Umwana wabumbye Kigali Convention Centre yayitemberejwemo, hanatangazwa irushanwa ryamwitiriwe

Yanditswe na IGIHE
Kuya 9 Nyakanga 2017 saa 01:26
Yasuwe :
0 0

Byari ibyishimo bisa kuri Gisa Gakwisi Didier w’imyaka 13,nyuma yo kuzengurutswa inyubako ya Kigali Convention Centre (KCC) agenda yinjira mu cyumba ajya mu kindi, inyubako amaze imyaka arebera inyuma gusa atarabasha kuyikandagiramo.

Ni inzozi akabije nyuma y’ifoto yakwirakwiye ku mbuga nkoranyambaga mu kwezi gushize, igaragaza umwana w’umuhungu yicaye iruhande rw’ikibumbano kiri mu isura y’inyubako ya KCC yatashywe muri Nyakanga umwaka ushize, ikuzura itwaye miliyoni 300 z’amadolari ya Amerika.

Igitangaje ni uko umwana wagaragaye ku ifoto yamenyekanye cyane atari Gisa nubwo cyari igihangano cye, ahubwo uwariho ni umwana baturanye witwa Uwikunda bakunze kwita Gasore. Batuye mu Karere ka Gasabo, Umurenge wa Kimihurura mu Kagari ka Rugando, mu Mudugudu wa Gasasa.

Umuyobozi ushinzwe kumenyekanisha ibikorwa bya Kigali Radisson Blu & Convention Centre, Hanna Moges yabwiye itangazamakuru ko babonye icyo gihangano bakifuza guhura n’uwagikoze, niko kwifashisha imbuga nkoranyambaga ngo babashe kubona uwo mwana.

Yagize ati “Uyu munsi twamutumiye ngo ahasure n’umuryango we. Twamuteguriye impano, ibikoresho ashobora kwifashisha mu guteza imbere impano yifitemo n’ibindi bikoresho byo kumufasha ku ishuri. Ikirenze ibyo, tugiye gutegura irushanwa rizamwitirirwa rizajya rifasha abandi bantu bo ku kigero cye kugaragaza ubuhanga mu bugeni.”

Ni irushanwa ngo rizatangira vuba, igihe nyacyo kikazatangazwa hamaze kunozwa neza uko rizaba riteye, rikazatuma ubuhanga bwa Gisa buvugwa imyaka myinshi.

Nyuma yo gutembera muri KCC, Gisa yavuze ko yishimye cyane kuba ayinjiyemo, ariko yasanze hari ibyo atabashije gushyiraho neza kuko yari atarayigeramo.

Yagize ati “Ntabwo nari narahageze, nta n’ibikoresho byinshi nari mfite. Nk’uko nabibonye, nimbona ibikoresho nzahita mbyongeramo, nk’amakaro n’ibirahuri. Ubusanzwe kubumba ni ibintu nkunda, kuva kera narabikoraga. Hari n’ibindi nagiye mbumba nka Stade amahoro.”

Se w’uyu mwana, Gakwisi Mvunabandi, yatangaje ko asanzwe agaragaza impano yo kubumba ibintu binyuranye, ndetse ngo ashobora kuba abikomora mu muryango we.

Yagize ati “Mu rugo twari dusanzwe tubizi ko abikora, kuko twigeze kujya i Gikondo mu imurikagurisha abonye umuntu ugendera ku ifarashi ahita amubumba, amushyiraho inkweto n’ibindi byose.”

“Bimuri mu maraso kuko na mukuru wanjye yajyaga abikora ariko kubera gutura mu cyaro ntacyo yigeze abikuramo. Yajyaga abaza utuntu dutangaje ku buryo abantu batambukaga bagahagarara.”

Mvunabandi avuga ko yiteguye gushyigikira impano y’umuhungu we uko abishoboye, nubwo umuryango we udafite ubushobozi bugaragara kuko babayeho mu buzima buciriritse.

Aha ni mu cyumba AD 12, kimwe mu biberamo inama muri KCC
Gisa hamwe n'ababyeyi be bari muri Auditorium ya KCC
Gisa n'ababyeyi be mu byishimo
Ababyeyi ba Gisa nabo bagize amahirwe yo kwinjira muri KCC kubera umuhungu wabo
Gisa n'ababyeyi be muri Auditorium
Gasore ku ifoto yamenyekanye cyane, nubwo igihangano cyari icya Gisa
Gisa ahagaze imbere muri hotel, aho bakirira abakiliya
Gisa yari ageze mu cyumba kiberamo inama zikomeye, yitegereza amatara yo hejuru
Gisa yatemberejwe muri Convention Centre, agenda yerekwa ibyumba bitandukanye biberamo inama
Gisa ni umwana ubona ko yihagazeho n'ubwo imyaka ye itari myinshi
Gisa ni uwa Kane mu bana batanu, none abahesheje amahirwe yo kwakirwamuri KCC
Gisa n'umubyeyi bakiranywe urugwiro n'abakozi ba Radisson Blu
Gisa yagiye anyuzamo akitegereza igisenge cy'iyi nyubako
Gisa yakabije inzozi ze
Gisa yakiriwe na Hanna Moges
Hejuru uri KCC, hari aho ushobora kwicara witegereza ibyiza bitatse u Rwanda
Iki cyumba nicyo cyakira inama zikomeye
Imbere muri Radisson Blu Gisa yahageze ntibikiri ukuyibumba atarayinjiramo
Gisa ari imbere ya Kigali Convention Center
Ku muryango ucyinjira neza muri Hotel Radisson Blu
Gisa yitegereza ubona ko amatsiko ari yose

Amafoto: Mahoro Luqman


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza