Ubuzima bwa ‘Kabwana’ wavukanye ubumuga n’impano yo kumenya ingengabihe mu mutwe

Yanditswe na Thamimu Hakizimana
Kuya 11 Nyakanga 2017 saa 11:33
Yasuwe :
0 0

Mukeshimana Louis bakunze kwita “Kabwana” ni umugabo w’imyaka 47, wavukije i Bujumbura mu 1970, ufite impano idasanzwe yo kumenya ingengabihe mu mutwe.

Atuye mu Murenge wa Rwezamenyo mu Karere ka Nyarugenge, ariko yavukanye ubumuga bw’ingingo. Ni umwe mu bakunze kwibazwaho na benshi bitewe n’impano zitandukanye afite.

Kabwana yikundira kunywa agasembuye, iyo umusuye mukaganira ukabona imibereho ye, uratungurwa ukanamugirira impuhwe cyane cyane bitewe n’uburyo abasha kwitunga kandi yaravukanye ubumuga.

Bimwe mu bikunze gutangaza benshi kuri we ni uburyo afite ubushobozi bwo kumenya ingengabihe no gufata nimero za telefone zose z’abantu azi mu mutwe ndetse no kudapfa kwibagirwa.

Aganira na IGIHE, Mukeshimana yavuze ko n’ubwo yavukanye ubu bumuga, ku bwe anishimira ko hari impano yavukanye zidasanzwe kuko zituma abasha gusunika iminsi.

Yagize ati “Nubwo meze gutya, ntabwo bimbangamira cyane kuko n’Imana yandemye hari impano yanyihereye abandi badafite kandi imfasha gutuma mbona icyo kurya.”

Yakomeje avuga ko kuba abasha gufata nimero za telefone z’abantu bose azi mu mutwe no kumenya ingengabihe y’imyaka yose bimufasha cyane mu mibereho ya buri munsi.

Yagize ati “Urebye kuba nshobora kubwira umuntu itariki y’umunsi wo mu mwaka runaka ntaho ndi kubireba bituma mbasha kubaho kuko hari abagiraneza mbibwira bagahita bampa amafaranga, ku buryo ayo bampa ariyo nkuramo n’ayo kurya cyangwa kwishyura inzu ncumbitsemo.”

Mukeshimana anemeza ko iyi mpano yavukanye ituma byibuze ku kwezi abasha kubona amafaranga ibihumbi 20 by’ubukode n’andi yo guhaha.

Gusa ashimangira ko ababazwa cyane n’uburyo umuryango we wibera i Burundi urimo nyina n’abavandimwe be usa nk’uwamuhaye akato ukaba ntacyo umufasha kandi bafite ubushobozi.

Incamake y’ikiganiro Kabwana yagiranye n’Umunyamakuru wa IGIHE

Umunyamakuru: Tariki ya 10 Mutarama mu 2022 hazaba ari ku wa kangahe?

Mukeshima: Ku wa Mbere

Umunyamakuru: Tariki ya 20 Ukuboza 2019, hazaba ari ku wa kangahe?

Mukeshimana: Bizaba ari ku wa Gatanu

Umunyamakuru: Ubunani bwo mu mwaka utaha buzaba ari ku wuhe munsi? kangahe?

Mukeshimana: ubunani bw’umwaka utaha buzaba ari ku wa Mbere.

Mukeshima yasoje avuga ko afite gahunda yo gushakisha uburyo yazubaka inzu, kugira ngo atandukane n’ubuzima bwo gukodesha cyane cyane ko kubona amafaranga yo kwishyura bimugora.

Mukeshimana uzwi nka Kabwana yavukanye ubumuga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza