Imyaka 23 irashize Ibuka-Belgique ivutse igaharanira inyungu z’abarokotse Jenoside yakorewe Abatutsi

Yanditswe na Karirima A. Ngarambe
Kuya 16 Kanama 2017 saa 06:02
Yasuwe :
0 0

Umuryango Ibuka-Belgique uharanira inyungu z’abarokotse Jenoside yakorewe Abatutsi mu 1994 wujuje imyaka 23 ushinzwe.

Uyu muryango washinzwe kuwa 16 Kamena 1994, bivuye ku gitekerezo cyavuye mu Banyarwanda bari batuye mu Bubiligi icyo gihe, muri bo harimo Eugène Twagira Mutabazi wageze mu Bubiligi mu mwaka 1990 ariko akababazwa n’urupfu bishe abantu muri Jenoside yakorewe Abatutsi harimo n’abo mu muryango we yari yarasize i Rwanda.

Ishyirwaho ry’uyu muryango ntabwo byabaye ibintu byoroshye mu Bubiligi bitewe n’amateka y’u Rwanda n’u Bubiligi, yaba ay’ubukoloni u Bubiligi buyobora u Rwanda, hakaba hari n’ uruhare rwayo kuri Jenoside yakorewe Abatutsi.

Abanyapolitiki ntibishimiye ivuka rya Ibuka-Belgique kuko bumvaga byatuma amashyaka atavuga rumwe n’ayari ku butegetsi icyo gihe agira aho ahera anenga uko u Bubiligi bwitwaye mu mateka y’u Rwanda, urupfu rw’abasirikare 10 b’Ababiligi baguye i Rwanda bishwe n’ibindi.

Habayeho imbaraga no gushyira hamwe ku bantu b’ingeri nyinshi zitandukanye, Ababiligi n’Abanyarwanda baraye amajoro Ibuka igera aho ibona izuba tariki ya 16 Ugushingo 1995.

Mu ntangiriro, igikorwa cya mbere cyateguwe na Ibuka-Belgique cyakozwe tariki ya 7 Mata 1995 hibukwa imbaga y’abarenga miliyoni bishwe muri Jenoside yakorewe Abatutsi mu 1994. Iki gikorwa cyakurikiwe n’izindi nyandiko nyinshi zo kwamagana abakoze jenosideri bari hirya no hino ku isi, aha umuntu yavuga nk’iyamaganwa rya Kabuga Filicien wari ukiri muri Congo icyo gihe.

Ibuka-Belgique yagiye iyoborwa n’abantu batandukanye barimo Pasteur Kageruka; Eugène Twagira Mutabazi; André-Martin Karongozi; François Kayitakire; Placide Kalisa; Albert Hangu; Eric Rutayisire na Deo Mazina uyiyobora ubu.

Ibuka - Belgique niyo Ibuka ya mbere yashinzwe ku isi, nyuma haza kuvuka izindi; dore uko zagiye zikurikirana mu kuvuka: Ibuka-Belgique, Ibuka-Suisse, Ibuka-Rwanda, Ibuka-France ,Ibuka-Hollande, Ibuka-Europe na Ibuka-Italie.

Izina Ibuka Mémoire & Justice – Belgiaque ryavuye mu yandi menshi yari yatanzwe ariko aza gusanga "IBUKA" ariryo zina rivuga neza ibyo bifuzaga ko byumvikana, ryaratanzwe n’uwitwa Bizimana Jean ; ryaje kwemezwa nyuma y’ impaka nyinshi.

Deo Mazina uyoboza Ibuka-Mémoire & Justice mu Bubiligi

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza