00:00:00 IGIHE NETWORK KN KINYARWANDA EN ENGLISH FR FRANCAIS

Abanyarwanda baba muri Uganda bibutse Jenoside, basabwa guhashya abapfobya

Yanditswe na Mutangana Gaspard
Kuya 18 Mata 2021 saa 08:04
Yasuwe :
0 0

Kuri yu wa Gatandatu, Ambasaderi w’u Rwanda muri Uganda, Col. Rutabana Joseph, yasabye imbaraga mu guhangana n’abapfobya bakanahakana Jenoside yakorewe Abatutsi kuko ari bumwe mu buryo bwo guharanira ko itazongera ukundi.

Ibi ambasaderi Rutabana yabibwiye abitabiriye umuhango wo kwibuka ku nshuro ya 27 abazize Jenoside yakorewe Abatutsi, wabereye ku Rwibutso rwa Lambu, ruherereye i Masaka muri Uganda.

Uru rwibutso ruruhukiyemo imibiri y’Abatutsi 3 337 bazize Jenoside muri Mata 1994.

Uyu muhango witariwe n’abanyacyubahiro batandukanye barimo Simon Duku Micheal uhagarariye Sudan y’Epfo mu Rwanda, akagira icyicaro muri Uganda, Ambasaderi wa Eritrea muri Uganda, uhagarariye Norvège mu Rwanda ufite icyicaro muri Uganda, Abanyarwanda batuye muri Uganda n’inshuti z’u Rwanda.

Ambasaderi w’u Rwanda muri Uganda yashimiye Guverinoma y’iki gihugu kuba itarirengagije imibiri y’Abatutsi bishwe bakajugunywa mu migezi n’ibiyaga, ikabakuramo bagashyingurwa mu cyubahiro.

Ati “Mu gihe cy’iminsi ijana, Abatutsi bishwe amahanga arebera, imiryango mpuzamahanga iri kujya impaka ku nyito y’ibyaberaga mu Rwanda. Ndashimira Guverinoma ya Uganda n’abanya-Uganda ubumuntu n’ubufatanye batweretse, ubwo bakuraga imibiri y’abazize Jenoside yakorewe Abatutsi mu migezi n’ibiyaga, kugira ngo ishyingurwe mu cyubahiro.”

Ambasaderi Rutabana kandi yasabye abitabiriye uyu muhango kurwanya ingengabitekerezo ya Jenoside, batibagiwe guhashya abahakana Jenoside n’abayipfobya.

Yavuze ko kwibuka abazize Jenoside yakorewe Abatutsi muri Mata 1994, ari uburyo bwo guhashya abayihakana n’abayipfobya.

Umuhango wo kwibuka abazize Jenoside yakorewe Abatutsi ku nshura ya 27 muri Uganda, witabiriwe n’abantu bake mu rwego rwo gukumira ikwirakwira rya Covid-19.

Hacanywe urumuri rw'icyizere mu kwerekana icyerecyezo cy'u Rwanda rushya
Abanyacyubahiro batandukanye bashyira indabo ku mva ishyinguyemo abatutsi bishwe muri Jenoside bashyinguye muri Uganda
U Rwanda rwashimiye Uganda kuba yaremeye ko hubakwa urwibutso rwa Jenoside rushyingiyemo imibiri y'abatutsi bishwe
Abayobozi batandukanye barimo n'abadipolomate bifatanyije n'abanyarwanda muri Uganda mu kwibuka Jenoside

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .