Rusizi: ‘Mutimasi’,agace kazwiho kugira Abakobwa b’umutima

Yanditswe na Kanamugire Emmanuel
Kuya 19 Ukuboza 2016 saa 07:25
Yasuwe : XX
0

Agace ka ‘Mutimasi’, gaherereye mu kagali ka Kabasigirira, mu Murenge wa Mururu, Akarere ka Rusizi, abahatuye bavuga ko hitwa ku ‘Mutima w’abakobwa’ bitewe n’uko mu myaka yo hambere habaga abakobwa barangwa n’imico myiza.

Bamwe mu batuye muri aka gace, bavuga batazi neza igihe iri zina ryahitiwe, kuko ngo bavutse basanga hitwa i Mutimasi,ku mutima w’abakobwa, maze nabo bagira amatsiko yo kumenya inkomoko y’iryo zina, babaza abakuru, bababwira ko‘ ku mutima w’abakobwa’ bishatse kuvuga ko habaga abakobwa bafite umuco n’uburere ntagereranwa.

Twagiramungu Innocent w’imyaka 60, yagize ati “Bahise i Mutimasi, ku mutima w’abakobwa.Kuva aho tumariye kumenya ubwenge twarabajije tuti‘ese aha hantu kuki bahise gutya?’ Abasaza ba kera baratubwira bati‘ ni ku mutima w’abakobwa’, kuko abakobwa bacu twabonaga ari abitonzi, ni cyo cyatumye bahita batyo.”

Kandida Kankindi uri mu kigero cy’imyaka 71, yunzemo agira ati “Umusore wahashakaga umukobwa yajyaga kuzanira n’undi mugenzi we. Bari batandukanye n’ab’ahandi hantu kuko twumva ko haba igice kibamo abakobwa batwaraga inda z’indaro ariko hano ntabwo byahabaga.N’ubu baracyahari kuko tubatoza uwo muco wo kugira umutima.”

Bamwe mu bakobwa batuye muri aka gace bemeza ko hakiri abakobwa b’umutima, uretse bake muri bo batatiriye uyu muco w’ubwitonzi basigiwe n’abakurambere, bitewe n’iterambere ry’ikigihe.

Umuhoza Mediatrice w’imyaka 20, yagize ati “N’ubu ngubu baracyahari benshi, urugero nkanjye ndacyari umukobwa!Nyine urebye abantu bagendana n’igihe kigezweho, Ntabwo wavuga ngo ni Mutimasi, Mutima w’abakobwa nka mbere kuko hari bake batwara izo nda.”

Mu ibarura riheruka gukorwa n’ubuyobozi bw’Umurenge wa Mururu mu bangavu biga mu mashuri y’uburezi bw’ibanze bw’imyaka icyenda, mu 2014, hagaragaye abakobwa batandatu batwaye inda zizateguwe, ariko muri abo bose ngo ntamwana n’umwe w’iMutimasi wagaragayemo, bimwe mu byo wanashingiraho ugirira icyizere abakobwa baho.

Abakuze bavuga ko nubwo ibyashingiweho bahita ‘Ku mutima w’Abakobwa’ ngo bigenda bihinduka, bo ngo baracyakora akazi ko kwigisha abana babo kugira ngo babe abakobwa b’umutima nkuko byari bisanzwe kuva hambere.

Agace kitiriwe kugira abakobwa b'umutima

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza