U Bushinwa: Hatangijwe uburyo bwo kwishyura muri restaurant hifashishijwe isura

Yanditswe na M Moïse
Kuya 2 Nzeri 2017 saa 11:53
Yasuwe :
0 0

Restaurant ya Kentucky Fried Chicken (KFC) yo mu Bushinwa yatangije uburyo umukiliya uyigana azajya yishyura ibyo kurya hakoreshejwe isura mu rwego rwo kurinda umutekano w’amafaranga ye.

Iri koranabuhanga ryamuritswe ku wa Gatanu muri restaurant ikorera mu Burasirazuba bw’Umujyi wa Hangzhou, rifasha umuntu gutumiza icyo kurya arebye mu mashini iri ku gikuta ifata isura y’umuntu (scan) ikayisanisha n’iyifoto y’indangamuntu ye ibitsemo.

Iyo imaze kwemeza ko uwo muntu ari we, imusaba kwinjiza nimero ya telefone ubundi igahita ikuraho amafaranga, ifunguro akarihabwa mu buryo busanzwe n’abakozi bakoramo.

Iyi restaurant yifashisha ikoranabuhanga ryakozwe na Sosiyete ya Ant Financial, yahoze yitwa Alipay ibarizwa mu ikompanyi ikora ibijyanye n’ubucuruzi bwo kuri murandasi "Alibaba Group", ishinzwe guhererekanya amafaranga kuri internet.

Umuyobozi wa Alibaba, Jack Ma, yagaragaje icyifuzo cyo kurikoresha mu nama yiga iby’ikoranabuhanga yabereye mu Budage mu 2015.

Inkuru ya CNN ivuga ko Alipay ikoreshwa n’abasaga miliyoni 500 ku isi yose ikanemerera abantu kwiyandikisha muri porogaramu yayo bakoresheje isura. Iyi ni yo restaurant ya mbere mu bigo bicuruza ibintu bifatika ikoresheje iri koranabuhanga mu kwishyuza abakiliya.

Ubu buryo bwizewe ku buryo ntawajijisha iyi mashini ayereka ifoto cyangwa video dore ko porogaramu yayo igenzura uduce turenga 600 ku isura y’umuntu.

Ikoranabuhanga nk’iri ryageragejwe umwaka ushize n’indi sosiyete yitwa Baidu aho yagenzuraga ingendo z’abashaka gusura Umujyi wa Wuzhen, utemberwamo n’abakerarugendo benshi buri mwaka. Abakozi bayo babasha kwishyura muri restaurant y’iyi sosiyete bifashishije isura.

Iri koranabuhanga ryitezweho kuzakoreshwa no mu bindi bigo by’ubucuruzi muri iki gihugu aho umuntu azajya agenda nta kintu na kimwe yitwaje ariko akabasha guhaha icyo yifuza.

Umwe mu bayobozi muri Ant Financial, Dong Liyun, yagize ati “Dufite icyizere ko umunsi umwe, abantu bashobora kuzajya batembera nta telefone cyangwa ikofi bitwaje ndetse bakaba bahaha ibyo bifuza.”

Inzego z’ubuyobozi mu Bushinwa ziri guhuza iri koranabuhanga mu gucunga umutekano w’abaturage ndetse hari n’abamaze gutabwa muri yombi.

Mu mezi nk’ane ashize inzego z’ubukerarugendo muri Beijing zashyizeho ikoranabuhanga rigezweho rikoresheje imboni y’ijisho mu kugena umubare ntarengwa w’impapuro z’isuku zikoreshwa mu bwiherero, mu gukumira abazibaga ndetse n’abazikoreshaga basesagura.

Mu Bushinwa hatangijwe uburyo bwo kwishyura muri restaurant hifashishijwe isura

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza