Abanyarwanda baba muri Sénégal bibukijwe kwitabira Umushyikirano

Yanditswe na Ishimwe Israel
Kuya 3 Ukuboza 2016 saa 12:58
Yasuwe :
0 0

Ambasaderi w’u Rwanda muri Sénégal, Dr. Mathias Harebamungu, yashimiye Umuryango w’Abanyarwanda baba muri Sénégal, ACRS, (Association de la Communauté Rwandaise au Sénégal), ubunyangamugayo n’uruhare bagira muri gahunda zose za Leta zihesha igihugu ishema, anabasaba kwitabira ibikorwa bikomeye biteganyijwe muri uyu mwaka birimo Urunana rw’Urungano n’ Umushyikirano.

Mu gihe umwaka wa 2016 ugenda ugana ku musozo, abayobozi bakuru mu nzego zitandukanye ndetse n’Abanyarwanda baba mu gihugu no hanze yacyo bazahurira mu Nama y’Igihugu y’Umushyikirano, izaba ku nshuro yayo ya 14, iteganyijwe kuya 14 na 15 Ukuboza.

Ifite insanganyamatsiko igira iti “Dufatanyije twubake u Rwanda twifuza.”

Iyi nama izabanzirizwa n’Itorero Urunana rw’urungano, rihuza urubyiruko rufite hagati y’imyaka 25 na 40, rizabera i Gabiro kuva tariki ya 7 kugeza kuya 14 Ukuboza.

Ibi ni bimwe mu byo yagarutseho ubwo yaganiraga n’Abanyarwanda bagera ku 130 baba muri iki gihugu, ku wa Gatandatu tariki ya 26 Ugushyingo 2016, bahuriye mu bikorwa bya siporo, iby’umuco Nyarwanda ndetse bagirana n’ubusabane.

Ambasaderi Dr Harebamungu yabibukije indangagaciro z’u Rwanda abakangurira kwibonamo Ndi Umunyarwanda kugira ngo babashe gusigasira ibibahuza byubaka, byose bigakorwa bihesha agaciro.

Yasabye urubyiruko kwitabira Urunana rw’Urungano ndetse ahamagarira Abanyarwanda muri rusange kwitabira Umushyikirano. Yabasabye kwitegura kare no kuzitabira ku bwinshi amatora y’umukuru w’igihugu ateganyijwe muri 2017.

Muri ibi bikorwa abana bahiganwe mu kwiruka ndetse hakinwa n’imikino itandukanye irimo uw’amaguru, Volleyball na Basketball mu kurushaho gusabana n’abantu b’ingeri zose.

Abanyamuryango ba ACRS bahize ko bazakomeza gutahiriza umugozi umwe mu kurushaho kubaka igihugu.

Mu muvugo witwa "Afurika ishyize hamwe" wavuzwe na Yasmina Traoré yashimangiye ko urubyiruko ruzashingira ku bumwe n’umuco mu kubaka Afurika imurikira amahanga.

Umuyobozi w’Urubyiruko muri ACRS, Jean Utazirubanda yashimiye byimazeyo ubuyobozi bwa Ambasade y’u Rwanda na ACRS kuba budahwema kubashishikariza kwiyubaka.

Yakomeje asaba abitabiriye ibi bikorwa kubatera inkunga no kubafasha kwesa imihigo bihaye.

Umuyobozi wa ACRS, Dr. Philonilla Uwamariya Thiam yashimiye abitabiriye ibi bikorwa ndetse abibutsa ko ikibahuza cya mbere ari ubunyarwanda abasaba kububungabunga.

Yabasabye kandi ko guharanira kwihesha agaciro kandi bakimakaza umuco Nyarwanda aho bari hose.

Uwamariya yakiriye Abanyarwanda barindwi bashya muri Senegal anabizeza ko bisanga mu muryango ACRS.

Ibi bikorwa byasojwe mu busabane bwaranzwe n’imbyino Nyarwanda ndetse n’izikomoka ku mugabane wa Afurika.

Ambasaderi Harebamungu Mathias mu bakurikiranye imikino
Abana bakinnye imikino itandukanye
Abana bitabiriye iyi mikino
Ikipe ya Basketball

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244