Umukino wa PSG na Real Madrid, impano wagenera umukunzi kuri St Valentin

Yanditswe na Mukaneza M.Ange
Kuya 13 Gashyantare 2018 saa 10:16
Yasuwe :
0 0

Gukunda no gukundwa ni kimwe mu bintu byiza bishobora kuba ku muntu, bikarushaho guhebuza iyo ukunzwe n’uwo umutima wawe wihebeye, kuko biguha urwibutso rutazigera rusibangana mu buzima bwawe.

Ikikwereka ko urukundo ari igitangaza ni uko benshi mu bakundana hirya no hino ku Isi, bafite byinshi bibatandukanya birimo umuco n’imyemerere, usanga bagira umunsi wihariye barwizihirizaho, ariwo tariki ya 14 Gashyantare buri mwaka.

Uyu mwaka ni agahebuzo kuko umupira w’amaguru abagore n’abakobwa binubira kenshi ko wiharira umwanya munini w’abakunzi babo, ushobora guhinduka impano itazibagirana ya St Valentin bashobora kubagenera.

Mu gihe umugabo cyangwa umusore mukundana akomeje kubunza imitima yibaza icyo azahitamo hagati yo gusangira n’umukunzi we, cyangwa kureba umukino wa Champions League uzahuza Real Madrid na Paris Saint Germain (PSG) yo mu Bufaransa, nta cyamutungura ndetse kikamushimisha nko kumva umusabye ko mwazajyana kuwureba.

Umukino uzahuza Real Madrid na PSG uteganyijwe ku mugoroba wo kuri uyu wa Gatatu, ku ya 14 Gashyantare saa 21:45 ku isaha z’i Kigali.

Real Madrid itozwa n’Umufaransa Zinedine Zidane ifite akazi katoroshye imbere ya PSG yaguze abakinnyi bakomeye barimo Kylian Mbappé wavuye muri AS Monaco na Neymar Junior Santos waguzwe muri FC Barcelona miliyoni £198.

Iyi kipe y’i Bwami idahagaze neza muri Shampiyona ya Espagne “La Liga” kuko iri ku mwanya wa kane aho irushwa na Barcelona amanota 17.

Real Madrid ifite ibikombe bitatu bya Champions League muri bine biheruka izaba ihanganye na Paris St Germain itozwa n’Umunya-Espagne, Unai Emery.

PSG yasezereye Real Madrid mu mikino ibiri ya ¼ irimo uwo mu 1992/93 muri UEFA Cup no mu 1993/94 muri Cup Winners Cup.

Mu gihe imaze itozwa na Zinedine Zidane, Real Madrid yatsinze imikino 10 muri 14 mu cyiciro cyo gukuranamo, itsindwa ibiri inganya indi ibiri. Muri uru rugendo igera kuri itandatu mu yo yakiriye kuri Santiago Bernabeu yayitsinze.

Real Madrid ifite amateka yo kuba imaze kugera muri 1/2 inshuro zirindwi ziheruka muri Champions League, amateka iyi kipe yihariye.

Mu mwaka ushize, Real Madrid yabaye ikipe itwaye igikombe yarasoje imikino y’amatsinda iri ku mwanya wa kabiri nyuma ya Inter Milan yabigezeho mu 2010.

Paris St Germain yashyizeho agahigo muri iri rushanwa ko gusoza imikino y’amatsinda ifite ibitego 25.

Kugira ngo abakundana barusheho kuryoherwa, uyu mukino uzahuza amakipe afite ibigwi ku mugabane w’u Burayi, bashobora kuwurebera kuri Pili-Pili, akabari gaherereye Kibagabaga hafi y’ibitaro.

Uretse kuba Pili-Pili yarateguye ahantu hihariye abakundana bazarebera uko Cristiano Ronaldo wa Real Madrid azaba ahanganye na Neymar wa PSG mu rugendo rwo guhatanira igikombe cy’amakipe ya mbere ku mugabane w’u Burayi, hari n’ibindi byinshi nk’ibiribwa n’ibinyobwa bizatuma St Valentin ya 2018, idasibangana mu mitima yabo.

Nyuma y’uyu mukino abakundana bazareba mu buryo bwihariye, hari n’ibindi birori bitandukanye byagiye bitegurwa hirya no hino mu Mujyi wa Kigali birimo ikizabera Park Inn Hotel cyiswe ‘All You Need Is Love’, aho bazasubizwa mu bihe bya kera, bakongera kumva no kwibyinira nyinshi mu ndirimbo z’urukundo zakanyujijeho.

Umutoza wa Real Madrid, Zinedine Zidane ashobora kujya mu mazi abira mu gihe atasezerera PSG
Aba bakinnyi batatu bamaze kwandika izina ku ruhando rw'i Burayi
Kylian Mbappé, Neymar Junior Santos na Edinson Cavani bayoboye ubusatirizi bwa PSG
Umufaransa Zinedine Zidane ashobora kwifashisha ubusatirizi buyobowe na Cristiano Ronaldo, Gareth Bale na Karim Benzema
Muri Pili-Pili Bar hari amafunguro meza waha umukunzi wawe kuri St Valentin
Muri Pili-Pili Bar hari ahantu ho kuruhukira neza witegeye imisozi ya Kigali

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza