Tariki ya 1 Mata, umunsi ufatwa nk’uwo kubeshya uhohotera bamwe

Tariki ya 1 Mata, umunsi ufatwa nk’uwo kubeshya uhohotera bamwe


Yanditswe kuya 1-04-2013 - Saa 11:52' na Eddie NSABIMANA

Umunsi wo ku wa 1 Mata buri mwaka ni itariki imaze kumenyerwa n’Abanyarwanda bamwe na bamwe ndetse no hirya no hino ku isi nk’umunsi wo kubeshya, ariko ufite n’amateka maremare.

Kugeza ubu abantu bamwe babifashe nk’umuco cyane cyane ku mbuga nkoranyambaga nka Facebook, Twitter n’izindi,

Paul Hakuzimana ukorera mu mujyi wa Kigali, waganiriye na IGIHE avuga ko mu gitondo yatunguwe bamubeshya atarabimenya, ati “Njye nabyutse mu gitondo barambeshya ngo Papa Francis yatangaje ko uruzinduko rwa mbere azakorera muri Afurika azaza mu Rwanda, ngeze no ku kazi nsanga hari umuntu wanditse ngo umutoza w’Amavubi, Milutin ’Micho’ Sredojovic, ngo yirukanywe igitaraganya. Kuko nari ntaramenya iby’uyu munsi hari abo nari maze kubibwira numva ari inkuru ishyushye rwose kubesha si umuco w’abantu bazi ubwenge kuko bishobora kugira ingaruka mbi.”

Hakuzimana avuga ko kuri uyu munsi kubera ko hari abawufata nk’umunsi wo kubeshya, bamwe kwemera ibyo babwiwe nubwo babwizwa ukuri biba bigoye; bityo umuntu akaba yakwibaza uko abantu bawubona cyane cyane Abakristu.

Muri rusange ntitwakwemeza neza ko abafata uyu munsi nk’umunsi wo kubeshya atari Abakristu kuko usanga na bo bari mu bashyira mu bikorwa kubeshya kuri uyu munsi, nyamara umuntu akibaza na none niba uyu munsi bawemera kandi ubusanzwe kubeshya ari icyaha imbere y’Imana, nk’uko bigaragara mu gitabo cy’Iyimukamisiri kigaragara muri Bibiliya ntagatifu ku mategeko 10 y’Imana.


Amateka arebana n’uyu munsi.

Tariki ya 1 Mata benshi bakunze kwita “Poisson d’Avril” mu rurimi rw’Igifaransa yatangiye gufatwa nk’umunsi wo kubeshya mu mwaka w’1594 ku ngoma y’umwami w’Abafaransa Charles IX. Kuri iyi tariki ni ho umwaka mushya watangiriragaho muri iki gihugu bagendeye ku ngengabihe ya Julien “Calendrier Julien” . Abafaransa batangiraga umwaka bishima bahana impano zitandukanye cyane cyane ibyo kurya nk’uko bisanzwe kugeza ubu; ibyo biryo byabaga byiganjemo amafi.

Umwami Charles IX rero aza guhindura iyi tariki aca iteka ko umwaka uzajya utangira ku ya 1 Mutarama ariko ibi ntibyakuraho ko Abafaransa bakomeza kwishimisha ku ya 1 Mata ari nako bakomeza guhana impano; gusa bamwe muri bo batangira guhana impano z’impimbano (bihanywe no kudakoresha ukuri nk’uko byari bisanzwe ) cyane cyane iz’amafi ari na ho izina “Poisson d’Avril” ryakomotse.

Ibi rero byaje kuba akamenyero uko umwaka utashye, ari na ho uyu munsi waje gufatwa nk’umunsi wo kubeshya, biza kugenda bikwirakwira mu bihugu bitandukanye hirya no hino ku isi nk’Ubuholandi, Suede, Portugal, Leta Zunze Ubumwe z’Amerika n’ahandi hirya no hino ku isi harimo n’u Rwanda.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO