Ubuzima bushaririye bw’abagore bakora igisirikare muri Koreya ya Ruguru

Yanditswe na Zigiranyirazo Bajecteur
Kuya 25 Ugushyingo 2017 saa 02:50
Yasuwe :
0 0

Mu gisirikare cy’ibihugu byinshi ku isi hakunze kugaragaramo umubare muto w’abagore. Gufata umwanzuro wo kujya mu gisirikare si buri wese upfa kubyisukira kuko ukunze gufatwa n’abantu bakunda igihugu by’ukuri baba biteguye no kugipfira.

Muri Korea ya Ruguru, igihugu cyamamaye kubera Perezida Kim Jong-un, utajya ujenjeka mu myanzuro ikakaye kenshi na kenshi iba inabangamiye ikiremwamuntu, abagore bari mu gisirikare cy’icyo gihugu ngo babayeho mu buzima bushaririye aho bahohoterwa kugera ku rugero batakibasha kujya imugongo.

Lee So Yeon wigeze kukibamo ariko akaza kukivamo yavuye imuzi uko abari n’abategarugori bafatwa mu gisirikare ndetse n’uburyo uburenganzira bwabo buhonyorwa.

So Yeon yasezeye mu gisirikare afite imyaka 28. Yakoraga mu gashami gaherereye hafi y’umupaka wa Koreya y’Epfo, aho yageragereje gutoroka mu 2008 ariko ntiyahirwa.

Ku nshuro ya kabiri nyuma yo kuva muri gereza, yanyuze mu mugezi wa Tumen ajya mu Bushinwa aho yavuye acikishirizwa muri Koreya y’Epfo.

Mu buhamya bwa Lee So Yeon winjiye mu gisirikare cya Korea ya Ruguru afite imyaka 17, avuga ko mu ntangiriro yafatwaga neza kugeza ubwo yanahawe bimwe mu bikoresho bizajya bimufasha gutunganya umusatsi we ariko nyuma ubuzima bukaza gusharira aho avuga ko abagore bo muri icyo gihugu bahohoterwa cyane n’abasirikare bakuru haba mu kubakoresha imibonano mpuzabitsina y’agahato ya buri gihe ndetse no kubakoresha imyitozo ikakaye cyane yangiza umubiri.

So Yeon ufite imyaka 41 aracyari umukobwa avuga ko yinjiye mu gisirikare abitewe no gukunda igihugu gusa avuga ko abagore babarirwa mu bihumbi bari mu gisirikare cya Korea ya Ruguru bahura n’akaga gakomeye karimo kwimwa ibiryo no gukoreshwa imyitozo ndengakamere.

Yatangarije BBC ko iyi myitozo ituma nyuma y’amezi atandatu umugore winjiye mu gisirikare cya Korea ya Ruguru aba atakijya imugongo bitewe n’ubuzima bushaririye aba abayemo.

Abenshi binjiye mu gisirikare mu byo bari bakurikiranye harimo n’ibyo kurya bihoraho mu myaka ya 1990 ubwo Koreya ya Ruguru yari yugarijwe n’inzara.

Bamwe mu bagore bari mu gisirikare cya Korea ya Ruguru bo bavuga ko ngo kuba batakijya imugongo ari amahirwe bagize kuko ngo byari kubabera bibi kurushaho iyo bikomeza kubaho banakoreshwa imyitozo ikakaye bene ako kageni.

Akomeza avuga ko mu bihe bigoye bagira harimo kuba batabasha koga n’aho babiboneye bagasabwa koga hifashishijwe imipira itwara amazi iba icometse ahantu hanashobora kuziramo inzoka n’ibikeri.

So Yeon yatangaje kandi ko ngo hari ubwo abagore bajya mu gisirikare bumva imirimo yabo ari ugufasha abasirikare mu bijyanye no guteka no kubategurira ariko bageramo bakahasanga ibitandukanye.

Uyu mukobwa ukuze ngo nubwo nta hohoterwa nk’iri yakorewe kuva mu mwaka wa 1992 kugeza mu 2001 ariko ngo bagenzi be bari baragowe.

Abasirikare bagerageza kurasa igisasu gihanura indege ubwo bari mu Majyaruguru y'Umujyi wa Pyongyang
Imyitozo ikorwa n'abagore b'abasirikare iba ikomeye mu gihe bo batekereza ko bagakwiye guhabwa imirimo itavunanye
Lee So Yeon yinjiye mu gisirikare nk'umukorerabushake avuga ko bagenzi be bahuraga n'akaga gakomeye
Nyuma y'amezi atandatu, abagore bo mu gisirikare ntibaba bakijya mu mihango kubera kurya nabi no gukoreshwa imyitozo ikakaye

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza