Uko gufata umwanya ukajya ahantu hatuje bishobora guhindura ubuzima bwawe

Yanditswe na Rabbi Malo Umucunguzi
Kuya 21 Ukuboza 2016 saa 04:05
Yasuwe :
0 0

Abahanga mu mitekerereze bagaragaza ko gufata umwanya ukitekerezaho kandi ukagerageza kwiremamo ibyiyumviro bizima, bishobora gufasha umuntu guhindura uburyo yitwara ndetse n’ibyifuzo agirira abandi, bikanamufasha kugera ku kuri n’ubuzima bwiza kurushaho.

Umuryango Mpuzamahanga Brahma Kumaris uharanira amahoro ku Isi ushingiye ku mpinduka z’umuntu ku giti cye, wifashisha kujya ahantu hacecetse ukayobora ibyiyumviro by’abantu (meditation), nk’uburyo bwo kwiyubakamo umunezero, urukundo no kugira impagarike n’ubugingo.

Ibyo ngo bifasha gusobanukirwa imbaraga z’ibitekerezo n’impinduka ziterwa n’imyumvire yubaka, kwiga kuyobora ibitekerezo n’amarangamutima aheza, kwirinda ibitekerezo bisenya, gutsinda uburakari, inabi no kudatuza, harimo no kwiga kubabarira bivuye ku mutima.

Umuyobozi wa Brahma Kumaris muri Afurika Vedanti, avuga ko ubu buryo hari henshi bwagiye butanga umusaruro mu guhindura intekerezo za benshi, bukaba bunigishwa ku buntu mu bihugu bisaga 40 bya Afurika.

Ati “Twizera cyane umutuzo, ufite imbaraga nyinshi kurusha siyansi. Ahantu dukorera ku Isi, buri muntu twigisha tumusaba kubyuka kare, saa cyenda, saa kumi za mu gitondo, akicara iminota 45 ayobora ibitekerezo bye. Ukabanza ugatekereza ibintu byiza, bikagufasha kugera ku kuri kandi ukoresheje imbaraga z’umutuzo gusa.”

“Siyansi iri kwihuta cyane, ariko nk’umuntu uvumbura uri siyansi, ni wa wundi wicaye mu nguni ahantu atuje. Natwe nibyo turi gukoresha. Newton ajya kuvumbura itegeko ry’imbaraga zituma ikintu kibasha kugwa ku Isi yari yicaye munsi y’igiti, abona urubuto rurahanutse, yibaza impamvu ruje hasi ntiruzamuke rujya hejuru. Izo nizo mbaraga z’umutuzo.”

Vedanti avuga ko bitabira ibikorwa by’uyu muryango bibafasha guhindura imibereho yabo binyuze mu gufata umwanya uhagije wo gutekereza ibintu byiza, bakerekeza umutima ku Mana, bigahindura imitekerereze yabo ndetse no mu mikorere ye ugasanga batanga umusaruro.

Ubu buryo bwatangiriye mu Buhinde, ariko no mu Rwanda burigishwa kandi ku buntu, ku buryo izi nyigisho zimaze kugera ku basaga 1000.

Nk’igihugu cyabayemo Jenoside, ibi bikorwa byafasha benshi kwiyongeramo imbaraga zo kwivana mu kababaro bakareba imbere.

Vedanti ati “Nk’u Rwanda rushya icyo dukeneye ni ukubiba ibyishimo, ibyabaye byarabaye. Nta nyungu tugifite mu kuguma ahahise. Kuki tutategura ahazaza? Byabaye ingaruka z’abantu babi zigera ku bantu benshi, kandi ugasanga igitekerezo cyatangiriye mu muntu umwe. Ubu turi kubiba imbuto nziza ku buryo ibikorwa bya none biba ibihesha ishema u Rwanda mu mahanga. Ni kureba uko Abanyarwanda bakomeza gukora ibyiza bihesha ishema u Rwanda.”

Brahma Kumaris Seeta uyobora uyu muryango mu Rwanda, avuga ko bagiye bakora gahunda nyinshi zigamije guhindura imyumvire kandi bikaba byaratanze umusaruro.

Uyu muryango watangiriye mu 1937 mu Buhinde, mu zindi nshingano ukaba ufasha mu kubaka umuryango unezerewe wubakiye ku kwizerana no kubahana, hamwe n’urukundo rushingiye ku ndangagaciro.

Aho abanyarwanda batandukanye baherwa inyigisho
Umuyobozi wa Brahma Kumaris ari aho batangira inyigisho zo kubaka amahoro mu Mujyi wa Kigali
Umuyobozi wa Brahma muri Afurika ari kumwe na Seeta uwuyobora mu Rwanda

Urifuza kuduha amakuru? Hamagara iyi nimero 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza