00:00:00 IGIHE NETWORK KN KINYARWANDA EN ENGLISH FR FRANCAIS

Ntihazagire ubabeshya ko indege ya Habyarimana ariyo ntandaro ya Jenoside- Amb Nkulikiyinka

Yanditswe na Karirima A. Ngarambe
Kuya 14 Mata 2021 saa 09:41
Yasuwe :
0 0

Ambasaderi Christine Nkulikiyinka uhagarariye u Rwanda mu Burayi bw’Amajyaruguru, yavuze ko abitwaza ihanurwa ry’indege ya Habyarimana Juvénal wari Perezida w’u Rwanda nk’imbarutso ya Jenoside yakorewe Abatutsi mu 1994 ari abirengagiza ukuri ku mugambi wo gutsemba Abatutsi wari warateguye kuva cyera.

Yabigarutseho ku wa 11 Mata 2021, ubwo Ambasade y’ u Rwanda muri Suède, ku bufatanye n’Umuryango w’Abanyarwanda bahatuye ndetse n’inshuti zabo zaturutse hirya no hino mu bihugu n’abari mu Rwanda bibukaga ku nshuro ya 27 Jenoside yakorewe Abatutsi.

Ni ibikorwa byari byatumiwemo Umunyamategeko Me Gisagara Richard, watanze ikiganiro gisobanura ikibazo cyo guhakana no gupfobya Jenoside yakorewe Abatutsi muri Diaspora ndetse anagaragaza ibyafasha mu guhangana cyangwa guharanira ko abakora ibyo byaha bagezwa mu butabera.

Muri uyu muhango kandi hari hatumiwemo Diane Uwineza watanze ubuhamya bw’uko yarokotse Jenoside yakorewe Abatutsi ubwo yari afite imyaka icyenda gusa ndetse abo mu muryango we hafi ya bose barishwe muri Jenoside.

Amb. Nkulikiyinka wari umushyitsi mukuru muri iki gikorwa yavuze ko kwibuka Jenoside yakorewe Abatutsi ari umwanya mwiza wo kwereka abakoze ayo mahano izuba riva ko batageze ku ntego yabo.

Yakomeje agira ati “N’abo bafite ingengabitekerezo yo guhakana cyangwa gupfobya amateka ya Jenoside yakorewe Abatutsi bicwe n’ipfunwe kugeza bacecetse kuko ukuri kuzatsinda kandi ubucamanza buzabakurikirana aho bari hose.”

By’umwihariko abahakana bakanapfobya Jenoside yakorewe Abatutsi bakoresha amayeri menshi arimo kuvuga ko imbarutso yayo ari ihanurwa ry’indege ya Habyarimana wari Perezida w’u Rwanda kuva mu 1973 kugeza mu 1994.

Ibi ariko binyuranye n’ukuri kuko Jenoside ubwayo, itegurwa, ingengabitekerezo yayo ikigishwa hagambiriwe ubwoko cyangwa igice kimwe cy’abantu, ikageragezwa ndetse ikagera ubwo ishyirwa mu bikorwa. Ibi kandi ninako byagenze kuri Jenoside yakorewe Abatutsi mu 1994.

Amb Nkulikiyinka yavuze ko Jenoside nta kindi gisobanuro igira yihaniza abakomeza gushaka no guhuza Jenoside yakorewe Abatutsi n’ihanurwa ry’indege ya Habyarimana.

Ati “Reka mbabwire ko nta gisobanuro kindi cyangwa impamvu yindi Jenoside igira, ntihazagire ushaka kubabwira ngo ni uko indege ya Habyarimana yahanuwe, Oya! Jenoside yakorewe Abatutsi ifite impamvu imwe gusa: Ubugome bwindengakamere.”

Amb Nkulikiyinka yavuze ko muri iyi minsi 100 yo kwibuka, ahibukwa abarenga miliyoni bishwe bazize ko ari abatutsi ari ‘Kubibuka , tukabaha icyubahiro n’ agaciro bakwiye bambuwe’.

Yakomeje agira ati “Kuba twongeye guhurira aha ku mbuga nkoranyambaga, ni uko icyorezo cya Covid-19, kicyugarije Isi. Ndabihanganishije kandi ubu tudashobora guhura ngo twibuke turi kumwe nkuko twajyaga tubikora mbere y’uko icyorezo gitera.”

Amb Nkulikiyinka yakomeje abarokotse Jenoside yakorewe Abatutsi avuga ko ubuyobozi bwiza bw’igihugu n’abandi banyarwanda ndetse n’inshuti zabo bazakomeza guharanira ko ibyabaye bitazongera kubaho na rimwe.

Ati “Mu gukomeza no kuba hafi abarokotse ubwo bwicanyi ndengakamere, turanabashimira ukwihangana kwabo, kwitanga, imbaraga n’ ubumuntu bidasanzwe bagaragaje mu kwiyubaka no kubaka igihugu cyacu. Nta gaciro umuntu yabibonera. Namwe mwese abo twari kumwe muri iki gikorwa cyo kwibuka, aho muherereye muri Suède ndetse no mu bindi bihugu, mwakoze kuza kwifatanya mwese kwibuka ku nshuro ya 27 jenoside yakorewe Abatutsi mu Rwanda mu 1994.”

Yakomeje agira ati “Iyo tubibuka, twibuka buri muntu ku giti cye, tukibuka n’imryango yabo muri rusange, buri muntu Imana yiremeye, tubibuka kuko babayeho, kuko bafite ibyiza byinshi bakoze tubibukiraho, n’ibindi babujijwe kwigezaho no kugeza ku babo n’igihugu cyabo muri rusange ndetse n’umugabane w’Afurika, niho jenoside ibera igihombo gikomeye.”

Amb Nkulikiyinka yavuze ko muri iki gihe yo kwibuka no guharanira ko Jenoside itazongera kubaho ukundi, abantu bagomba guhora bari menge barwanya bamwe bayihakana babigize akazi kabo ka buri munsi.

Ati “Abayihakana, benshi barimo abayikoraga, mu gihe bayikoraga bari barapanze n’uko bahisha cyangwa basibanganya ibimenyetso by’uko bayiteguye bakayishyira mu bikorwa. Muri iyi minsi bongeye kwigaragaza cyane, biradusaba kuba maso tukabatesha uwo mugambi mubisha bakomeje bateguye.”

Yashimye uruhare rw’urubyiruko mu gutegura Kwibuka ku nshuro ya 27 Jenoside yakorewe Abatutsi, avuga ko byerekana ko nabo bamaze kumenya impamvu, agaciro n’uburemere bwo kwibuka jenoside yakorewe Abatutsi yabasize ari imfubyi.

Amb. Nkulikiyinka yavuze ko ibikorwa byo kwibuka ari n’inkinfashanyigisho ifasha kurwanya abagifite ingengabitekerezo n’abahakana ko Jenoside yakozwe cyangwa bakayipfobya.

Ati “Birababaje cyane kubona nyuma y’imyaka 27 hakiboneka ibyobo bajugunyemo Abatutsi bishwe, kandi bikaboneka ahantu abantu bagenda, banatuye, birerekana ko hakiri inzira ndende. Ariko nta gucika intege. Kandi twese tugomba gufatanya.”

Amb. Nkulikiyinka avuga Ijambo mu gihe cyo kwibuka ku nshuro ya 27 jenoside yakorewe Abatutsi, umuhango wateguwe n’Ambasade y’u Rwanda muri Suède ifatanyije n’abanyarwanda bo muri Diaspora muri icyo Gihugu
Diane Uwineza watanze ubuhamya bw’uko yarokotse i Nyanza ya Kicukiro bakica se na nyina
Me Gisagara yatanze ikiganiro ku kurwanya abahakana n'abapfobya Jenoside yakorewe Abatutsi n’uruhare rwa Diaspora
Herekanywe filime ku mayeka y’u Rwanda muri Jenoside yakorewe Abatutsi
Abantu batandukanye bakurikiranye uyu muhango bifashishije ikoranabuhanga
Abatanze ibiganiro muri uyu muhango wo kwibuka

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .