Icyo RDB isaba abaguze amazu mu Mudugudu wa Hill View Estates

Nyuma y’aho abatuye mu mudugudu wa Hill View Estates uherereye mu Murenge wa Masaka mu Karere ka Kicukiro mu Mujyi wa Kigali bakomeje kwinubira uburyo bahugujwe na Sosiyete DN International ihagarariwe na Nathan Lloyd, ubu Leta ibinyujije mu Kigo cy’Igihugu cy’Iterambere RDB iravuga ko yahagurukiye kureba uburyo iki kibazo cyakemuka ariko kandi ikanagira ibyo isaba abaguze ayo mazu.

Itangazo dukesha Ubuyobozi bw’Ikigo cy’Igihugu cy’Iterambere RDB riravuga ko nyuma y’ibirego byagaragajwe n’abaguzi b’amazu ndetse na ba nyiri amazu aherereye mu mudugudu wa Hill View Estates i Masaka, Guverinoma y’u Rwanda iri kugerageza gushaka igisubizo kizafasha abantu bose barebwa n’icyo kibazo.

Iri tangazo rikomeza rivuga ko Ikigo cy’Igihugu gishinzwe Iterambere kigira inama abantu bose kutagira ibikorwa bajyamo birebana no kugura cyangwa kugurisha amazu ya DN International cyangwa na Nathan Lloyd, haba mu birebana n’amazu ari mu mudugudu wa Hill View Estates cyangwa hanze yawo, keretse bibaye mu rwego rwo gukemura iki kibazo kandi bikamenyeshwa umwanditsi mukuru w’ibigo by’ubucuruzi (Registrar General) kugeza iki kibazo gikemuwe.

RDB kandi nk’Ikigo cy’Igihugu gifite mu nshingano zacyo kurengera inyungu z’abashoramari kikanakumira icyahutaza ubuzima bw’abakorana nabo bose, irasaba abantu bose kwihangana mu gihe barimo kureba uburyo cyakemurwa byihutirwa ; ariko na none igashimangira ko abantu bazarenga kuri ibi byavuzwe muri iri tangazo bazirengera ingaruka zabyo.

Hejuru ku ifoto hari amwe mu mazu yubatswe mu Mudugudu wa “Hill View Estates” i Masaka

Inkuru byerekeranye

Ku nshuro ya 2 hasubitswe cyamunara y’amazu y’i Masaka
  http://igihe.com/spip.php?article18233

Masaka : N’ubwo bishyuye akayabo ku mazu agezweho, Fina Bank igiye kuyateza cyamurana
  http://igihe.com/spip.php?article15185

Kubera uburiganya yakoreye abaguze amazu ye, Nathan Lloyd yatawe muri yombi
  http://igihe.com/spip.php?article15268

Itangazo dukesha Ubuyobozi bwa Rwanda Development Board.