Abanyarwanda mu bikorwa by’amatora y’ababahagararira mu mijyi y’u Bubiligi

Yanditswe na Karirima A. Ngarambe
Kuya 9 Gashyantare 2018 saa 08:12
Yasuwe :
0 0

U Bubiligi nk’ igihugu gituwe n’Abanyarwanda benshi, bari kugenda bitorera abahagararira muri Diaspora nyarwanda mu mijyi batuyemo.

Abanyarwanda bagiye bafite imishinga n’ ubumenyi butandukanye, bagahoza ku mutima u Rwanda rwababyaye. Ku bw’ibyo baba bafite amahuriro atandukanye.

Mu 1985 ni bwo havutse ishyirahamwe ryari rigizwe cyane cyane n’abanyeshuri bise « Isangano asbl » nk’uko umwe mu bari barigize Ngaboyera Oscal yabibwiye IGIHE.

Nyuma haje kujyahoUmuryango Nyarwanda mu Bubiligi (CRB ) wagiye ugira uruhare mu kurwanya abahakana Jenoside yakorewe Abatutsi, ubungabunga ubumwe n’umuco nyarwanda n’ibindi.

Mu 2011 CRB yaje guhinduka DRB-Rugali, ariyo ihuje umuryango Nyarwanda mu Bubiligi, iyobowe na Pulchérie Nyinawase, ikagira n’abayihagarariye mu mijyi 10 bayobora udushami twa DRB-Rugali.

Mu ntangiriro za 2018 nibwo haratangiye amatora mu mijyi 10 ariyo: Anvers, Bruxelles, Charleroi, Flandre Occidentale, Gand, Leuven, Louve-La-Neuve, Liège, Mons na Namur.

Buri mujyi batora abantu batandatu bagize itsinda ry’ubuyobozi (comité) rigizwe na Perezida, Visi Perezida, Umunyamabanga, Umubitsi, Ushinzwe uburinganire n’Ushinzwe urubyiruko.

IGIHE yakurikiye amatora yabereye mu Majyaruguru y’u Bubiligi muri DRB-Rugali-Flandre Occidentale, aho banakiriye Ambasaderi w’u Rwanda, Rugira Amadin, bagirana n’ibiganiro byarimo impanuro zikomeye, baranasabana .

Umutangana Yvette wongeye gutorwa nka Perezida uyoboye DRB-Rugali Section Flandre Occidentale, yashimiye ikipe icyuye igihe uko bakoranye neza, ati “Mwakoreye neza ubuvugizi igihugu cyacu, u Rwanda, muri aka karere.”

Amajyaruguru y’u Bubiligi azwiho ubukungu, Abanyarwanda bahatuye bahamenyekanisha igihugu cyabo n’indangagaciro zacyo; hanashyizweho umuganda ngarukamwaka ku nkengero z’inyanja ya Ruguru (Mer du Nord), ugashimwa n’abahisi n’abagenzi babona icyo gikorwa.

Umutangana n’itsinda ryatowe bavuze ko bagiye gukomereza aho abandi bari bageze.

Ambasaderi Rugira Amadin yashimye Abanyarwanda baba muri icyo gice, avuga ko afite amakuru ko barimo abakozi.

Yabifurije umunsi mukuru w’Intwari u Rwanda rwizihiza, ku ya 1 Gashyantare, anabashishikariza kwihesha agaciro nk’Abanyarwanda.

Yagize ati “Turacyari mu bihe byo kwizihiza Intwari z’u Rwanda, kandi zizakomeze zibabere urugero muhore mwanga umugayo, kugira indangagaciro zanyu nk’abanyarwanda zikomeze zibarange. Natwe tuzakomeza kubaba hafi nk’Ambasade muri gahunda ziri imbere.”

Imijyi yo mu Bubiligi isigaje gutorerwamo abahagararira Abanyarwanda ni Mons, Leuven na Bruxelles bazatora ku wa 24 Gashyantare 2018, Charleroi na Brabant-Wallon biteganyijwe ko bazatora ku wa 3 Werurwe 2018.

Umutangana Yvette wongeye gutorwa nka Perezida uyoboye DRB-Rugali Section Flandre Occidentale
Ambasaderi w’u Rwanda, Rugira Amadin ari kumwe na Komite y'Abayoboye DRB-Rugali Section Flandre Occidentale
Abanyarwanda bo muri DRB-Rugali Section Flandre Occidentale bakurikiye ibiganiro ari benshi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza