U Busuwisi bugiye gushyiraho itegeko ryo guteka Inigwahabiri zitabanje kubabazwa

Yanditswe na Mukaneza M.Ange
Kuya 4 Mutarama 2017 saa 01:40
45 30

Nyuma yo kubona uburyo imitekere y’udukoko two mu bwoko bw’inigwahabiri tuzwi nka ’Homard’ ituma dupfana ububabare bukabije, abantu batandukanye mu Busuwisi bari mu biganiro mpaka bigamije kureba uburyo hashyirwaho itegeko rigena uburyo utwo dukoko twatekwa tutababajwe.

Ubusanzwe iyo umuntu agiye guteka utu dukoko tuboneka mu nyanja, abanza gushyushya amazi yamara kwatura(kubira) bakatujuganyamo tukiri tuzima.

Abashinzwe kurengera inyamaswa mu Busuwisi bavuga kuba Inigwahabiri zidafite ubushobozi bwo gutaka, bidakuraho ko zumva ububabare.

Bemeza ko izi nigwahabiri zifatwa zikamara iminsi zitararibwa zashyizwe ahantu hakonje cyane nta mazi cyangwa ibiribwa zibona, barangiza ibyo bakazishyira mu mazi ashyushye cyane mu gihe cyo kuziteka.

Ikinyamakuru Le Temps cyandikirwa mu Busuwisi na cyo cyanditse kiti “Inigwahabiri ntizibasha gutaka iyo zishyizwe mu mazi yabize, ariko ibyo ntibivuze ko zitagerwaho n’ingaruka, bityo zikwiye kwitonderwa.”

7sur7 dukesha iyi nkuru ivuga ko ibi ari byo byatumye bategura umushinga w’itegeko rigena imitekere y’utu tunyabuzima, ituma tudahura n’ububabare.

Muri uyu mushinga w’itegeko bifuza ko ryashyirwaho, hagenwa uburyo bwo kugabanyiriza ububabare utu tunyabuzima binyuze mu kubanza kutwica mbere y’uko dushyirwa mu mazi ashyushye. Mu buryo bubiri buteganywa kwifashishwa, harimo imashini yica utu dukoko hakoreshejwe umuriro w’amashanyarazi(Crustastun) cyangwa se hagakoreshwa icyuma.

Abaharanira uburenganzira bw’inyamaswa mu Busuwisi bavuga ko ibi nibiramuka bidakurikijwe, bazarwana urugamba rwo gukumira ko ‘Homard’ zinjizwa muri iki gihugu ari nzima.

‘Homard’ n’ubundi bwoko butandukanye bw’inigwahabiri, ni zimwe mu nyamaswa Ishami rya Loni rishinzwe Ubuhinzi n’Ibiribwa ku Isi (FAO), rishishikariza abantu kurya kuko zifite intungamibiri zafasha mu kurwanya indwara zituruka ku mirire mibi.

Homard ni kamwe mu dukoko two mu bwoko bw'Inigwahabiri dufite intungamubiri

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE