Mombasa:Abanyarwanda biyemeje kurushaho kugira uruhare mu guteza imbere igihugu

Yanditswe na IGIHE
Kuya 11 Ukuboza 2016 saa 02:37
Yasuwe :
0 0

Abanyarwanda bagera kuri 200 batuye i Mombasa muri Kenya, biyemeje kurushaho gutanga umusanzu mu bikorwa biteza imbere igihugu cyabo, ubwo bahuriraga hamwe mu mpera z’icyumweru gishize.

Inama yabahuje yari igamije kungurana ibitekerezo ku ruhare rwabo mu bikorwa biteza imbere u Rwanda ndetse banagiranye ibiganiro n’abadepite bari bitabiriye imikino ihuza inteko zigize umuryango wa Afurika y’Iburasirazuba, I Mombasa.

Iyi nama yayobowe na Ambasaderi w’u Rwanda muri Kenya, James Kimonyo, wabanje gushima uruhare rw’abanyarwanda muri gahunda zitandukanye ziteza imbere igihugu.

Yagize ati “ Badepite, ndagira ngo mbabwire ko abanyarwanda batuye i Mombasa bubahiriza inshingano zabo ubihuje n’uburyo bitabiriye ari benshi amatora ya referendumu umwaka ushize. Twateguye umuhango wo kwibuka ku nshuro ya 22 Jenoside yakorewe Abatutsi, aba bantu ntibadutenguha. Nagira ngo mbashimire.”

Muri iyi nama haganiriwe ku byo u Rwanda rumaze kugeraho mu nzego zitandukanye z’ubuzima mu myaka 22 ishize, ahanini byashobotse binyuze muri gahunda z’umwimerere w’igihugu n’ubunararibonye bwa Perezida Paul Kagame ndetse n’uruhare rw’abaturage barimo n’abo muri Diaspora.

Depite Jean Marie Gatabazi, yatanze ikiganiro kuri gahunda ya Ndi Umunyarwanda igamije komora ibikomere no guhuza Abanyarwanda bakarenga amacakubiri ashingiye ku moko.

Ati “Ndi Umunyarwanda ni urubuga abanyarwanda bahuriramo bakaganira mu buryo bweruye ku mateka yabo, bacicuza bakababarirana bagakira hagamijwe kuba abaturage babereye igihugu.Abatuye hano i Mombasa namwe murasabwa kugira uruhare muri iyi gahunda ifatiye runini ubumwe n’ubwiyunge.”

Muri iyi nama kandi hagaragajwe ibibazo bijyanye no kubona ibyangombwa byo gukorera muri Kenya, aho Ambasaderi Kimonyo n’abahagarariye Inteko ya Afurika y’Iburasirazuba biyemeje gufatanya kureba uko iki kibazo cyakemuka mu buryo burambye.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza