Urugendo rw’ibikorwa byo kwiyamamaza rwa Paul Kagame i Nyamagabe, Huye na Kamonyi (Amafoto)

Yanditswe na Cyprien Niyomwungeri, Philbert Girinema
Kuya 16 Nyakanga 2017 saa 09:23
Yasuwe :
0 0

Umunsi wa Gatatu w’ibikorwa byo kwiyamamaza bya Paul Kagame, umukandida wa FPR Inkotanyi akaba na Chairman wayo, wasorejwe mu Karere ka Kamonyi nyuma y’urugendo rurerure mu turere dutatu.

Kuri iki Cyumweru tariki ya 16 Nyakanga 2017, Perezida Paul Kagame yiyamamarije mu turere twa Nyamagabe, Huye na Kamonyi.

Abaturage bari bitabiriye ku bwinshi, by’umwihariko nk’i Nyamagabe, bamwe bageze ahabereye igikorwa mbere ya saa kumi z’ijoro kandi barategereza kugera saa yine ubwo Paul Kagame yageraga kuri Stade i Nyagisenyi.

Ni nako byagenze ku bari Huye aho yageze ahagana saa sita z’amanywa na Kamonyi bamwakiriye saa kumi z’igicamunsi mu gihe bari bageze aho igikorwa cyabereye mu masaha ya saa kumi z’igitondo.

Mu turere twose Umukandida wa FPR Inkotanyi amaze kwiyamamarizamo, Kamonyi iza ku isonga mu kugaragaza morali nyinshi dore ko ubwo Paul Kagame yafataga ijambo, bamwakiranye urukundo rwinshi, uko avuze bakikiriza mu buryo bwihariye.

Umukuru w’Igihugu ubwo yari ku Kamonyi yikije cyane ku kuba hari abari baratereranye u Rwanda bazi ko rutazigera rutera imbere ariko ubu rukaba rwarashibutse ndetse rwera imbuto nziza.

Yasabye abaturage kuzatora neza ku itariki 4 Kanama, bahitamo umukandida wa FPR Inkotanyi kugira ngo bakomeze gushimangira ibyiza u Rwanda rugezeho.

Abaturage bo mu Karere ka Kamonyi bari baje bitwaje ibyo bamaze kugeraho mu gihe Paul Kagame amaze ayobora u Rwanda
Perezida Kagame, Depite Gatabazi Jean Marie Vianney (uwa mbere ibumoso wambaye umupira w'umweru); Ian Kagame, Brian Kagame na Ange Kagame bamuherekeje mu bikorwa byo kwiyamamaza

- I Nyamagabe, umukecuru yagize amahirwe yo kubyinana na Paul Kagame

Umukecuru i Nyamagabe yeretswe urugwiro na Perezida Kagame
Perezida Kagame yabyinanye n'uyu mukecuru, benshi barizihirwa

Uko umunsi wa gatatu w’ibikorwa byo kwiyamamaza bya Paul Kagame wagenze i Nyamagabe, Huye na Kamonyi

17:20: Chairman wa FPR Inkotanyi, Paul Kagame asoje ibikorwa byo kwiyamamaza muri iki cyumweru. Abwiye abaturage bo mu Karere ka Kamonyi ko itariki ya kane ari umunsi wo guhamya urugendo rw’iterambere ry’u Rwanda.

Ati “ Itariki enye ni ukuzinduka byajya kugera saa sita umurimo ukaba wanoze hanyuma tukazakomeza kwishima, kwishimira hamwe, kwishimira ibikorwa byiza, kwishimira amajyambere tuzakomeza kubaka.”

- Baducukuriye urwobo baradutaba

Perezida Kagame ati “ Amateka mabi yabaye, twagize haje kuvamo imyumvire, ubushake , imbaraga aho tugeze ubu amahanga arashakisha kutwumva ntabwo aratwumva neza. Kubera ko uko muri hano, uko abandi bari bari aho twahoze, ukuntu Abanyarwanda bari hamwe, ukuntu biyumva, ukuntu bashaka kubaka igihugu, ukuntu bashaka kubaka igihugu ntabwo bisanzwe. Niyo mpamvu bamwe mu bagize uruhare mu mateka mabi y’u Rwanda atari Abanyarwanda batabyumva. Baducukuriye urwobo badushyiramo, baradutaba, ntabwo bari bazi ko tuzamera.

Hari umugani numvise wo mu bihugu hirya kure bavuga ngo ‘baraduhambye, baradutabye, ntabwo bari bazi ko turi imbuto zizashibuka’. Basize bashyizeho ibitaka rwose barakandagira barangije baradupepera batubwira ngo murabeho.

Hanyuma Abanyarwanda babaye imbuto, baramera, barashibuka, barakura none Abanyarwanda bari hano ni ubukombe. Ni amajigija.”

Umukuru w'Igihugu yabwiye abanya-Kamonyi ati "Baducukuriye urwobo badushyiramo, baradutaba, ntabwo bari bazi ko tuzamera"
Abaturage ku Kamonyi bari uruvunganzoka

17:00: Chairman w’Umuryango wa FPR Inkotanyi akaba n’Umukandida wayo, ahawe umwanya aho abaturage bose bahagurutse bakavugira icya rimwe bati ‘Ni wowe nta wundi’

16:55: Guverineri Munyantwari Alphonse ahawe umwanya abwira Abanya-
Kamonyi ko kugira Paul Kagame ari ukugira u Rwanda rubereye buri wese.

Akomeje avuga ko Akarere ka Kamonyi kageze kuri byinshi aho urubyiruko rwabashije kwiga, yongera ho ati ‘abagore ni inde waduhaye ijambo, abagore ni inde waduhaye ijambo, Abanyarwanda ni inde waduhaye agaciro?’ abandi basubiza bati ni ‘Paul Kagame’.

16:45: Mukamusoni Francine, niwe uhawe umwanya kugira ngo atange ubuhamya bw’ibyo amaze kugeraho mu gihe cyose Paul Kagame amaze ayobora u Rwanda.

Mukamusoni atangiye avuga ko “kuba mpagaze hano ni uko mwahaye umugore ijambo, mwadukuye mu gikari”, akomeza avuga ko yibumbiye muri koperative na bagenzi be bahinga umuceri ndetse abasha no kwigurira inzu y’ubucuruzi. Akomeje avuga ko abaturage 12 yaboroje inka naho 30 aboroza amatungo magufi.

Mukamusoni Francine niwe watanze ubuhamya mu izina ry'abaturage bo mu Karere ka Kamonyi

16:35: Abaturage benshi bari aha mu Karere ka Kamonyi, bakirije amashyi menshi Perezida Paul Kagame aho bakomerejeho mu ijwi riranguruye bagira bati ‘Paul Wacu’

Ubwo yageraga ku Kamonyi yakirijwe amashyi n'impundu
Abaturage bari benshi bakereye kwakira Paul Kagame, umukandida wa FPR Inkotanyi

16:30: Umukandida wa FPR Inkotanyi amaze kugera mu Karere ka Kamonyi ahazwi nko mu ‘Ikiryamo cy’inzovu’ ahakoraniye abaturage baturutse ibice bitandukanye by’Intara y’Amajyepfo ahakomereje ibikorwa byo kwiyamamaza ku munsi wa Gatatu.

-  Umusangiza w’amagambo, Kamanzi Erneste, ati ‘ Amadarapo hejuru twitegura kwakira Chairman wacu!’

16:20: Chairman wa FPR Inkotanyi akaba n’Umukandida wayo, Paul Kagame mu kanya gato araba asesekaye mu Karere ka Kamonyi ahari kubera ibikorwa bye byo kwiyamamaza. Igikorwa cy’uyu munsi nicyo gisoza ibyo muri iki cyumweru aho ibikorwa bizongera gusubukurwa ku wa Kabiri tariki ya 18 Nyakanga 2017

15:45: Abaturage benshi b’i Kamonyi bari gufatanya n’abacuranzi kuririmba indirimbo zivuga ibyiza u Rwanda rwagezeho mu gihe cyose rumaze ruyobowe na Perezida Kagame. Hagati aho, abahanzi batandukanye nabo nk’uko bisanzwe bari gususurutsa abantu bitabiriye ibikorwa byo kwiyamamaza bya Paul Kagame.

Uyu musore ufite icyapa yashimishije benshi mu bari ku Kamonyi
Abahanzi barimo Massamba Intore basusurukije abaturage bo mu Majyepfo by'umwihariko mu Karere ka Kamonyi
Uhereye ibumoso: Abahanzi barimo TMC wo muri Dream Boys, Knowless Butera, King James, Riderman na Kitoko Bibarwa (wambaye ingofero itukura) mu baherekeza Paul Kagame mu bikorwa byo kwiyamamaza
Ibyishimo byaramurenze arapfukama azamura icyapa kiriho ifoto ya Perezida Kagame

-  Amafoto utabonye ya Paul Kagame i Nyamagabe…

Ageza ijambo ku baturage b’i Nyamagabe...

Perezida Kagame ubwo yagezaga ijambo ku baturage b'i Nyamagabe
Kagame yabwiye ab’i Nyamagabe ko gutora neza ari ugutora umukandida wa FPR
Yabajije abaturage b'i Nyamagabe ati "babitaga iki harya? Abatebo. Buriya uzi ikindi bivuze? Muzi umugani w’agatebo? Kayora ivu kandi uwigize ko …?"
Perezida Kagame imbere y'abaturage b'i Nyamagabe ati "Nta kuba agatebo, nta kuyora ivu, ubu ni ukuyora amafaranga gusa"
Perezida Kagame yemereye abaturage b'i Nyamagabe ibikorwa remezo birimo imihanda ibahuza n’utundi turere
Perezida Kagame agaragiwe na Chairman wungirije wa FPR Inkotanyi, Bazivamo Christophe; Umuyobozi wa PDC, Mukabaranga Agnès (uwa gatatu uturutse ibumoso); Perezida w'Umutwe w'Abadepite, Mukabalisa Donatille wa PL na Guverineri Mureshyankwano Marie Rose
Umukecuru wo mu Karere ka Nyamagabe yabonye umwanya wo kubyinana na Perezida Kagame
Yamukoze mu biganza ashira urukumbuzi

Ubwo yageraga i Nyamagabe...

Paul Kagame yeretswe urugwiro n'ibihumbi by'abaturage baje kumwakira
Bose bavugaga mu ijwi rirenga bati "Ni wowe"

15:20: Mu kiryamo cy’inzovu mu Murenge wa Rukoma mu Karere ka Kamonyi, niho ibikorwa bya Paul Kagame bikomereje yiyamamaza. Abaturage benshi babukereye n’amabendera ndetse n’ibirango bya FPR Inkotanyi.

Kamonyi yaciye agahigo mu turere twose Paul Kagame amaze kwiyamamarizamo mu bwitabire no mu kugira morali iri hejuru
Kamonyi bahurizaga ku ntero n'inyikirizo imwe mu ijwi riranguruye bagira bati ‘Paul Wacu’
Kamonyi yaciye agahigo mu turere twose Paul Kagame amaze kwiyamamarizamo mu bwitabire no mu kugira morali iri hejuru

- Kamonyi…

Kagame asoje ijambo rye yifuriza abanya-Huye guhorana agaciro n’amahirwe y’Imana.

Abanyarwanda turifuza ko aya mahirwe abageraho. Hanyuma rero umunsi ni wa wundi, nta mfabusa irimo, nta mfabusa dushaka, nta wupfusha amahirwe ubusa. Ubwo rero abashyira mu gaciro icyo basezeranye baracyuzuza.

’Mwe mwahisemo kera, ubwo ninjye namwe’

Kagame yavuze ko ibikorwa by’amajyambere yemereye abanya-Huye byinshi byakozwe ibindi bikaba bigiye gusohozwa kandi hari n’ibindi bigiye gutangira.

"Rubyiruko nkumi n’abasore n’abandi babaruse ariko ndahera kuri mwe, imyaka 23 ishize twubaka u Rwanda rushya, icyo twashyize imbere ni ukubaka urubyiruko rwo Rwanda rw’ejo, amahirwe arahari icyangombwa ni uguhitamo tukayafata tukayakoresha neza.

Amahirwe iyo utayakoresheje andi akaza ntuyakoreshe ubutaha urayategereza ntuyabone ariko iyo ukoresheje amahirwe ufite n’andi araza. Birazwi ko ibyiza bisanga ibindi. Rubyiruko iki ni gihe cy’amahirwe ni igihe cyo kuyakoresha neza n’andi akaza. "

Chairman wa FPR-Inkotanyi ashimiye ko abari i Huye ari benshi beza baje bafite umugambi wo kuganisha mu bikorwa ikizakorwa ku wa 4 Kanama, guhitamo ati ’mwe mwahisemo kera, ubwo ninjye namwe.’

Icyo dukora uyu munsi ni ukujya inama, ni ukwishima, kwishimira ibyo tumaze kugeraho, tumaze gukora, kwishimira n’ibyiza bindi birushijeho tugiye gukora. ’inzira turimo, inzira dusanzwemo ni ukuyinoza uko bisanzwe tugakora, tugakorera hamwe tugakora ibyiza tukikorera ntawe dusigana, ntidusigana dukora nk’abikorera.

"Ntabwo Imana yaturemeye kuba abatindi, kuba abakene"

Paul Kagame ati "Turashaka amajyambere, turashaka umutekano, turashaka ubumwe mu Banyarwanda twagize amateka arimo kudutandukanya ariko ubu turubaka amateka y’ubumwe. Umutekano, amajyambere, ubumwe byose bitagira ubihezwamo, turajyana ntawe tugomba gusiga inyuma. Ibyo rero ni umuco FPR yadutoje ni umuco Abanyarwanda bose bamaze kugira dukwiye gukomeza kubaka nibyo bizatugeza kure. Turashaka kugera kure, turashaka kwihuta, ushaka kwihuta aha umwanya ufite icyo ashoboye, abantu bose bakorera hamwe tukagera kure, nibyo twifuza, nibyo bitubereye, ntabwo Imana yaturemeye kuba abatindi, kuba abakene.

Abandi se bageze kure mu iterambere uribwira ngo Imana yarababereye kuruta uko ikunda u Rwanda, ariko aho turi ni ukubera politiki mbi mu mateka yacu. Ibyo tumazemo iminsi twubaka, ni inzira ya politiki nziza yubaka. Ibi rero ni ibikomeza uwo muco inzira tukayijyamo twihuta."

13:10: Perezida Kagame atangiye kugeza ijambo ku bihumbi birenga 100 byakoraniye imbere ya Stade Huye.

13:00 Umusangiza w’amagambo atumiye Guverineri Mureshyankwano Marie Rose, ngo ageze kuri Chairman byinshi yagejeje ku baturage ba Huye.

Mureshyankwano atangiye agaragaza ibyo umukandida wa FPR-Inkotanyi, yagejeje kuri Huye. Ati " Abagira amaso mwabonye stade ya Huye?, Kagame Paul yatuzaniye imikino ya CHAN."

"Uyu Mujyi wa Huye nyuma ya Jenoside wari wasenyutse abateguye Jenoside bashakaga ko yibagirana ariko Chairman ati "Huye igomba gusa neza, yubatse imihanda, iya kaburimbo, amabuye, yaduhaye amazi meza, amahoteli...abafite amaso murebe hano hepfo hari gare, turebe bya bishanga byo muri Huye umukandida aribitunganya ubu bihingwamo umuceri."

Amasoko ya kijyambere, inzu nziza zubakiwe ababyeyi barokotse Jenoside.

12: 45 : Hatumiwe Bakundukize Venuste na Nsengiyumva Jean de Dieu ngo bagaragaze ibyo imiyoborere myiza yabagejejeho.

Bakundukize wize amashuri umunani akavutswa uburenganzira bwo kwiga, ashimiye uburyo imiyoborere myiza yamuremyemo icyizere, aho yatangiriye ku murima umwe w’umuceri ubu akaba afite uruganda rwiza rutonora umuceri rwa Kinazi Rice abikesha imiyoborere myiza n’inama z’umukandida wa FPR-Inkotanyi.

Buri mwaka atangira mituweli abantu 100, ubu yaguriye abaturanyi transfo ya miliyoni umunani ifasha abaturage kubona amashanyarazi.

Asoje abwira umukandida Kagame ati "Tukuri inyuma ku itariki ya 4 inkoko niyo ngoma turashaka kubumbatira ubumwe tubashyigikira."

12: 40: Mukarusine Ancille wo mu Murenge wa Simbi niwe uhawe umwanya ngo yakire Chairman wa FPR-Inkotanyi akaba n’umukandida wayo, aho afatanyije n’itorero rye barimo kurata ibigwi by’uyu mukandida, yaba kububakira stade, gufasha abakecuru n’abasaza, kubaka gare ya Huye n’ibindi.

Ibikorwa byo kwamamaza umukandida wa FPR-Inkotanyi bikomereje mu kibuga kiri imbere ya Stade Huye yubatse mu Murenge wa Ngoma mu Karere ka Huye.
Abaturage ibihumbi n’ibihumbi baje gushyigikira Kagame Paul, aho barimo kumanika amabendera bamwakira.

Kuva ku munsi wa mbere w’ibikorwa byo kwiyamamaza, abanyamuryango ba FPR Inkotanyi beretse umukandida wayo Paul Kagame urukundo
Ababyeyi bari bateze ingori bambariye gushyigikira Paul Kagame
Abayoboke ba PL bakomeje kugaragaza ko bashyigikiye umukandida wa FPR Inkotanyi, Paul Kagame aho yiyamamariza hose
Abiganjemo urubyiruko bizihiwe batangira gucinya akadiho
PL ntitangwa aho Perezida Kagame yiyamamarije. N’i Nyamagabe bari bahabaye

Kwiyamamaza i Nyamagabe birasojwe, hakurikiyeho Huye...

- Incamake y’ibikorwa byo kwiyamamaza bya Paul Kagame i Nyamagabe (Video)

11:15: Perezida Kagame akaba n’umukandida wa FPR asoje ijambo rye yizeza abaturage ibikorwa remezo birimo imihanda ibahuza n’utundi turere.

11:10:Kwitwa abatebo hari ikindi bivuga

“Subiza amaso inyuma gato, ngo babitaga iki harya? Abatebo. Buriya uzi ikindi bivuze? Muzi umugani w’agatebo? Kayora ivu kandi uwigize ko …? Ibyo aba Nyamagabe mwarabisezereye. Abanyarwanda bose twarabisezereye, nta kuba agatebo, nta kuyora ivu, ubu ni ukuyora amafaranga gusa. Ariko ntabwo amafaranga ayorwa nk’agatebo, ayorwa n’ibikorwa […] twiteguye gukora ibintu bizima, gukorera hamwe tugatera imbere. Niyo nzira turimo niyo nzira ya FPR, niyo nzira y’umukandida wa FPR.”

11:05: - Gutora neza ni ugutora FPR

“Ni ugutora ibizaduha umutekano, umutekano urambye, ni ibizaguha gukora amafaranga. Ni ugutora ibizaguha umwana wawe kuticwa n’indwara zitakica abantu, ni ibizaguha abasaza gusaza neza, ni ukuguha, ni ugutora ibiha inkumi n’abasore ubuzima bwiza buzira umuze, bakagira ibyo bakora bibateza imbere nabo bagakorera hamwe bagateza igihugu imbere. Ayo niyo mateka tumazemo iminsi, niyo mateka ya FPR Inkotanyi, niyo mateka y’umukandida wayo. Gutora neza ni ugutora FPR, ni ugutora umukandida kandi ntabwo ari ukwibeshya.”

11:00: Chariman wa FPR Inkotanyi akaba n’umukandida wayo, Paul Kagame, atangiye ijambo rye ageza ku baturage ba Nyamagabe aho atangiye abashimira.

10:50: Guverineri Mureshyankwano Marie Rose, avuze byinshi byagezweho mu gihe Paul Kagame amaze ayobora u Rwanda. Mu bijyanye n’amashanyarazi avuze ko yari kuri 2% yikuba inshuro zigera ku icumi aho ubu ageze kuri 21%. Mu mirenge 17 igize Nyamagabe, ngo itatu niyo gusa idafite amashanyarazi kandi agomba kugezwamo muri uyu mwaka.

Guverineri Mureshyankwano Marie Rose ageza ku mbaga y'abari bateraniye i Huye ibyo Perezida Kagame yabagejejeho mu gihe amaze ayobora u Rwanda

10:45: Mukeshimana Chantal niwe uhawe umwanya kugira ngo atange ubuhamya aho avuze ko yari umukene ukomeye utoragura amase mu muhanda ariko kuva aho gahunda ya Girinka yagiriyeho, ubu yabashije kwiteza imbere ku buryo bugaragara akoroza na bagenzi be.

10:30: Paul Kagame, umukandida wa FPR Inkotanyi amaze kugera i Nyagisenyi aho ibihumbi by’abaturage baje kumwakira mu bikorwa bye byo kwiyamamaza.

10:20: Umuhesha w’amagambo w’uyu munsi akomeje akazi ke aho ari kuganiriza abaturage mu magambo ashimangira ibyo u Rwanda rwagezeho ku buyobozi bwa Perezida Kagame.

Abiganjemo abakuze nabo bashyiramo umukenyero bakicumba akabando berekeza gushyigikira umukandida wa FPR Inkotanyi, Paul Kagame

10:05: Uhereye ku bayobozi bakuru bo muri FPR Inkotanyi kugera ku bandi bayobozi b’amashyaka atandukanye, ibyishimo ku maso nibyo biri kuranga abari i Nyamagabe.

Umunyamabanga Mukuru wa FPR Inkotanyi, Ngarambe Francois ari kumwe na Chairman wungirije wa FPR Inkotanyi, Bazivamo Christophe
Ngarambe wa FPR asuhuza umwe mu bayobozi b'ishyaka PPC ryateye ingabo mu bitugu FPR muri ibi bikorwa byo kwiyamamaza
Umuyobozi wa PL, Perezida w'Inteko Ishinga Amategeko, Umutwe w'Abadepite, Donatille Mukabalisa na Minisitiri w'Ibikorwaremezo, James Musoni
Umuyobozi wa PL, Perezida w'Inteko Ishinga Amategeko, Umutwe w'Abadepite, Donatille Mukabalisa

10:00: Mu gihe kitarambiranye, Umukandida wa FPR Inkotanyi, Paul Kagame araba ageze i Nyamagabe ahagiye kubera ibikorwa bye byo kwiyamamaza. Hari kuririmbwa indirimbo zitandukanye zirimo iyahuriwemo n’abahanzi bise ‘Intore Izirusha Intambwe’

Ab'i Nyamagabe bari bafite akanyamuneza bigaragarira amaso

09:50: Abahanzi batandukanye barangajwe imbere na Knowless Butera, Tom Close, Senderi n’abandi nibo bari gususurutsa imbaga y’abaturage bari i Nyagisenyi. Bari kuririmba indirimbo z’umuryango FPR Inkotanyi bakananyuzamo izabo zakunzwe cyane mu bihe bitandukanye na n’ubu.

09:40: Abayobozi batandukanye mu nzego za leta n’abahagarariye imitwe ya politiki itandukanye bamaze kugera muri Stade y’i Nyagisenyi ahagiye kubera ibikorwa byo kwiyamamaza bya Paul Kagame

Senateri Makuba Bernard (hagati) ni umwe mu bitabiriye ibikorwa byo kwamamaza Paul Kagame i Nyamagabe

09:30: Indirimbo zitandukanye zivuga ibigwi umuryango wa FPR Inkotanyi nizo ziri gucurangwa hano.

Abaturage bazindutse mu gitondo cya kare ntibakangwa n'izuba
PL yatangiranye na Perezida Kagame mu bikorwa byo kwiyamamaza urugendo iracyarukomeje
Bamwe bageze ahabereye ibikorwa byo kwiyamamaza mu bunyoni butaracya
Bari bafite ubudasa mu kugaragaza ibyo bagezeho ku buyobozi bwa Perezida Kagame

Amafoto: Mahoro Luqman


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza