00:00:00 IGIHE NETWORK KN KINYARWANDA EN ENGLISH FR FRANCAIS

Abanyamuryango ba FPR baba i Burayi bemeje impinduramatwara igamije iterambere

Yanditswe na Kanamugire Emmanuel
Kuya 4 Nyakanga 2016 saa 08:17
Yasuwe :
0 0

Abanyamuryango ba FPR Inkotanyi baba mu bihugu by’i Burayi bavuga ko ibiganiro bagiranye ku mpinduramatwara igamije iterambere ry’abaturage b’igihugu byatumye bongera kwibuka inshingano zabo bikanabibutsa gushaka ibisubizo bijyanye n’aho isi yerekeza.

Ni ibiganiro byatangiye kuwa Gatandatu, bisozwa ku Cyumweru, byahuzaga abanyamuryango ba FPR Inkotanyi baba ku mugabane w’u Burayi.

Hari ku nshuro ya gatandatu, aho ubusanzwe baganira ku matwara y’umuryango no kuri gahunda baba barasubitse mu bihe biheruka.

Ambasaderi w’u Rwanda mu Buholandi, Jean Pierre Karabaranga wari muri uwo mwiherero yavuze ko “guteranira mu nama ari amahirwe yo gukomeza kwiyubaka nk’abanyamuryango ba FPR Inkotanyi baba hanze y’u Rwanda, kuko umuryango ni moteri ya guverinoma.”

Akomeza avuga ko aho abanyamuryango bafite ubushobozi, bakorera ku murongo, bakorera hamwe, n’ibindi bikorwa bya leta bigenda neza.

Yanasobanuriye IGIHE ko ari ko Leta ikora, ndetse ngo “ni nako ibikorwa by’umuryango byatumye u Rwanda rugeze aho rugeze uyu munsi.”

Gusa ngo aya mahugurwa yatumye bongera kwibuka inshingano zabo, ndetse bumva ko hari ingamba zidasanzwe bakwiriye gufata.

Ati “Amasomo twavanye muri aya mahugurwa yatumye turushaho kongera gufata inshingano nshya zijyanye n’ibihe tugezemo, kuko ibihe bihora bihinduka, imbogamizi zihora zihinduka, n’ingamba zigomba guhora zijyana n’ibintu bishya tugenda duhura nabyo n’ibihe tujyamo.”

Akomeza avuga ko ari byiza kuganira ku bintu bireba u Rwanda kuko nubwo baba hanze ariko bakomeza gukorera u Rwanda.

Umunyamuryango wa FPR akaba n’umujyanama wa mbere muri Ambasade y’u Rwanda mu Bubiligi, Musare Faustin, umwe mu banyamuryango uba mu Bubiligi waganiriye na IGIHE, yavuze ko “baganiriye ku myitwarire y’impinduramatwara, igamije guhindura imibereho y’abanyarwanda ngo biteze imbere, ndetse babeho neza mu byiciro bitandukanye by’ubuzima.”

Yakomeje avuga ko “Mu biganiro byatanzwe, abanyamuryango bakanguriwe kumenya ibibera mu gihugu cyabo, bakamenya icyo Leta yifuza, ndetse bakitwara neza bagendeye ku matwara y’umuryango.”

Umuryango FPR Inkotanyi ugizwe n’ingaga z’urubyiruko n’abagore, ariko by’umwihariko urubyiruko ngo rugomba kugira uruhare mu ishyirwa mu bikorwa rya gahunda zitandukanye zigenda zishyirwaho.

Aba kandi ngo barebeye hamwe ibyo bashobora gukora ngo bakomeze kugira uruhare mu iterambere ry’igihugu.

Abitabiriye iyi nama baturutse mu bihugu 10 by’i Burayi, inama itaha ibahuza bose ikazabera mu kindi gihugu kitari u Bubiligi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .