U Burusiya:Abanyarwanda basabwe kuzitabira amatora y’Umukuru w’Igihugu

Yanditswe na Philbert Girinema
Kuya 11 Mutarama 2017 saa 07:52
Yasuwe : XX
0

Abanyarwanda biga, abakorera n’abatuye mu mijyi itandukanye mu Burusiya bahuriye i Moscow mu mpera z’icyumweru gishize mu birori byo kwifurizanya umwaka mushya muhire, banaganira ku ngamba z’umwaka zijyanye no gukomeza indangagaciro z’ubutore.

Ambasaderi w’u Rwanda mu Burusiya, Dr Jeanne d’Arc Mujawamariya yabasabye kuzitabira amatora y’umukuru w’igihugu ateganyijwe kuya 3 Kanama 2017.

Yagize ati “Ni ngombwa ko nk’Abanyarwanda dutuye mu Burusiya twese twazitabira gutora dore ko ari n’uburenganzira bwa buri wese uzashaka kuzuza izo nshingano z’umunyarwanda.”

Mu gihe amatora y’umukuru w’igihugu biteganyijwe ko azaba kuya 4 Kanama ku Banyarwanda baba imbere mu gihugu, abatuye muri Diaspora azakorwa kuya 3 z’uko kwezi.

Ku cyicaro cya Ambassade y’u Rwanda mu Burusiya giherereye mu mujyi wa Moscow niho biteganyijwe ko hazakoreshwa nk’ibiro by’itora.

Ambasaderi Mujawamariya yibukije abari aho ko mu Nama y’Igihugu y’Umushyikirano iheruka, haganiriwe ku korohereza abanyarwanda batuye mu bihugu binini aho bishoboka, ndetse Minisitiri w’Ububanyi n’Amahanga Louise Mushikiwabo akaba yaravuze ko biri kuganirwaho.

Uretse kandi gushishikariza Abanyarwanda kuzitabira amatora y’umukuru w’igihugu, Ambasaderi Mujawamariya yongeye kubakangurira gukomeza indangagaciro nyarwanda, aho yabasabye kwishyira hamwe bagatera ingabo mu bitugu gahunda za Leta zituma igihugu gikomeza kwesa imihigo.

Imwe muri iyo mihigo y’u Rwanda Dr Mujawamariya yagarutseho ni uburyo u Rwanda rwagabanyije imibare y’abana bapfaga bavuka cyangwa abapfaga batarageza ku myaka itanu ndetse na gahunda y’ubwisungane mu kwivuza yatumye Abanyarwanda bagira amahirwe yo kwivuza mbere yo kuremba.

Ambasaderi Mujawamariya yavuze ko gahunda y’ubwisungane mu kwivuza ari imwe mu nkingi mwikorezi y’ibipimo bimwe na bimwe bigenda bigerwaho mu Rwanda bityo buri wese akaba asabwa gutera Leta ingabo mu bitugu zimwe muri izo gahunda z’ingirakamaro kuko buri wese uri mu Burusiya afite akamaro yamarira mugenzi we uri mu Rwanda.

Ambasaderi kandi yasabye aba Banyarwanda kurangwa n’indangagaciro z’ubutore, bagakora cyane ndetse bagaharanira kuba urugero rwiza aho bari, cyane abanyeshuri kuko umusaruro wabo ufungurira amarembo abandi bana b’u Rwanda mu kubona amahirwe mu mashuri akomeye yo mu Burusiya.

Abanyarwanda bari muri diaspora y’u Burusiya bagera ku 100 bakaba biganje cyane mu mijyi ya Moscow, St Petersburg, Krasnodar, Volgograd na Voronezh. Abenshi muri aba, baba muri iki gihugu ku mpamvu z’amasomo.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza