Nyarugenge: Abagabo barwanye inkundura bapfa ibikoresho by’ahahoze Mount Kenya

Yanditswe na Thamimu Hakizimana
Kuya 29 Ukuboza 2016 saa 05:32
Yasuwe :
0 0

Mu gitondo cyo kuri uyu wa Kane, itsinda ry’abagabo batanu bo mu Kagali ka Kinyange, mu Murenge wa Gitega, mu Karere ka Nyarugenge , barwanye inkundura n’abandi bagabo batatu bigenderaga bafite ibikoresho bitandukanye byakoze, byari bikuwe mu nyubako y’ahahoze kaminuza ya Mount Kenya, babashinja kubyiba.

Ibikoresho aba bantu barwaniye birimo ubwiherero bwo mu nzu, intebe za plastique, izo mu biro n’ibyuma bakoramo inzugi, byose byakurwaga mu nyubako yahoze ikoreramo Kaminuza ya Mount Kenya iri mu bikorwa byo kwimukira ahandi.

Nyuma y’uko abo bagabo bakuye ibyo bikoresho muri Mount Kenya, bahise bagotwa n’itsinda ry’abandi bagabo batanu rikunzwe gushinjwa ubujura mu Murenge wa Gitega ritangira kubakubita no kubambura ibyo bari bafite ribashinja ko babyibye muri iyo kaminuza ku bufatanye n’umugabo ushinzwe kuharinda.

Umwe muri abo bagabo yabwiye IGIHE ko babambuye ibyo bikoresho kuko babonye ko bashobora kuba babyibye aho kaminuza ya Mount Kenya yakoreraga.

Yagize ati “ Ntabwo twe dushobora kubareka kuko buri gihe iyo muri aka gace hagizwe abibwa bavuga ko ari twe."

Uwitwa Sibomana, umwe mu bashinjwaga ubujura, n’agahinda kenshi yagiraga ati “ Muri kudukibitira iki ko ibi bintu twabiguze amafaranga yacu agera ku bihumbi 12? Ntabwo turi abajura, turabiguze mwajya kubaza uriya ushinzwe uburinzi wabiduhaye mukatureka.”

Umukozi ushinzwe umutekano ushinjwa kugira uruhare mu igurishwa ry’ibyo bikoresho yagize ati “Nabibahaye kuko nabonaga bishaje biri guteza umwanda hano mu kigo cyane ko turi muri gahunda yo kwimuka.”

Yakomeje avuga ko n’ubwo bamuhaye amafaranga yo kugura fanta ushinzwe gusana ibikoresho muri iyo kaminuza yari yamubwiye ngo abikure muri icyo kigo kuko byahatezaga umwanda.

Ushinzwe gusana ibikoresho muri iyo nyubako, Tomusinge Issa, we yahakanye yivuye inyuma ko ari we wabwiye uwo ’musekirite’ ngo atange ibyo bikoresho.

Yagize ati “ Ntabwo ariko bimeze kuko urabona twatangiye kwimukira Kicukiro noneho kuko mu kwimuka haba harimo akajagari, byatumye tutamenya ko bari kubitwara ariko rwose si njye wamubwiye ngo abitange ku buryo ubwo mbimenye ngiye guhita mbikurikirana.”

Aba bagabo barwaniye ibi bikoresho rubura gica, ku buryo iri tsinda ry’abo bazwi nk’abajura ryarahiraga rikirenga ko ritari bubarekure polisi itahageze.

Itsinda rizwi nk'iry'abajura ryafashe ibyo bikoresho ryanga ko bitambuka
Abari bajyanye ibyo bikoresho ntibarenze umutaru kuko bahise batangirirwa mu nzira babuzwa kugenda
Ibikoresho birimo ubwiherero bushaje nibyo bivugwa ko byari bigurishijwe abo bagabo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244