Mukabunani wa PS Imberakuri arashinja Diane Rwigara ubujura (Yavuguruwe)

Yanditswe na IGIHE
Kuya 8 Nyakanga 2017 saa 02:58
Yasuwe :
0 0

Umuyobozi w’Ishyaka PS Imberakuri, Mukabunani Christine, yatangaje ko batangiye gukurikirana ibijyanye no kuba Diane Shima Rwigara yaratwaye inyandiko y’ishyaka rye akayiyitirira mu gihe yashakaga imikono yo gushyigikira kandidatire ye ku mwanya wa Perezida wa Repubulika.

Kuri uyu wa Gatanu tariki ya 7 Nyakanga 2017 ubwo Komisiyo y’Igihugu y’Amatora yatangazaga urutonde rw’abakandida bemerewe guhatanira umwanya wa Perezida wa Repubulika, hatangajwe impamvu abakandida barimo Diane Shima Rwigara, Sekikubo Barafinda Fred na Mwenedata Gilbert batemerewe.

Kuri Diane Rwigara, Prof Kalisa Mbanda uyobora Komisiyo y’Igihugu y’Amatora yagize ati “Gukoresha amazina n’indi myirondoro y’abayoboke b’Umutwe wa Politiki yashyize ku rutonde rw’abamusinyiye abantu 34 bavanywe ku ilisiti y’Abayoboke b’Umutwe wa Politiki PS Imberakuri.”

Aganira na IGIHE, Mukabunani Christine, yavuze ko bakorewe ubujura ariyo mpamvu batangiye igenzura. Ati “Badutwariye inyandiko y’umwimerere iriho abarwanashyaka bacu. Ni ziriya lisiti dusinyaho iyo dushinga ishyaka, barayitwaye ariko turacyakurikirana.”

Mukabunani yakomeje avuga ko iyo nyandiko yibwe iriho amazina y’umuntu, umukono, indangamuntu n’akarere aho avuga ko yibwe hashakwa ‘iriya mikono babatuma’. Gusa ngo kugeza ubu ntibaramenya uko byagenze kugira ngo igere mu maboko ya Diane Shima Rwigara.

Ati “Twebwe baba baradusinyiye, ukaza ugafata iyo nyandiko yose ukayitwara ukavuga uti dore abantu bansinyiye kugira ngo niyamamaze.” Yongeye ho ko ibiranga ko inyandiko ari iya PS Imberakuri ‘bashobora kuba barabikuyeho ariko ikigaragara ni uko urutonde rwacu barutwaye kandi ba nyiri ugusinya batabizi, mbese nta muntu wacu bagezeho ngo asinye ahubwo bateruye inyandiko iriho imikono ibindi bagenda bahindagura”.

Twagerageje kuvugana na Diane Shima Rwigara ku murongo wa telefoni ariko ntibyadukundira kuko atitabaga.

PS-Imberakuri izarega Diane Rwigara

Mu kiganiro n’itangazamakuru, Mukabunani, yatangaje ko ziriya nyandiko ahantu hatatu ziri ari muri Minisiteri y’Ubutegetsi bw’Igihugu bazijyanye icyo gihe igishinzwe imitwe ya politiki, iyajyanywe muri Minisiteri y’Ubutabera kuko ari bo bakoraga igazeti na kopi ishyaka ryasigaranye.

Akomeza avuga ko iperereza rikomeje ariko yaba uwatanze urutonde rw’abarwanashyaka ba PS-Imberakuri n’uwarukoresheje bombi bazaregwa.

Yagize ati “Twiteguye ko nituramuka tumenye neza amakuru, ibimenyetso byose tubifite tuzamutwara mu rukiko [Diane Shima Rwigara] ariko tuzabanza duhure n’abarwanashyaka bacu cyane cyane ko ari bo birimo kureba, tuzahura batange igitekerezo ariko icy’ingenzi ni uko tuzarega.”

Mukabunani yavuze ko kugeza ubu bataravugana na Diane Shima Rwigara kuko basanga bitari mu nshingano zabo.

Komisiyo y’Igihugu y’Amatora yatangaje ko abakandida ntakuka bazahatana mu matora y’Umukuru w’Igihugu ari Paul Kagame wa FPR Inkotanyi, Frank Habineza wa Green Party na Philippe Mpayimana watanze kandidatire nk’umukandida wigenga.

Mukabunani Christine uyobora PS Imberakuri yavuze ko ishyaka rye ryakorewe ubujura
Mukabunani Christine mu kiganiro n'abanyamakuru
Abanyamakuru batandukanye bari bitabiriye iki ikiganiro cyateguwe na PS Imberakuri

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza