Izina rya Minisitiri w’Intebe w’u Bufaransa ryitiranwa n’igitsina mu cyarabu

Izina rya Minisitiri w’Intebe w’u Bufaransa ryitiranwa n’igitsina mu cyarabu


Yanditswe kuya 19-05-2012 - Saa 09:29'

Abanyamakuru bavuga ku maradiyo n’amateleviziyo yo mu bihugu bivuga icyarabu, bakomeje guterwa imbogamizi no kuvuga izina rya Minisitiri w’Intebe mushya w’igihugu cy’u Bufaransa, bitewe n’uko mu rurimi rw’icyarabu gikunze gukoreshwa, ryitiranwa n’igitsina cy’umugabo.

“Jean Marc Ayrault”, niyo mazina ya Minisitiri w’intebe mushya, w’ubufaransa.
Iri zina “Ayrault” risomwa nka “Ayiro” mu rurimi rw’icyarabu rukoreshwa mu bihugu byinshi by’abasilamu, baba abarabu ndetse n’abatari abarabu, ubundi rivuga imboro mu mvugo ya giseseka yumvwa na bose.

Nk’uko tubikesha CNN, abavuga amakuru bose haba kumaradiyo n’amateleviziyo yo muri ibi bihugu by’abarabu, bagerageje gushaka uburyo bajya bagoronzora iri zina, bakarisoma bongeyeho inyuguti ya “LT” ubundi itagomba kumvikana mu mategeko y’imisomerwe y’iri zina mu gifaransa.

Ndetse hari n’aho mu bihugu bimwe na bimwe bari kurisoma nka “Arrow” ijambo ry’icyongereza rivuga umwambi, abandi bakongeraho “H” imbere, byose bakabikora mu rwego rwo kwirinda kumvikana nk’abavuga ijambo rya kirazira mu muco wabo rica mu itangazamakuru.

Kubw’ibyo Minisiteri y’ububanyi n’amahanga, y’u Bufaransa, yasohoye itangazo rivuga uburyo nyabwo iri zina rigomba gusomwamo, ivuga ko kurivuga wumvikanisha “H” ahabanza, atari byo , ari ukuryica, aho yatanze ubundi buryo bushobora kwifashishwa n’abo bibangamira mu kurisoma, noneho bakemererwa kumvikanisha “L na T” zisanzwe zirisoza mu myandikire.

N’ubwo u Bufaransa bwabashyiriyeho uburyo bwo kubyoroshya, umuyobozi w’amakuru mu kigo cy’itangazamakuru cya Al-Arabiya, we yavuze ko ubundi iri zina ryakagombye kugumya gusomwa nk’uko risanzwe risomwa mu gifaransa.
Yagize ati : "Ntidushobora guhindura amazina, rero tugomba kureba uburyo duhangana na bene iki kibazo, igihe dusoma amakuru y’ako kanya ariko tukabikora nk’abanyamwuga.”

Nyamara ariko hagati abafaransa nabo bashinjwa kuba barishe izina rya Perezida w’u Burusiya Vladimir Putin, bo bakajya basoma bongeyeho “e” idahari bikumvikana nka “Putine”, kuko basomye batayishyizeho byakumvikana nk’ijambo “putain” ubusanzwe rivuga indaya mu gifaransa.

Mu myaka ibiri ishize ikibazo nk’iki cyari kigeze kubaho, ubwo Pakistan yashakaga kohereza Ambasaderi wayo mu gihugu cya Arabia Saoudite, ariko kubw’izina rye noneho ryo rikaba ryaritiranwaga n’igitsina cy’abagabo muburyo nyirizina bw’ururimi rw’icyarabu, Arabia Saoudite ikamwanga kubw’izina rye gusa.

Nyamara uyu mudipolomate w’umuyapakistan ubu uyihagarariye muri Canada, ubundi yitwa Akbar Zeb, we yahakanye ibimuvugwaho, avuga ko nta mugambi wo kumwohereza muri Arabiya Sawudite wigeze ubaho.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO