Rwamagana: Umugabo yategewe kunywa amacupa atanu y’inzoga apfa ageze ku rya kane

Yanditswe na Hakizimana Jean Paul
Kuya 17 Mutarama 2020 saa 03:47
Yasuwe :
0 0

Umugabo witwa Bajyinama John wari ufite imyaka 28 y’amavuko, yashyiriweho intego yo kunywa amacupa atanu y’inzoga ya Vodka, ageze ku icupa rya kane arananirwa, arataha ageze mu rugo arapfa.

Byabaye mu ijoro ryo kuri uyu wa Kane tariki ya 16 Mutarama, mu Mudugudu wa Karambo, Akagari ka Sasabirago mu Murenge wa Fumbwe mu Karere ka Rwamagana.

Amakuru avuga ko uyu mugabo yavuye mu kazi ko kubaka ahitira ku kabari, ni uko abo bari kumwe bamushyiriraho intego yo kunywa amacupa atanu ya Vodka.

Umunyamabanga Nshingwabikorwa w’Umurenge wa Fumbwe, Zamu Daniel yabwiye IGIHE ko uyu mugabo bikekwa ko yishwe n’izi nzoga yari yategewe.

Ati “Amakuru twahawe n’abaturage bari bari kumwe na we ni uko yaje amaze kubaka ahantu, ajya muri ako kabari anywa inzoga ya vodka, batubwiye ko yanyoye vodka eshatu iya kane ikamunanira muri eshanu bari bamutegeye, nubwo abazimutegeye babihakana.”

“Amaze kunanirwa n’iya gatanu bahise bamujyana iwe agezeyo ahita apfa, ntabwo yaguye aho ngaho ahubwo yaguye iwe mu gihe biteguraga kumujyana kwa muganga, hakurikiyeho kujyana umurambo we ku bitaro kugira ngo hakorwe isuzuma bapime bamenye niba yishwe n’izo nzoga cyangwa niba yishwe n’ibindi.”

Uyu muyobozi yakomeje avuga ko abamutegeye izo nzoga bashyikirijwe Urwego rw’Igihugu rw’Ubugenzacyaha, ngo rukurikirane rumenye niba ibivugwa ari ukuri.

Abaturage bahise bashyirwa hamwe babwirwa ko batagomba kunywa inzoga zo kwiyahura, bakangurirwa kujya banywa mu rugero.

Nyakwigendera Bajyinama yasize umugore n’umwana umwe.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza