Abanyarwanda baba muri Amerika bahuje imbaraga mu kurwanya abahakana n’abapfobya Jenoside

Yanditswe na IGIHE
Kuya 7 Gicurasi 2019 saa 02:39
Yasuwe :
0 0

Diaspora Nyarwanda muri Amerika ifatanyije n’Umuryango w’Abanyarwanda bahatuye n’Uwabacitse ku icumu rya Jenoside yakorewe Abatutsi muri Leta ya Texas bihurije hamwe mu rugamba rwo gukomeza guhangana n’abakomeje kubiba ingengabitekerezo ya Jenoside.

Mu gihe u Rwanda rwibuka Jenoside yahitanye inzirakarengane z’Abatutsi basaga miliyoni, hari abakibiba ingengabitekerezo ya Jenoside mu magambo n’inyandiko ziyihakana, zikanayipfobya.

Mu minsi ishize, itsinda ry’abantu barimo Gatebuke Claude; Judi Rever ukomoka muri Canada n’abiyise ‘Inshuti za Congo’, bifashishije imbuga nkoranyambaga mu kugaragaza ko mu Rwanda habaye Jenoside ebyiri.

Umwanditsi Judi si ubwa mbere agaragaye mu bikorwa bipfobya Jenoside. Yanditse igitabo “In Praise of Blood: The Crimes of Rwandan Patriotic Front” ugenekereje mu Kinyarwanda “Mu gushimagiza amaraso, ibyaha byakozwe na FPR Inkotanyi.”

Muri iki gitabo cyatangajwe muri Mata 2018, Judi Rever yavuze ko gikubiyemo iperereza yakoze mu myaka 20. Kivuga ko FPR Inkotanyi yakoze ubwicanyi muri Jenoside yakorewe Abatutsi mu 1994. Iyi ni imwe mu maturufu akoreshwa n’abashaka guhakana ibyabaye mu Rwanda bigiza nkana.

Kigisohoka cyamaganiwe kure n’Abanyarwanda bazi ukuri mpamo kw’ibyabaye, bagaragaza ko kigamije kugoreka amateka igihugu cyanyuzemo no gukingira ikibaba abakoze amahano.

Judi n’abo bakorana bongeye guhabwa umwanya wo gutanga ibiganiro muri kaminuza zitandukanye muri Amerika, ibyo Abanyarwanda bagaragaje ko batishimiye kuko bigamije gupfobya Jenoside yakorewe Abatutsi.

Mu gufatana urunana no kurwanya abapfobya Jenoside, Abanyarwanda batuye mu Mujyi wa Dallas muri Leta yaTexas, bateguye ikiganiro cyabaye ku wa 24 Mata 2019, cyo kunyomoza ibikubiye mu gitabo cya Judi Rever.

Icyo kiganiro cyabereye muri Kaminuza ya Tarrant County College, cyitabiriwe n’abasaga 350 barimo abanyeshuri n’abarimu n’Abanyarwanda batuye i Texas.

Ilibagiza Valentine warokotse Jenoside yatanze ubuhamya bw’ibyamubayeho muri Jenoside, abo yamaze amajoro n’amanywa atagoheka kubera guhigwa bukware.

Yasangije abari aho uko yongeye kwigarurira icyizere nyuma yo guca mu bikomeye.

Jenoside ni ubwicanyi butegurwa, bugakorwa hakurikijwe ibyiciro birimo gushyira abantu mu byiciro, kubaha ibimenyetso bibaranga, kubakorera ivangura, kubambura ubumuntu kugeza abantu batangiye gutotezwa no gutsembwa. Ibi bikurikirwa no guhakana, gupfobya no gusibanganya ibimenyetso.

Umuyobozi uri mu bashinzwe Uburezi mu nzu Ndangamateka ya Jenoside yakorewe Abayahudi iri i Dallas, Charlotte Decoster, yavuze ko ‘Kuba hari abahakana Jenoside yakorewe Abatutsi ari ikimenyetso kigaragaza ko yabaye’.

Nubwo u Rwanda rwashegeshwe cyane ariko abarutuye ntibaheranwe n’agahinda, ahubwo bariyubatse, banimakaza ubumwe n’ubwiyunge mu barutuye.

Umuyobozi wa Diaspora Nyarwanda muri Amerika, Prof. Mussine Yves, yavuze uko u Rwanda rwabaye igihugu kitubakiye ku moko.

Yagize ati “Ushobora kwibaza nyuma y’imyaka 25 Jenoside ibaye, abantu bari abana, ubu bemeye kwirengagiza ububabare bwabo bubaka indangamuntu nshya ariyo “ Ndi Umunyarwanda’’, ibyo byose bigaragaza ishyaka ryo kuba Umunyarwanda mbere y’ibindi byose.’’

Prof Musiine wigisha muri Kaminuza ya Martin muri Indianapolis yavuze ko nta muntu ukwiye kwemererwa gusenya ibyo igihugu cyagezeho.

Ati “Ntabwo Abanyarwanda tuzigera twemerera umuntu uwo ariwe wese gusenya ibyo twubatse, turi kubungabunga cyangwa uwashaka gutoba amateka no gusenya ubumwe twaharaniye kugeza uyu munsi.”

Iki kiganiro cyanagaragarijwemo uruhare amashuri makuru na za kaminuza bikwiye kugira mu bikorwa byo kurwanya Jenoside.

Perezida wa Tarrant County College, Dr.Tahita Fulkerson, yijeje ko agiye kuba intumwa yihariye mu rugamba rwo kurwanya abahakana n’abapfobya Jenoside yakorewe Abatutsi.

Ikiganiro cyabereye muri Kaminuza ya Tarrant County College cyitabiriwe n’abasaga 350 barimo Abanyarwanda batuye muri Leta ya Texas
Ilibagiza Valentine ni we watanze ubuhamya bugaragaza uko yarokotse Jenoside yakorewe Abatutsi
Abanyarwanda baba muri Amerika bahuje imbaraga mu kurwanya abahakana n’abapfobya Jenoside yakorewe Abatutsi mu 1994
Gatebuke Claude uri mu bakomeje gupfobya Jenoside yakorewe Abatutsi, agamije gushaka amaronko
Umunyamakuru ukomoka muri Canada, Judi Rever, ari mu banyamahanga bakomeje gutiza umurindi ibikorwa byo guhakana no gupfobya Jenoside yakorewe Abatutsi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza