Kigali: Telefoni yaturutse i Kinshasa yatumye abageni badasezerana

Kigali: Telefoni yaturutse i Kinshasa yatumye abageni badasezerana


Yanditswe kuya 31-12-2012 - Saa 00:12' na Olivier Muhirwa

Ibi byabereye mu Mujyi wa Kigali muri Paruwasi Gatolika y’Umuryango Mutagatifu aho umukwe n’umugeni bari gusezerana, ariko bikaza kurangira bitabaye kubera telefoni yahamagaye iturutse i Kinshasa ivuga ko aba bageni bafite imiziro itabemerera gusezerana.

Aba bageni tugishakisha amazina yabo byari biteganyijwe ko basezerana ku Cyumweru ku itariki ya 30 Ukuboza 2012, bagasezeranira muri Centre Saint Paul saa cyenda z’amanywa ariko si ko byagenze.

Uko byagenze

Amakuru twahawe na Haganza James, Perezida wa Korali Immaculée Conception y’i Gikondo yari buririmbe mu misa yo gusezeranya aba bageni, avuga ko abayobozi ba Chapelle ya Saint Paul bababwiye ko ubukwe bwasubitswe bitewe n’uko basanze aba bageni bafite imiziro.

Ngo umugabo ukomoka muri Congo Kinshasa yaba yarasezeranye n’undi mugore wari umukobwa wa Mobutu Sese Seko wabaye Perezida w’icyahoze cyitwa Zaïre [ubu ni Repubulika Iharanira Demokarasi ya Congo] bakaza gutandukana.

Nyuma yo gutandukana uyu mugabo ngo yabengutse umukobwa w’Umunyarwandakazi biyemeza kurushinga, icyakora ntibyamuhiriye kuko ubwo bageraga i Kinshasa batewe utwatsi bakabwirwa ko gusezerana bidashoboka; dore ko bamwe bari baratashye ubukwe bwa mbere bw’uyu mugabo bwabereye muri ’Palais du peuple’ i Kinshasa bari bakibyibuka.

Ibi byatumye uyu mugabo yigira inama yo gusezeranira mu Rwanda, kuko n’umugore we wa kabiri ari ho akomoka [akomoka i Gikondo mu Mujyi wa Kigali].

Imyiteguro yarabaye, ndetse kugeza ku munota wa nyuma byari byitezwe ko abageni basezerana.

Haje rero kuza telefoni iturutse muri Diyosezi ya Kinshasa, ivuga ko aba bageni batemerewe gusezerana kuko umugabo afite undi mugore basezeranye uba mu Bubiligi.

Byatumye ubukwe budakomeza nk’uko Padiri wo kuri Paruwasi y’Umuryango Mutagatifu (Saint Famille) Mvuyekure Remy yabitangarije IGIHE.

N’ubwo atari we wari bubasezeranye, Padiri Mvuyekure avuga ko yabashije kumva aya makuru ariko ngo igihe haramuka habonetse ibyangombwa bindi byerekana ko nta miziro ibabuza gusezerana bazasezerana nta nkomyi.

Ubwo twageraga ahari kubera ubukwe, twasanze Korali yari kuririmba mu misa y’ubukwe iri imbere ya Shapeli bari gusezeraniramo. Shapeli yo icyo gihe yari ifunze. Ikindi ni uko aba bageni nta wigeze agera aha bari gusezeranira, yemwe n’abari babaherekeje babimenye hakiri kare banga kwirirwa baza.

Hari andi makuru avuga ko nyuma yo kwangirwa gusezerana abageni bakomeje ibirori byo kwiyakira.

Imiryango ya Shapeli yari ifunze
Abaririmbyi ba Korali Immaculée de Conception y’i Gikondo bahise bitahira

Foto: Olivier Muhirwa

Turacyakomeza kubakurikiranira iyi nkuru.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO