Abanyarwanda baba muri Leta ya Arizona bakanguriwe gukoresha serivisi z’urubuga Irembo

Yanditswe na Karirima A. Ngarambe
Kuya 10 Mutarama 2017 saa 09:29
Yasuwe :
0 0

Abanyarwanda batuye muri Leta ya Arizona muri Amerika bashishikarijwe gukoresha urubuga Irembo rutangirwaho serivisi zitandukanye za Leta kugira ngo bamenye izo bagenewe nk’abenegihugu mu rwego rwo kubyaza umusaruro amahirwe bafite.

Iyi ngingo ndetse n’izindi nyinshi zitandukanye zagarutsweho ubwo abagize Umuryango w’Abanyarwanda baba muri Leta ya Arizona bahuriraga mu busabane.

Ibi birori byabereye Phoenix mu Murwa Mukuru wa Arizona, tariki ya 7 Mutarama 2017, byitabiriwe n’Abanyarwanda benshi baba muri iyi Leta ndetse n’ inshuti z’u Rwanda zituruka mu bihugu by’Ibiyaga Bigari.

Ubusanzwe Abanyarwanda bahuraga gusa mu bikorwa byo kwibuka Jenoside yakorewe Abatutsi muri Mata 1994.

Uyu muhango waje gushyirwa mu bikorwa kugira ngo banahure kenshi bamenyane, biteze imbere biciye mu ndangagaciro z’umuco ubaranga ari nako bagira uruhare mu iterambere ry’igihugu.

Ambasaderi Mukantabana Matilde, uhagarariye u Rwanda muri Leta Zunze Ubumwe za Amerika, yagarutse ku ishema Abanyarwanda bakwiye kugira ryo kuba bafite igihugu cy’intangarugero muri Afurika ndetse no ku Isi yose.

Yasobanuriye abitabiriye ibirori ko Umunyarwanda ashobora gukorera igihugu aho yaba ari hose, abasaba gukomeza kwiyubaha no guhesha igihugu isura nziza, badapfusha ubusa amahirwe yo kuba bafite igihugu gifite ubuyobozi bugihesha agaciro n’umutekano.

Ambasaderi Mukantabana yabwiye Abanyarwanda gukomeza gushyira hamwe, bakareba icyabateza imbere, bakirinda icyabarangaza kibatesha igihe.

Abitabiriye ibi birori basobanuriwe kandi uburyo u Rwanda rwateye intambwe ifatika mu korohereza ba rwiyemezamirimo mu bikorwa by’ishoramari.

Ambasaderi Mukantabana yababwiye ko inzego za Ambasade zibereyeho kubafasha gusobanukirwa gahunda zose zibagenewe nk’abenegihugu ndetse abashishikariza no kwifashisha urubuga rwa internet Irembo (www.irembo.gov.rw) kugira ngo bamenye serivisi zibagenewe.

Perezida w’Umuryango w’Abanyarwanda baba muri Arizona, Habineza Jean Claude yasobanuye amavu n’amavuko yawo.

Habineza yavuze ko mu mpera z’umwaka ushize hashyizweho ubuyobozi bushya biciye mu matora ndetse bukaba bwarahawe inshingano zo kwandikisha Umuryango Nyarwanda muri Leta ya Arizona, gutegura igikorwa cyo kwibuka Jenoside yakorewe Abatutsi mu 1994, kwagura amarembo y’umuryango kugira ngo umenyekane mu Banyarwanda aho bari hose muri Arizona, ndetse no gukora gahunda nteganyabikorwa yo mu gihe gito n’ikirekire.

Ibi birori byaranzwe no gusangira ndetse no gucinya akadiho ka Kinyarwanda.
Leta ya Arizona ni imwe muri 50 zigize Leta Zunze Ubumwe za Amerika, ihana imbibi na Leta za New Mexico, Utah, Nevada, California na Colorado.

Iyi Leta ituwe n’abaturage 6,931,071 biganjemo abazungu (82.29%); abirabura (3.74%), abakomoka muri Aziya (02.8%); abandi (6.09%) akaba ari iya 14 ukurikije uko Leta zigize USA zituwe.

Ubu busabane bwahurije hamwe Abanyarwanda baba muri Leta ya Arizona ndetse n'inshuti zabo
Bafata ifoto y'urwibutso
Byaranzwe n'imbyino za Kinyarwanda

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza