Ibitangazamakuru bizashyirirwaho urubuga rwo kumenya ibibera mu matora ku buryo bungana

Yanditswe na Kanamugire Emmanuel
Kuya 11 Nyakanga 2017 saa 11:39
Yasuwe :
0 0

Komisiyo y’Amatora yatangaje ko mu gihe u Rwanda rugiye kwinjira mu matora y’Umukuru w’Igihugu ateganyijwe muri Kanama uyu mwaka, ibitangazamakuru byose byaba ibya leta n’ibyigenga bizashyirirwaho urubuga rwo kumenya ibiyaberamo mu buryo bungana.

Komisiyo y’Amatora yari isanzwe yifashisha Radio na Televiziyo by’Igihugu mu gutangaza ibyavuye mu matora haba mu buryo bw’agateganyo cyangwa bwa burundu, ibindi bitangazamakuru bikaba ari ho biyavoma.

Mu nama yabaye kuri uyu wa 11 Nyakanga 2017, yahuje inzego zirimo Polisi y’u Rwanda, RURA, RMC, MHC, Minisiteri y’Ubutabera, Komisiyo y’Amatora n’izindi, yiga ku buryo ibikorwa byo kwiyamamaza n’amatora nyir’izina byabaho mu mutekano no mu bwisanzure; Umunyamabanga Nshingwabikorwa wa NEC, Munyaneza Charles, yatangaje ko mu matora y’uyu mwaka bizahinduka hakajyaho icyiswe ‘Media Center’, aho abanyamakuru bazajya bahabwa amakuru yose y’ibikorerwa mu matora.

Ni mu gihe hasigaye iminsi ibiri ngo igikorwa cyo kwiyamamaza kw’abakamdida gitangire n’iminsi 23 ngo amatora nyir’izina y’Umukuru w’Igihugu abe.

Munyaneza yavuze ko ibikorwa byo kwiyamamaza bizaba birimo abakandida, indorerezi n’abaturage ari ibihe bikomeye bityo itangazamakuru rikaba rigomba kubikurikirana ngo hamenyekane umwuka uhari cyangwa niba abakandida bose bahawe uburenganzira ku buryo bungana.

Yagize ati “Hazajyaho ‘Media center’ aho abanyamakuru bazajya babwirwa uko ibintu bihagaze umunsi ku munsi, twajyaga tujya kuri Radio Rwanda, ariko ubu ibitangazamakuru byose bizajya bikurikirana uko amatora ari kugenda. Iyo media center tugiye kuyagura kugira ngo hazajye haba hari itsinda rimenyesha abanyamakuru ibiri gukorwa bamwe batabikura ku bandi.”

Yavuze kandi ko abanyamakuru bafite uburenganzira bwo kugera ku makuru mu gihe cy’amatora nk’uko biteganyijwe mu Itegeko Nshinga n’itegeko rigenga amatora.

Yagize ati “Itegeko ryihariye rya Komisiyo y’Amatora, riteganya ko abanyamakuru bafite uburenganzira bwo kugera, gutara no gutangaza amakuru. Itangazamakuru rifite inshingano zo kwigisha no kumenyesha abaturage ibikorwa, kugira ngo ribigereho ni ngombwa ko riba ryabonye amakuru ya ngombwa kandi ku gihe.”

Uyu muyobozi kandi yavuze ko itangazamakuru rigomba gukurikirana n’imyitwarire y’abayoboye amatora kuko ibibazo bigenda biboneka mu matora yo hirya no hino biba byatewe n’ubunyamwuga buke bw’abayoboye amatora.

Nubwo itangazamakuru rifite uburenganzira bwo kugera ku makuru arebana n’amatora, ryibukijwe ko ritemerewe gutangaza ibyavuye mu matora Komisiyo y’Amatora itarabitangaza hagamijwe kwirinda ko byayobya abaturage.

Munyaneza yagize ati “ Mu matora aheruka muri Kenya yanabayemo imvururu itangazamakuru ryatangaje ibyavuye mu matora Komisiyo y’Amatora itarabitangaza, igihe kigeze biyigora kumenya ibyo itangaza n’ibyo ireka. Ibyo bikunze gutera ikibazo, ni yo mpamvu byatekerejwe gutyo.”

Mu gihe cy’amatora ya Perezida wa Repubulika, mu gihugu hose hazaba hari ibyumba by’itora bigera ku bihumbi 17.

Umunyamabanga Nshingwabikorwa wa Komisiyo y'Amatora, Munyaneza Charles yavuze ko ibitangazamakuru bizashyrirwaho urubuga rungana rwo gukurikirana ibibera mu matora
Umunyamabanga Nshingwabikorwa wa NEC, Munyaneza Charles, IGP Emmanuel Gasana, Minisitiri w'Ubutabera, Johnston Busingye n'Umunyamabanga Nshingwabikorwa w'Urwego rw'Abanyamakuru bigenzura(RMC),(wa nyuma iburyo)
Umunyamabanga Nshingwabikorwa w'Inama Nkuru y'Itangazamakuru, Peacemaker Mbungiramihigo(wa kabiri ibumoso) yari yitabiriye iyi nama
Polisi yatangaje ko yiteguye kunoza umutekano mu gihe cy'amatora

Amafoto: Moses Niyonzima


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza