Sebastian Piñera wayoboye iki gihugu mu 2010 kugeza 2014, bahabwa amahirwe ariko bataratangaza niba baziyamamaza.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE