NEC yashyizeho abakorerabushake basaga 70,000 bazifashishwa mu matora y’Umukuru w’Igihugu

Yanditswe na Jean Pierre Tuyisenge
Kuya 19 Kamena 2017 saa 09:26
Yasuwe :
3 0

Komisiyo y’Igihugu y’Amatora (NEC) yamaze guhitamo abakorerabushake basaga 70,000 bazifashishwa mu matora y’Umukuru w’Igihugu ateganyijwe muri Kanama uyu mwaka.

Umunyamabanga Nshingwabikorwa w’iyo Komisiyo, Charles Munyaneza yabwiye The New Times yanditse iyi nkuru ko abo bose bazakora ku biro bizaba bikorerwaho itora, batangiye guhabwa amahugurwa.

Yagize ati “Twamaze gushyiraho abakorerabushake basaga 70,000 mu matora ateganyijwe, ndetse kuri uyu wa mbere turasoza amahugurwa y’itsinda rya mbere ryabo. Aya kabiri azakorwa mbere y’iminsi mike ngo amatora abe.”

Nubwo hasigaye iminsi 46 gusa ngo amatora abe, Munyaneza avuga ko NEC yiteguye mu cyo we afata nk’amatora y’amateka, akavuga ko byose bizagenda neza.

Ati “Tugeze nibura kuri 95% y’ibyo tugomba gukora. Hasigaye gusa ibikorwa bike nko gutangaza abakandida, kwiyamamaza, gusohora impapuro zo gutoreraho n’amatora nyir’izina.”

Yavuze ko Komisiyo yamaze gutanga ibishoboka byose bikenewe kandi ngo byamaze kugera mu gihugu. Yongeyeho ko gusohora impapuro z’itora bizakorerwa mu gihugu kandi ngo bizahita bitangira ako kanya mu gihe urutonde rwa nyuma rw’abakandida ruzaba rumaze kumenyekana.

Munyaneza yavuze ko NEC yamaze kugirana amasezerano n’ibigo byo mu gihugu bisohora impapuro (Printing) kugira ngo bizakore n’iz’itora.

Mu rwego rwo koroshya ingendo, NEC izakenera imodoka 603, umubare ushobora no kwiyongera, zizakoreshwa mu matora hirya no hino mu gihugu. Ati “Izo modoka zizakoreshwa mu gutwara ibikoresho bizifashishwa mu matora zibivana mu bubiko bwacu zibijyana ku biro by’itora mu gihugu hose”.

Ku birebana n’umutekano w’abakandida mu gihe cy’amatora, Munyaneza yavuze ko NEC izacungira umutekano abakandida mu gihe biyamamaza no mu matora, gusa yavuze ko Komisiyo itazaha abakandida uburyo bwo kugenda no kubatwara.

Ati “Turi gukorana n’inzego zose zishoboka, zirimo Polisi kugira ngo twizere ko tuzagira amatora atekanye. Mu gihe twafatanya twese hamwe, nta kintu na kimwe mbona kidasanzwe gishobora kuzaba.”

Yanavuze ko kugeza ubu bageza ku cyiciro cya nyuma cyo kunoza lisiti z’itora. Ati “Komisiyo iri kwinjiza amakuru yose y’abazatora mu bubiko bwa mudasobwa, kumenya intonde ntakuka bizaba bitarenze ku wa 19 Nyakanga.”

Abajijwe uburyo Komisiyo yiteguye gufasha abakandida mu gihe cyo kwiyamamaza, Munyaneza yavuze ko usibye kubacungira umutekano, bagombye kuba baramaze gutegura ingengo y’imari yabo izabafasha mu gihe biyamamaza.

Biteganyijwe ko umukandida uzagira amajwi nibura 5% azagira amafaranga asubizwa na Minisiteri y’Ubutegetsi bw’Igihugu.

Ku wa 12 Kamena, Komisiyo y’Igihugu y’Amatora (NEC) yatangiye kwakira kandidatire z’abiyamamariza kuyobora u Rwanda mu myaka irindwi iri imbere, ku ikubitiro harimo iya Dr Frank Habineza, Umuyobozi w’Ishyaka Green Party
na Mwenedata Gilbert ushaka kwiyamamaza nk’umukandida wigenga

Abandi bakandida bategerejwe gutanga kandidatire barimo Perezida Kagame Paul wemejwe na Kongere idasanzwe ya FPR Inkotanyi nk’ugomba guhagararira FPR mu matora y’umukuru w’igihugu n’abandi bigenga barimo Mpayimana Philippe na Shima Rwigara Diane.

Lisiti y’agateganyo y’abakandida bemerewe kwiyamamaza izatangazwa ku ya 27, naho urutonde ntakuka rushyirwe hanze ku wa 7 Nyakanga 2017 mu gihe kwakira kandidatire bizaba byarangiye ku wa 23 Kamena 2017.

Abazaba bemejwe bazatangira ibikorwa byo kwiyamamaza tariki 14 Nyakanga birangire ku wa 3 Kanama, ari nawo munsi itora rya Perezida wa Repubulika rizaba ku Banyarwanda bari mu mahanga no ku wa 4 ku b’ imbere mu gihugu.

Umunyamabanga Nshingwabikorwa wa Komisiyo y’Igihugu y’Amatora, Charles Munyaneza yatangaje ko imyiteguro igeze ku kigero cya 95%

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza