Abanyarwanda 500 bajyanwe n’abakoloni b’Abongereza muri Kenya bari mu gihirahiro cy’ubwenegihugu

Yanditswe na Uwishyaka Jean Louis
Kuya 13 Gashyantare 2017 saa 07:42
Yasuwe :
0 0

Abanyarwanda babarirwa muri 500 bamaze imyaka irenga 70 batuye muri Kenya barasaba gusubizwa ubwenegihugu nyuma yo kubwamburwa n’ubuyobozi bw’iki gihugu mu myaka 40 ishize.

Abasekuruza n’ababyeyi b’aba baturage bavanywe mu Rwanda n’abakoloni b’Abongereza mu myaka ya 1940 bajyanwa muri icyo gihugu gukora imirimo yiganjemo iyo gukora mu mirima y’icyayi mu gace ka Kericho no mu tundi dutandukanye.

Mu 1945, abo Banyarwanda bahawe ubwenegihugu bwa Kenya ndetse banahabwa indangamuntu z’icyo gihugu gusa nyuma y’imyaka 30 bazihawe, zaje gusimbuzwa n’igisa nayo cyongerwaga nyuma y’amezi atatu. Kuva icyo gihe bakomeje gusaba ubwenegihugu ariko kugeza n’ubu ntibarabuhabwa.

Mu Ukwakira umwaka ushize, Abanyarwanda batuye mu gace ka Makonde bagiye ku ngoro y’Umukuru w’igihugu gusaba gukemurirwa ikibazo kimaze imyaka itari mike ndetse bagenzi babo bagana Ambasade y’u Rwanda muri iki gihugu iherereye mu murwa mukuru Nairobi.

Icyo kibazo cyatumye James Kimonyo, Ambasaderi w’u Rwanda muri icyo gihugu, agirira uruzinduko mu gace ka Kericho, tariki 12 Ugushyingo 2016, kugira ngo ahure n’abafite icyo kibazo banakiganirire hamwe hagamijwe kugishakira umuti.

Muri icyo kiganiro, abo Banyarwanda bamutuye agahinda ko kutagira ubwenegihugu bituma hari uburenganzira batabona nk’abandi banya-Kenya. Bamubwiye ko mu mayaka ya 1980 leta ya Kenya yafashe umwanzuro wo kubasubiza mu Rwanda, ariko ubutegetsi bwariho icyo gihe bukabitera utwatsi buvuga ko ari abanya-Kenya.

Bahamya ko ikibazo cyo kutagira ubwenegihugu gituma hari abahimba ibyangombwa kugira ngo babashe kubona akazi cyangwa kohereza abana babo ku ishuri n’ibindi.

Gabriel Ndagijimana wavukiye muri ako gace mu 1940 mbere y’uko Kenya ibona ubwigenge yavuze ko kimwe na bagenzi be, basanga atari abanyakenya cyangwa Abanyarwanda, kandi bibabuza kubona zimwe mu serivise.

Ati “Ku myaka 77 sindigera mfunguza konti muri banki, sindatora, sindagura umutungo n’umwe; ku bw’ibyo ndambiwe kuba muri ibi bibazo ndetse ntewe ubwoba n’abana banjye.”

Nyirindekwe John wavutse ku babyeyi bombi b’Abanyarwanda mu 1940, yatangaje ko abana bavutse ku babyeyi batuye mu gace ka Kericho batemererwa kwiga mu mashuri ya leta kuko babarwa nk’abanyamahanga.

Ati “Tubona abana b’abaturanyi bacu baguwe neza na buruse ya leta ibafasha kugera ku nzozi zabo mu masomo mu gihe abacu batabibona kuko nta bwenegihugu dufite.”

Aba baturage basabye Amb. Kimonyo James kuganira na Perezida wa Kenya, Uhuru Kenyatta kugira ngo abafashe kuva mu gihirahiro.

Amb. Kimonyo yijeje aba baturage ko bitewe n’umubano mwiza u Rwanda rufitanye na Kenya ndetse no kuba ibihugu byombi bishyigikiye ukwihuriza hamwe kw’ibihugu byo mu Muryango w’ Afurika y’Uburasirazuba, Guverinoma y’iki gihugu izabasha gushaka igisubizo kirambye cy’iki kibazo mu gihe kidatinze.

Imwe mu ngingo z’Itegeko Nshinga rya Kenya ivuga ko umuntu wese yitwa Umunyakenya mu gihe umwe mu babyeyi be yari umuturage w’iki gihugu igihe yabyarwaga, hatitawe aho yaba yaravukiye.

Amb James Kimonyo (ibumoso) yijeje abo baturage ko ikibazo cyabo kizashakirwa igisubizo bidatinze

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza