PSD izajya yamamariza Kagame aho yerekeje hose n’aho atazagera

Yanditswe na Mathias Hitimana
Kuya 13 Nyakanga 2017 saa 08:40
Yasuwe :
0 0

Nyuma y’aho Ishyaka riharanira Demokarasi n’Imibereho myiza y’abaturage (PSD) ritanze ho umukandida Paul Kagame wa FPR Inkotanyi mu matora y’Umukuru w’Igihugu ateganyijwe muri Kanama 2017, ryanateguye uburyo bwo kumwamamaza hirya no hino mu gihugu.

Kongere ya PSD yateranye ku 3 Kamena 2 017, niyo yafatiwemo icyemezo cyo kuzashyigikira Perezida Paul Kagame mu matora.

Uyu mukandida bashyigikiye wanatanzwe na FPR Inkotanyi ni umwe bakandida ntakuka Komisiyo y’amatora yemeje. Abandi ni Frank Habineza wa Green Party n’umukandida wigenga Philippe Mpayimana. Aba bakandida bose baratangira ibikorwa byo kwiyamamaza kuri uyu wa Gatanu , tariki ya 14 Nyakanga kugeza ku ya 3 Kanama 2017.

PSD ikimara kwemeza ko umukandida wayo ari Paul Kagame, Perezida wa PSD, Dr Vincent Biruta, yatangaje ko abarwanashyaka b’iri shyaka bagomba kumwamamaza.

Umunyamabanga Mukuru wa PSD, Dr Ngabitsinze Jean Chrysostome, yabwiye IGIHE ko ishyaka ryabo ryamaze guteganya uko rizamamaza Paul Kagame.

Yagize ati “Twarabiteguye turazindukana n’umukandida wacu [Paul Kagame] tugiye kumwamamaza, hari uburyo bwo kumwamamaza tuzaba turi aho aziyamamariza ariko n’ahandi atazashobora kujya tuzakora ibishoboka byose tuhagere. PSD izajya mu turere twose, izajya mu mirenge aho bishoboka hose, ku rwego rw’igihugu ho hazaba hari itsinda rizajya aho azajya hose.”

Yakomeje avuga ko iri shyaka rizamwamamaza ‘kuva ku rwego rw’igihugu kugeza mu midugudu kandi birateguye’.

PSD yatangaje ko yanagennye ingengo y’imari [batavuga ingano] yo kuzamamaza Kagame hakoreshejwe itangazamakuru n’ubundi buryo butandukanye.

Dr Ngabitsinze yongeye gushimangira ko guhitamo Kagame bitavuze ko PSD nta ngufu ifite zo gutanga umukandida, ahubwo ari uko ari “Umugabo ukwiye kuba umuntu wese yamuhitamo”.

Mu kiganiro n’itangazamakuru cyo kuri uyu wa Gatatu, Umunyamabanga Mukuru w’Umuryango wa FPR Inkotanyi, Ngarambe François, yavuze ko umukandida wa RPF Inkotanyi azajya mu turere twose, akaba ashobora no kwiyamamariza ahantu habiri hatandukanye bitewe n’uko akarere kangana. Azahera mu Karere ka Ruhango kuri uyu wa Gatanu.

Abarwanashyaka ba PSD bari mu batanze ibitekerezo biganisha ku ivugururwa ry’Itegeko Nshinga rya Repubulika y’u Rwanda banaha agaciro ubusabe bw’Abanyarwanda bifuzaga ko havugururwa ingingo ya 101 y’Itegeko Nshinga yabuzaga Perezida Kagame kongera kwiyamamaza nyamara Abanyarwanda benshi bagaragaza ko bakimukeneye.

Uhereye ibumoso: Umunyamabanga Mukuru wa PSD, Dr Ngabitsinze Jean Chrysostome na Perezida wa PSD, Dr Vincent Biruta

[email protected]

Indi nkuru wasoma: PSD yafashe icyemezo cyo kuzashyigikira Perezida Kagame mu matora


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza