U Bwongereza: Bwa mbere umuyisilamu yasezeranye n’uwo bahuje igitsina

Yanditswe na Mukaneza M.Ange
Kuya 12 Nyakanga 2017 saa 12:42
Yasuwe :
0 0

Umugabo witwa Jahed Choudhury usanzwe asengera mu idini ya Islam yabaye umuyisilamu wa mbere mu Bwongereza usezeranye imbere y’amategeko na mugenzi we bahuje igitsina.

Choudhury w’imyaka 24 yakuze atotezwa n’abayisilamu bagenzi be kubera ko yakundaga abo bahuje igitsina, ndetse akaba yarigeze koherezwa gukora urugendo rutagatifu ngo abashe guhindura ibijyanye n’ibyiyumviro agirira abagabo bagenzi be.

Mu myaka ibiri ishize ni bwo Choudhury wari urambiwe kwirirwa atotezwa yafashe umwanzuro wo kwiyahura, atabarwa na Sean Rogan w’imyaka 19 wamusanze yicaye ku ntebe mu gace ka Darlaston ari kurira.

Daily Mail dukesha iyi nkuru ivuga ko yahise atangira kumuhumuriza ndetse nyuma y’igihe gito batangira gukundana, kugeza ubwo basezeranye kubana akaramata mu bukwe bwabereye ahitwa Walsall, bose bambaye umwambaro gakondo wo muri Bangladesh ndetse umwe yisize amarangi akunze gusigwa abageni.

Nubwo aba bombi ngo babanye mu byishimo ariko ni kenshi bagiye baterwa ubwoba ko bazicwa. Ku munsi w’ubukwe bwabo basabye abantu bari mu bibazo nk’ibyabo kwihangana no kwereka isi yose ko ushobora kuba umutinganyi kandi ukaba n’umuyisilamu nyawe.

Choudhury ufite inkomoko muri Bangladesh ni umwe mu bayisilamu bake beruye ku mugaragaro ko ari abatinganyi, ndetse akaba ari na we wa mbere mu Bwongereza usezeranye n’umugabo mugenzi we byemewe n’amategeko.

Ubukwe bw’aba bagabo bombi bwitabiriwe n’ababyeyi, abavandimwe n’inshuti zabo, nyuma yo gusezerana Rogan akaba yaremereye Choudhury ko agiye guhindura idini akinjira mu bayisilamu.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza