Korea y’Epfo: Amb. Isumbingabo yagaragaje ko kwibohora nyako kujyana n’impinduka mu mibereho

Yanditswe na IGIHE
Kuya 11 Nyakanga 2018 saa 09:29
Yasuwe :
0 0

Abanyarwanda baba muri Koreya y’Epfo bahuriye mu Mujyi wa Seoul mu birori byo kwizihiza ku nshuro ya 24 umunsi wo kwibohora.

Ibi birori byabereye kuri Crown Hotel, i Seoul ku wa 8 Nyakanga 2018, byahuriyemo abasaga 90 barimo Abanyarwanda baba muri iki gihugu, inshuti zabo ndetse n’abayobozi mu nzego nkuru za leta.

Ambasaderi w’u Rwanda muri Korea y’Epfo, Isumbingabo Emma Françoise, yashimiye abifatanyije na bo mu kwishimira igihe gishize Abanyarwanda bibohoye ubutegetsi bubi.

Yagize ati “Kwibohora bivuze muri rusange ubwisanzure mu bitekerezo, mu bikorwa, mu burenganzira bw’ibanze nk’umwenegihugu, ibyo bikagaragarira mu kwiha agaciro, kugaha abandi no kugaha igihugu cyakubyaye.”

Ambasaderi Isumbingabo yashimangiye ko kwibohora kuzuye gukwiye kujyana n’ibikorwa biteza imbere abaturage.

Yagize ati “Igisobanuro nyamukuru cy’umunsi nk’uyu ni uko ubuzima bw’Abanyarwanda buhinduka, bukagira aho buva, bukagira ikindi cyerekezo gishya, kigamije iterambere bifuza. Mureke twitabire inshingano zacu zo kubaka urwatubyaye n’umutima wacu wose. Dufate iya mbere dukore, twiyubakire igihugu, twange agasuzuguro, twiheshe agaciro. Uko niko kwibohora tugezemo muri iki gihe tuganisha igihugu cyacu ku iterambere rirambye.”

Yagaragaje ko u Rwanda rufite ibyo rwishimira rumaze kugeraho nko kugarura ubumwe bw’Abanyarwanda, guharanira ubusugire n’umutekano w’abantu n’ibyabo, guharanira ubutegetsi bushingiye kuri demokarasi, guharanira ubukungu bushingiye ku mutungo bwite w’igihugu, kurwanya ruswa no gutonesha, guharanira imibereho myiza y’abaturage, gucyura impunzi no gukuraho impamvu zitera ubuhunzi, guharanira ububanyi n’amahanga bushingiye ku buhahirane, ubufatanye n’ubwubahane no kurwanya Jenoside n’ingengabitekerezo yayo.

Umuyobozi w’Abanyarwanda batuye muri Korea y’Epfo, Rwigema James, yagaragaje intambwe u Rwanda rwateye mu myaka 24 ishize ashimangira ko bifite inkomoko ku buyobozi bwiza igihugu gifite.

Yasabye urubyiruko gufata iya mbere mu gukomeza urugamba rwo guteza igihugu imbere kuko hari bagenzi barwo bitangiye kukibohora.

Ibirori by’umunsi wo kwibohora byabimburiwe n’imikino y’umupira w’amaguru na Basketball yahuje Abanyarwanda batuye muri Korea y’Epfo. Ababyitabiriye bataramiwe n’Itorero Umucyo rigizwe n’Abanyarwanda batuye muri iki gihugu.

Ambasaderi Isumbingabo yashimangiye ko kwibohora kuzuye gukwiye kujyana n’ibikorwa biteza imbere abaturage

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza