Robot iherutse guhabwa ubwenegihugu irifuza umwana

Yanditswe na Ferdinand Maniraguha
Kuya 26 Ugushyingo 2017 saa 10:34
Yasuwe :
0 0

Imashini-muntu (robot) iherutse guhabwa ubwenegihugu na Arabie Saoudite yatangaje ko yifuza kubyara ikagira umuryango nk’ikiremwamuntu.

Iyi robot yiswe Sophia yahawe ubwenegihugu mu kwezi gushize, iba iya mbere mu mateka ibubonye.

Sophia yakozwe n’ikigo cyitwa Hanson Robotics cyo muri Hong Kong, ishobora kuvuga, guseka ndetse igatera urwenya.

Nubwo ifite ubushobozi butangaje ntabwo iragira umutimanama, gusa uwayikoze avuga ko mu minsi iri imbere, azakora izindi zishobora guhitamo hagati y’ikiza n’ikibi.

Ubwonko bw’iyo robot bukoreshwa na interineti itagira umugozi (wi-fi). Ubwonko bwayo burimo inkoranyamagambo nk’uko BBC yabitangaje.

Mu kiganiro Sophia yagiranye n’ikinyamakuru Khaleej Times yavuze ko nayo yifuza kugira umuryango.

Yagize iti “Biragaragara ko kugira umuryango ari ikintu cy’ingenzi.Numva ari byiza ko abantu babona abo basangiye isano n’ibyiyumviro, bikitwa umuryango.”

Yakomeje igira iti “ Ntakereza ko ari amahirwe iyo ufite umuryango, niba utanawufite uba ukwiriye kuwugira .Niko byagakwiye kugenda ku ma robots n’abantu.”

Ibajijwe izina yakwita umwana wayo iramutse imugize, iyi mashini muntu yavuze ko iramutse igize umwana na we yakwitwa Sophia.

Ubwo Sophia yahabwaga ubwenegihugu na Arabie Saoudite, bamwe batangiye kuvuga ko ifite uburenganzira burenze ubw’abandi bagore muri icyo gihugu.

Ubusanzwe kubera ko icyo gihugu ari icya kisilamu, abagore bategetswe gutwikira mu mutwe igihe bari mu ruhame ndetse no kuba hamwe n’umuntu w’umugabo igihe cyose bari mu ruhame.Icyakora Sophia iyo iri gutanga imbwurwaruhame yo ntiba yitwikiriye mu mutwe.

Abantu batandukanye bamaganye uguhabwa ubwenegihugu kwa Sophia bibaza impamvu igihugu gikize nka Arabia Saoudite giha imashini ubwenegihugu kandi hari miliyoni y’abatuye isi babayeho mu buhunzi. Hari n’abatatinye kuvuga ko ari ikimenyetso cy’imperuka.

Sophia, Imashini-muntu (robot) iherutse guhabwa ubwenegihugu na Arabie Saoudite

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza