Twisekere: Nimwihute mwebwe muri bugaruke

Yanditswe na Umutoni Rosine
Kuya 12 Nzeri 2017 saa 11:04
Yasuwe :
0 0

1.Umukobwa wari ufite ubukwe yitegura gushyingirwa. Umunsi w’ubukwe ugeze abantu benshi babukereye bitegura kumuherekeza atinda mu myiteguro akajya yikoza hirya no hino asa n’aho nta cyo yitayeho.

Nuko abo mu muryango we baramubwira bati “ Banguka rwose dore wahereye kare witegura, wikomeza kuducyerereza.”

Nyamukobwa akomeza kwitinza mu nzu ibi by’abageni kandi bagombaga kumushyingira ahantu kure. Bagarutse kumubwira ko yabakerereje arabasubiza ati “ Nimwihute mwebwe muri bugaruke naho njye mundeke.”

2.Umugabo yatashye yasinze, ageze mu cyumba cye asanga mu buriri harimo abantu babiri, aho gusangamo umugore we nk’uko byari bisanzwe. Nuko ahita atekereza ko uwa kabiri ari undi mugabo waje kumuca inyuma, ni ko gufata ikibando ahondagura abari baryamye bigeze aho yigira inama yo kuzana amazi ngo abatwike.

Ageze mu gikoni asanga umugore we ariho aryamye, nuko aramubwira ati "Uyu munsi naryamye hano; ababyeyi bawe badusuye mbaraza mu cyumba cyacu, nizere ko wabasuhuje.”

3.Umukobwa : Cheri unywa inzoga?
Umusore: Yego.
Umukobwa: Inshuro zingahe ku munsi?
Umusore: Amacupa atatu ku munsi kandi inshuti zanjye zaguha ubuhamya.
Umukobwa: Icupa rimwe rigura angahe?
Umusore: Amake ni amafaranga 600 muri butiki muri hoteli ni 1000
Umukobwa: Hashize igihe kingana iki unywa inzoga?
Umusore: Imyaka 20
Umukobwa : Icupa rimwe rigura amafaranga 600 kandi unywa amacupa atatu, bivuze ko unywera ibihumbi 54 ku kwezi. Sibyo?

Umusore: Ati wabimenye rwose
Umukobwa: Ubwo rero unywera ibihumbi 648 ku mwaka. Bivuze ko mu myaka 20 umaze kunywera 12 960 000. Sibyo?
Umusore: Yego
Umukobwa: Wari uzi ko muri ayo mafaranga ubariyemo n’inyungu washoboraga kuba waraguze Mercedes Benz?
Umusore: Ese wowe unywa inzoga?
Umukobwa : Oya
Umusore: Mercedes Benz yawe iparitse hehe?


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza