Umunyamakuru wa CNN yashyize hanze amashusho asakwa mu myanya y’ibanga

Yanditswe na Mukaneza M.Ange
Kuya 21 Ukuboza 2016 saa 10:01
Yasuwe :
0 0

Angela Rye, umunyamakuru wa televiziyo ya CNN ikorera muri Leta Zunze Ubumwe za Amerika, yashyize hanze amashusho amugaragaza ari gusakwa n’abashinzwe umutekano ku kibuga cy’Indege, kugeza ubwo akozwe no ku myanya y’ibanga.

Abinyujije ku rubuga rwe rwa Twitter, Rye w’imyaka 37 yavuze ko ibi byabaye mu cyumweru gishize ubwo yari ku kibuga cy’indege muri Detroit muri leta ya Michigan.

Uyu munyamakuru avuga ko nyuma yo kunyura mu byuma bisaka umubiri wose, ngo yaje gutungurwa no gusabwa kwegera imbere kugira ngo yongera asakwe n’umukozi w’urwego rushinzwe umutekano aho ng’aho(Transportation Security Administration, TSA), kugira ngo barebe ko nta kidasanzwe yitwaje.

Nk’uko abisobanura mu nyandiko yanyujije kuri CNN, Angela ngo yabwiye umukozi wa TSA ko atakwemera gusakwa mu myanya y’ibanga undi amubwira ko yabireka aramutse ahawe amabwiriza n’umukuriye.

Ati “Nta kintu na kimwe nari nitayeho, uretse ahantu hamwe ku mubiri wanjye. Nababwire ndakaye nti ’murabizi ko mutari bunkorere ku gitsina’? Ariko ibyo ntibyabaye.”

Nyuma yo gukomeza kwinginga ndetse agasaba ko yakongera akanyura mu cyuma gisaka (scanner), kuko atashakaga ko bamusaka mu myanya y’ibanga, ariko bamubera ibamba bamubwira ko nareba nabi indege yerekeza New York iri bumusige.

Rye avuga ko yanagerageje kubasaba gufata ifoto igaragaza udukarito dutatu tw’umuhondo, bavugaga ko Scanner yabonye hagati y’amaguru ye nabyo barabyanga.

Ati “ Mu by’ukuri ntibigeze babyemera. Uwo muyobozi yahamagaye polisi ngo insohore hanze y’ikibuga cy’indege, ariko k’ubw’amahirwe nabonye umu-ofisiye wabashije kumva amarira yanjye.”

Uyu mugore waje kwemera gusakwa, yabanje gusaba ko wa mu polisi afata amashusho ndetse agasakirwa mu ruhame abantu bose babireba.

Amashusho yashyizwe hanze agaragaza umugore ukorera TSA ari gusaka Rye kuva ku musatsi kugeza naho asa nuzamura amaboko imbere mu ikanzu yari yambaye ndetse amukora ku myanya y’ibanga inshuro ebyiri, undi agasa n’usimbuka yikanga.

Gukorwa ku myanya y’ibanga byatumye Rye ananirwa kwihangana maze amarira atangira gushoka.

Uyu mugore avuga ko asanzwe akora ingendo z’indege inshuro nyinshi, ariko ngo ni ubwa mbere ibi byari bimubayeho, ku buryo avuga ko bibabaje cyane.

Uyu mugore avuga ko yahisemo gusangiza bagenzi be aya mashusho kuko atiyumvisha uko abahuye n’ihohoterwa rishingiye ku gitsina baba bameze iyo basatswe muri ubu buryo, ndetse ko bitari bikwiye.

Yavuze kandi ko yizeye ko ayo mashusho azatuma hagira igikosorwa mu mikorere y’urwego rwa TSA, mu bijyanye no gucunga umutekano.

Si ubwa mbere abakozi bashinzwe gusaka abagenzi ku bibuga by’indege muri Amerika bavuzweho kurengera kuko no mu 2012 hari umugabo witwa John Brennan wigeze kwigaragambya yambaye ubusa nyuma yo kubwirwa ko yitwaje ibiturika.

Angela Rye yasatswe umubiri wose
Rye yasatswe no mu myanya y'ibanga, ibintu byamubabaje bikomeye ndetse anasuka amarira
Nyuma yo gusakwa mu myanya y'ibanga, Rye yararize agaragaza agahinda k'ibyo yakorewe n'abashinzwe umutekano

Reba video y’uko yasatswe

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza