Murangira yatorewe kuyobora Ibuka-Suisse

Yanditswe na Philbert Girinema
Kuya 1 Ukuboza 2016 saa 03:04
Yasuwe :
0 0

Murangira César, niwe watorewe kuyobora Umuryango utegamiye kuri leta, Ibuka-Suisse, ukorera mu Busuwisi, ugamije guharanira inyungu z’abacitse ku icumu rya Jenoside yakorewe Abatutsi.

Aya matora yabereye i Lausanne, ku wa Gatandatu tariki ya 26 Ugushyingo, aho abanyamuryango bagize inama rusanjye ya Ibuka-Suisse bateranye bagatora komite nshya.

Murangira watowe azanayobora ihuriro rya Ibuka-Europe rigizwe na Ibuka yo mu Buholandi, iyo mu Butaliyani, iyo mu Bubiligi n’iyo mu Bufaransa, kuko Ibuka-Suisse ari yo itahiwe kuriyobora nkuko buri myaka ibiri kimwe mu bihugu ririgize ryitoramo uyobora.

Ibuka-Suisse yashinzwe tariki ya 28 Gicurasi 1995. Yemewe n’Umuryango w’Abibumbye, nk’umuryango ngishwanama mu byerekeye Jenoside yakorewe Abatutsi no guhangana n’ingaruka zayo.

Naho Ibuka-Europe ni ihuriro ryatangiye muri 2003, amasezerano yo gukora byemewe n’amategeko ashyirirwaho umukono i Paris tariki ya 20 Ugushyingo 2010.

Kuva mu 1995 kugeza muri 2003, Ibuka-Suisse yayobowe na Gilbert Condo, Dr Michel Gakuba ayiyobora mu 2003 kugeza mu 2016.

Uretse César Murangira watowe nka Perezida w’uyu muryango, Jean-Paul Bugabo yatowe nk’umubitsi, Justin Gahigi yatorewe ibijyanye n’ubutabera, Jeanne-d’Arc Mukantabana atorerwa kwita ku mishinga iteza kandi ifasha abacitse ku icumu rya jenoside yakorewe Abatutsi , Perpétue Uwimana agirwa aba umunyamabanga na Denise Jordan uzafasha gushaka inkunga.

Murangira César watorewe kuyobora Ibuka-Suisse

Murangira avuga ku nshingano bihaye yagize ati “Ibuka-Suisse ifite ingamba zo gukomeza kurwanya ingengabitekerezo ya Jenoside yakorewe Abatutsi igenda ifata intera ndende uko imyaka ihita indi igataha.”

“Twifuza kubigeraho dusobanurira Abasuwisi, cyane urubyiruko Jenoside yakorewe Abatutsi mu biganiro mbwirwaruhame, mu mashuri mato na za Kaminuza, mu mahuriro y’abanditsi b’ibitabo, mu mihango yo kwibuka, gushyiraho urwibutso nyir’izina mu Busuwisi rwa Jenoside yakorewe Abatutsi, n’ibindi.”

Yavuze kandi ko bazakomeza gufatanya n’ubutabera mu gukurikirana abakoze Jenoside yakorewe Abatutsi bakidegembya mu Burayi, gukomeza gufasha abacitse ku icumu mu Busuwisi no mu Rwanda, gukomeza gufatanya n’izindi Ibuka zihuriye mu ihuriro rya Ibuka-Europe mu kurwanya bivuye inyuma abashaka kugoreka cyangwa gupfobya no guhakana amateka ya Jenoside yakorewe Abatutsi mu 1994.

Dr Michel Gakuba we yayoboye uyu muryango kuva mu 2003 kugera mu 2016
Gilbert Condo wayoboye uyu muryango kuva mu 1995 kugera mu 2003
Jean Pierre Kagabo, Perezida wa Ibuka-Italie
Perezida wa Ibuka-Belgique, Déo Mazina
Perezida wa Ibuka-France, Marcel Kabanda
Perezida wa Ibuka-Hollande, Mundele Christian

[email protected]


Urifuza kuduha amakuru? Hamagara iyi nimero 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza